Փաստ ինֆո

«Փաստինֆո»-ի տեղեկություններով՝ փաստաբան Սիմոն Բաբայանը դիմել է ՀՀ գլխավոր դատախազ Արթուր Դավթյանին՝ խնդրելով հարուցել քրեական գործ՝ ՀՀ քրեական օրենսգրքի 333-րդ՝ սուտ մատնություն, և 182-րդ՝ շորթում, հոդվածների հատկանիշներով:

Հաղորդման մեջ փաստաբանը նշել է.

««Ժամանակ» օրաթերթի 2017թ. մայիսի 2-ի համարի 6-րդ էջում հրապարակվել է հոդված՝ «Փաստաբան Աթանեսյանին $50,000 են առաջարկել «թեման փակելու համար»» վերտառությամբ:

Հոդվածում Տիգրան Աթանեսյանն օրաթերթի հետ իր զրույցում, մասնավորապես, հայտնում է, որ իրեն՝ Տիգրան Աթանեսյանին, ոչ ուղղակիորեն 50 հազար դոլար են առաջարկել նախօրեին իրենց վրա կատարված հարձակման գործը «փակելու» և պատմությունը մոռանալու համար:

Մասնավորապես, ինչպես նշում է Տիգրան Աթանեսյանը. «Դեպքից հետո շատ պատահական վայրում շատ «պատահական» անձի կողմից եղավ այդ առաջարկը, ինչը ես պատահականություն չեմ համարում: Ես առհասարակ պատահականություններին չեմ հավատում: Սակայն բոլոր այդ առաջարկները և գաղափարները տեղում մերժվեցին: Դրանք ինձ համար անընդունելի են»:

Հատկանշական է, որ դեռևս 28.04.2017թ. ֆեյսբուքյան իր էջում Տիգրան Աթանեսյանը կատարել է նույնաբովանդակ գրառում՝ նշելով. «50 հազար դոլար առաջարկ)))))) մեռեք տականքներ, հոգի ծախողը դուք եք»։ Տիգրան Աթանեսյանի կողմից եղել են նույնաբովանդակ նաև այլ հրապարակային հայտարարություններ:

Նշված դեպքի առնչությամբ 28.04.2017թ. հարուցվել է քրեական գործ ՀՀ քրեական օրենսգրքի 118-րդ հոդվածի հատկանիշներով, քրեական գործի շրջանակներում ես, ի թիվս այլոց, ճանաչվել են տուժող:

Քրեական գործի քննության ընթացքում Տիգրան Աթանեսյանի կողմից հրապարակային կարգով ներկայացված այս տեղեկությունները առհասարակ չեն համապատասխանում իրականությանը:

Տիգրանը փորձում է մանիպուլացիայի ենթարկել քննությունը, շեղել քննությանը այլ ուղղությամբ և նման մեթոդներով հասնել իր համար ցանկալի «արդյունքի»: Նշված հայտարարությունը իրականության հետ որևէ աղերս չունի, վերջինս սրանով ըստ էության կատարել է սուտ մատնություն, որը նախատեսված է քրեական օրենսգրքի 333-րդ հոդվածով, քանի որ ակնհայտ կեղծ տեղեկություններ է հրապարակել՝ ակնարկելով, որ 50000 ԱՄՆ դոլար գումար են առաջարկել որպես ապօրինի վարձատրություն ցուցմունք չտալու կամ սուտ ցուցմունք տալու համար: Այսինքն՝ Տ.Աթանեսյանը հանցագործության մասին կատարել է մատնություն:

Նշված հրապարակումը պակաս հանրավտանգ չէ ի համեմատ, եթե Տիգրանը նման բովանդակության գրություն ուղարկեր իրավապահ մարմիններին:

Նույնիսկ ներկա արարքը, ավելի հանրավտանգ է, քանի որ իրավապահ մարմիններից բացի հասու է հասարակության լայն շերտերին, իսկ Տիգրանը իր նեղ անձնական շահերով պայմանավորված փորձում է մանիպուլյացիայի ենթարկել թե իրավապահ մարմիններին, թե հասարակությանը:

Ի դեպ, պատահական չէ, որ ՀՀ քրեական դատավարության օրենսգրքով ԶԼՄ-ով հանցագործության մասին հրապարակումը, նախատեսված է որպես քրեական գործ հարուցելու ինքնուրույն առիթ:

Բացի այդ լիովին տրամաբանական է այն պնդումը, որ Տիգրան Աթանեսյանը ինձանից կամ մեզանից նշված հրապարակմամբ անուղղակիորեն պահանջում են այդ չափի գումար իր բանսարկությունները դադարեցնելու համար: Այսինքն՝ Տիգրանը կատարում է շորթում, փորձելով այդ եղանակով կատարել հափշտակություն 50000 ԱՄՆ դոլարի չափով:

Ելնելով վերոգրյալից, և հաշվի առնելով, որ նշված հանգամանքների վերաբերյալ առնվազն պետք է կատարվի քննություն խնդրում եմ հարուցել քրեկան գործ ՀՀ քր. օրի 333 և 182-րդ հոդվածների հատկանիշներով»:

Աղբյուր` Փաստինֆո