Փաստ ինֆո

Ավելորդ քաշը շատերին է անհանգստացնում, իսկ երբ մոտենում է ամառն, այն դառնում է գլխավոր խնդիր: Նիհարելու համար մարդիկ դիմում են տարբեր միջոցների` բազմազան դիետաներից մինչև մարզասրահներ այցելելը:

Վերջին շրջանում շատ տարածված դիետաներից է մոնոդիետան:

Ի՞նչ է մոնոդիետան:

Մոնոդիետայի բնույթը կայանում է սահմանափակ թվով սննդի ընդունման մեջ, մասնավորապես մեկ կամ առավելագույնը երկու բաղադրիչից կազմված սննդակարգ: Բացառվում են բոլոր սննդամթերքները՝ բացի մեկից, և ողջ օրվա, շաբաթվա ընթացքում սնվում դրանով` հնարավորինս արագ նիհարելու համար:

Ի՞նչ հետևանքներ կարող է թողնել մոնոդիետան:

Արդյունավետության տեսանկյունից մոնոդիետաները միանգամայն արդարացնում են անձի սպասումները, դրանք իրոք օգնում են արագ նիհարել: Սակայն առողջական տեսանկյունից, մասնագետների պնդմամբ, տեղի է ունենում հակառակ գործընթացը. մոնոդիետաներն ավելի շատ վնաս են հասցնում օրգանիզմին, քան օգուտ: Այսինքն մեկ տեսակի մթերք օգտագործելով օրգանիզմը պակաս է ունենում շատ կարևոր նյութերի, սկսած սպիտակուցներից և անփոխարինելի ճարպերից մինչև վիտամիններ և միկրոտարրեր: Մասնագետների խոսքով, Մոնոդիետայի արդյունքում ամենաակնառու կորուստը ճարպալույծ վիտամինների անբավարարությունն է, որի հետևանքով տեղի է ունենում մազաթափություն, ինչպես նաև եղունգները դառնում են ավելի փխրուն:

Մոնոդիետայի բացասական հետևանքների մասին տեղեկանալու համար Doctors.am-ը զրուցել է բժիշկ-դիետոլոգ Լիդիա Այվազյանի հետ:

«Գոյություն ունի Յո-Յո էֆֆեկտ, որը հայտնի է նաև քաշի ճոճում (weight cycling) անվամբ: Տերմինը ներմուծել է Քելլի Դ. Բրոունելը Յել համալսարանից: Էֆֆեկտն ավելի լավ երևում է շատ ցածր կալորիական դիետաներ պահող, ինչպես նաև մոնոդիետաներ պահող անձանց մոտ: Ի՞նչ է տեղի ունենում. մարդու օրգանիզմը ճարպային հյուսվածք այրում է որոշակի արագությամբ, օրինակ միջինում ամսական 2-6կգ. դրանից արագ ճարպը չի կարող այրվել: Երբ մարդը շատ ցածր կալորիաներ է ընդունում, օրգանիզմն էներգիա ստանալու համար այրում է ոչ միայն ճարպն այլև մկանները, իսկ մկանները մեր օրգանիզմի ակտիվ մասսան են, որոնք ապահովում են նյութափոխանակությունը: Այսպիսով, մոնոդիետաների հետևանքով նիհարողը կորցնում է ոչ միայն ճարպային հյուսվածքը, այլև մկանները և իջեցնում է նյութափոխանակությունը: Հետագայում վերադառնալով սովորական սննդակարգին` ավելանում է միայն ճարպային հյուսվածքը, քանի որ նյութափոխանակությունը նվազած է»,- նշեց դիետոլոգը:

Մոնոդիետաների օրինակներ

Ամենից տարածվածներից են ձմերուկի, խնձորի, վարունգի մոնոդիետաները:

Ձմերուկի մոնոդիետա. ողջ օրվա ընթացքում պետք է օգտագործել միայն ձմերուկ, իսկ քանակությունը կախված է մարդու քաշից: Յուրաքանչյուր 10 կգ քաշի համար պետք է օգտագործել 1 կգ ձմերուկ: Այսինքն եթե մարդը կշռում է 70 կգ, նա պետք է օգտագործի 7կգ ձմերուկ: Օրգանիզմում ճարպի անբավարարությունը բերում է նրան, որ խաթարվում է բջիջների վերածնումը:

Խնձորի մոնոդիետայի արդյունքում սպիտակուցների բացակայությունը հանգեցնում է փոփոխությունների էնդոկրին համակարգում, որի հետևանքով տուժում է նաև նյարդային համակարգը:

Վարունգի մոնոդիետա պահելը շատ դժվար է: Քանի որ այն քաղցը չի հագեցնում, մարդը ողջ օրը վարունգ է ուտում և մնում սոված: Դրա արդյունավետությունն էլ վիճելի հարց է: Եթե երկու շաբաթից ավելի հետևեն այս դիետային, ապա օրգանիզմը հարմարվում է ցածր կալորիականությանը և քաշը դադարում է նվազել: Իսկ օգտակար բաղադրիչների բացակայությունն օրգանիզմում դառնում է շատ վտանգավոր:

Այսպիսով, մինչ որևէ դիետայի անցնելը, հարկավոր է վստահ լինել, որ կարճ ժամանակում կորցված կիլոգրամները բազմապատկված հետ չեն վերադառնա:

Աղբյուր` doctors.am