Փաստ ինֆո

ԱՄՆ արդարադատության նախարարի նախկին պաշտոնակատար Սալլի Յեյթսը հայտարարել է, որ Սպիտակ տան չինովնիկներին նախազգուշացրել է Ռուսաստանի կողմից ազգային անվտանգության հարցով խորհրդական Մայքլ Ֆլիննին շանտաժի ենթարկելու ռիսկի մասին: 

Ինչպես տեղեկացնում է BBC-ի ռուսական ծառայությունը, նա պատմել է այդ մասին՝ ելույթ ունենալով ԱՄՆ ընտրություններին Ռուսաստանի միջամտելու կասկածները հետաքննող Սենատի իրավաբանական հանձնաժողովի լսումների ժամանակ:

Յեյթը հայտարարել է, որ հունվարի 26-ին հանդիպել է Սպիտակ տան գլխավոր իրավախորհրդատու Դոլալդ Մաքգանի հետ և նախազգուշացրել նրան, որ Ֆլիննը ոչ հավաստի տեղեկատվություն է տրամադրել ռուսաստանյան դեսպան Սերգեյ Կիսլյակի հետ իր շփումների մասին:

Գեներալ Ֆլիննը իր պաշտոնից հեռացել է այդ խոսակցությունից գրեթե երեք շաբաթ անց. փետրվարին նա հրաժարականի դիմում է ներկայացրել՝ խոստովանելով, որ ապատեղեկացրել է ղեկավարությանը և հատկապես փոխնախագահ Մայք Փենսին, դեկտեմբերի վերջին Կիսլյակի հետ շփումների մասին:

Յեյթսն, ով աշխատել է արդարադատության նախարարությունում 27 տարի, ԱՄՆ նախագահ Դոնալդ Թրամփի կողմից ազատվել է պաշտոնից հունվարի 30-ին, մի քանի ժամ անց այն բանից հետո, երբ գրել էր գերատեսչության իրավաբաններին, որ օրինական հիմքեր չի տեսնում ներգաղթյալների բազմաթիվ կատեգորիաների շարքին երկիր մուտք գործելու արգելքի մասին նախագահի հրամանագիրը դատարաններում պաշտպանելու համար: Երկրի տարբեր մասերում դաշնային դատավորները անժամկետ կասեցրել էին հրամանագրի գործողությունը:

Ըստ նախկին դատախազի, իրեն անհանգստացրել է, որ ռուսաստանյան հատուկ ծառայությունները կարող էին շանտաժի ենթարկել Ֆլիննին, քանի որ գիտեին, որ նա ապատեղեկացրել է ղեկավարությանը:

«Դա ստեղծել էր ռիսկային իրավիճակ, երբ ազգային անվտանգության հարցով խորհրդականը կարող էր ռուսների կողմից շանտաժի զոհ դառնալ», - հայտարարել է նա՝ հրաժարվելով բացահայտել, թե որտեղից է ստացել տեղեկատվությունը Ֆլիննի ու Կիսլյակի շփումների մասին:

Աղբյուր` Փաստինֆո