Փաստ ինֆո

Նորաշենի գյուղապետ Նորիկ Գրիգորյանը և նրա վարորդ 33-ամյա Կարեն Ղազարյանը սպանության փորձի գործով տուժող են ճանաչվել: Փաստինֆո-ն այս մասին տեղեկացավ ՀՀ քննչական կոմիտեից։

Հիշեցնենք, որ երեկ՝ ժամը 19:00-ի սահմաններում, Վերին Արտաշատից դեպի Արտաշատ քաղաք տանող ավտոճանապարհի հատվածում անհայտ անձն ատրճանակից կրակոցներ է արձակել «ВАЗ 2107» մակնիշի 44 VV 443 համարանիշի ավտոմեքենայի ուղղությամբ:

Արձակված կրակոցների հետանքով 3 հրազենային վնասվածք է ստացել ավտոմեքենայի վարորդ Կարեն Ղազարյանը, ով տեղափոխել է հիվանդանոց, իսկ ավտոմեքենայի մեջ գտնվող Նորաշենի գյուղապետ Նորիկ Գրիգորյանը վնասվածքներ չի ստացել:

Մեր տեղեկություններով՝ գյուղապետի ավտոմեքենայի ուղղությամբ կրակոցներ են արձակվել «Լադա Պրիորա» մակնիշի ատոմեքենայից, ընդ որում՝ այս ավտոմեքենայի համարանիշներն արտասահմանյան են եղել:

Հայտնի է դարձել նաև, որ կրակոցներ արձակող անձինք երկուսն են եղել, երկու զենք է աշխատել դեպքի վայրում: Նրանցից մեկը կրակել է վարորդի կողքի նստատեղի պատուհանից, մյուսը՝ հետնամասի։

Թե ի՞նչն է պատճառ հանդիսացել՝ գյուղապետի նկատմամբ սպանության փորձ կատարելու, առայժմ պարզել չհաջողվեց, սակայն գյուղապետը լրատվամիջոցների հայտնել է, որ տեղի ունեցածի մեջ որևէ մեկին չի կասկածում, բայցև գտնում է, որ կրակոցները իրեն են ուղղված եղել և ոչ թե՝ վարորդին:

Փաստի առթիվ Արարատի մարզային քննչական վարչությունում հարուցվել է քրեական գործ՝ ՀՀ քրեական օրենսգրքի 34-104-րդ հոդված 2-րդ մասի 1 -րդ եւ 7-րդ և 235-րդ հոդվածի 2-ին մասի հատկանիշներով:

Աղբյուր` Փաստինֆո