Փաստ ինֆո

Ընտրակաշառքի դեմ պայքարելու համար մեկ այլ ընտրակաշառք առաջարկելը քրեորեն հետապնդելի արարք է: Դատապարտելով օրեր առաջ Երևանի քաղաքապետի թեկնածու Նիկոլ Փաշինյանի կողմից արված հայտարարությունն առ այն, որ քաղաքացիները, ովքեր կհրաժարվեն ընտրակաշառքով քվեարկել, «ԵԼՔ»-ի հաղթանակի դեպքում Երևանի քաղաքապետարանից կստանան սոցիալական աջակցություն՝ 15 000 դրամի չափով, ասաց Երևանի քաղաքապետի մեկ այլ թեկնածու «Երկիր ծիրանի» կուսակցության նախաձեռնող խմբի անդամ Զարուհի Փոստանջյանը:

Փոստանջյանը լրագրողների հետ հանդիպմանն ընդգծեց, որ հանրային գումարները պետք է իրենց նպատակայնությանը ծախսվեն:

Քաղաքապետի թեկնածու Փոստանջյանը կարծիք հայտնեց, որ պետք է իրականացնեն երկարաժամկետ ծրագիր, որի ներքո մարդիկ այդ 15 000 ՀՀ դրամները չեն ունենա:

«Ինչ է տեղի ունենում, մենք կգանք իշխանության և ձեզ կառաջարկենք ընտրակաշառք, սա անթույլատրելի է»,- Նիկոլ Փաշինյանի արված հայտարարության վերաբերյալ ասաց Զարուհի Փոստանջյանը:

Ինչ վերաբերում է գործող քաղաքապետի վերընտրվելուն, ապա այստեղ էլ Փոստանջյանը գտնում է, որ քաղաքապետարանի աշխատակիցները, վարչական ռեսուրսները օգտագործելով, բնակչությանն ահաբեկում են և դրա համար մարդիկ ստիպված գնում են և քվեարկում՝ մեկին ասում են քեզ կկտրենք նպաստից, մյուսին սոցիալական ծրագրից և այլն:

«Իսկ եթե մենք մեկի անունը պետք է փոխենք մեկ այլ անվանմամբ, որը պետք է գա նույն գործառույթները իրականացնի իհարկե դա փոփոխություն չէ, դա նշանում է անձանց փոփոխություն»,- ասաց Զարուհի Փոստանջյանը հավելելով, որ Երկիր ծիրանին առաջարկում է համակարգային փոփոխություն:

Աղբյուր` Փաստինֆո