Փաստ ինֆո

Վճռաբեկ դատարանը ապրիլի 18-ով թվագրված որոշմամբ մերժել է վարույթ ընդունել Գյումրիում Ավետիսյանների ընտանիքի անդամների դաժան սպանության գործով տուժող կողմի բողոքները:

Ինչպես «Փաստինֆո»-ի լրագրողին հայտնեց տուժողների իրավահաջորդների ներկայացուցիչ, փաստաբան Արամազդ Կիվիրյանը, Վճռաբեկ դատարանի պատճառաբանությունը շաբլոնային է, նման պատճառաբանությամբ Վճռաբեկ դատարանը վարույթ չի ընդունել բազմաթիվ վճռաբեկ բողոքներ:

Վճռաբեկ դատարանն, ինչպես և բազմաթիվ այլ դեպքերում, նշել է, որ բողոքում բարձրացված հարցի վերաբերյալ իր որոշումը չի կարող էական նշանակություն ունենալ օրենքի միատեսակ կիրառության համար:

«Կարող եմ ասել, որ ներպետական ատյանները սպառեցինք»,- ասաց Արամազդ Կիվիրյանը՝ հավելելով, որ ներկայումս քննարկվում է առաջին հերթին Սահմանադրական դատարան դիմելու հարցը:

Ըստ առաջին ատյանի և վերաքննիչ դատարանների փաստարկումների, տվյալ դեպքում Քրեական դատավարության օրենսգիրքը չի նախատեսում անձի ոչ նյութական վնասի հատուցման պահանջ ներկայացնելու իրավունք:

«Այնինչ մենք մի քիչ այլ կարծիք ունենք այդ առումով և, կարծում ենք, որ այստեղ նաև սահմանադրականության խնդիր կա, նաև այդ հարցն ենք ուզում քննարկել, որպեսզի քայլեր ձեռնարկենք Սահմանադրական դատարան դիմելու համար: Եվ բնականաբար, նաև քննարկելու ենք հետագայում այս գործով Եվրոպական դատարան դիմելու հարցը»,- ասաց Արամազդ Կիվիրյանը:

Տուժող կողմի ներկայացուցիչը հայտնեց նաև, որ իրենք քննարկում են նաև առանձին հայցով պահանջ ներկայացնելու հարցը, մասնավորապես, քննարկվում է, թե որքանով է դա հնարավոր և իրատեսական իրավական տեսանկյունից: «Եթե մեր քայլերը համաձայնեցնենք վստահորդների հետ, ապա նաև կգնանք այդ ճանապարհով»,- ասաց Ա.Կիվիրյանը:

Հիշեցնենք, որ առաջին ատյանի դատարանի դատավճռի դեմ իրենց բողոքները մերժելու Վերաքննիչ քրեական դատարանի որոշման դեմ վճռաբեկ բողոքներ էին ներկայացրել տուժողի իրավահաջորդ Ա.Պողոսյանի ներկայացուցիչներ Ա.Սաքունցը և Ա.Զալյանը, տուժողների իրավահաջորդներ Լ.Ավետիսյանի, Ա.Կոշտոյանի, Ա.Պողոսյանի, Ն.Պողոսյանի ներկայացուցիչ Ա.Կիվիրյանը:

Տուժողի իրավահաջորդի ներկայացուցիչներ Ա.Սաքունցը և Ա.Զալյանը խնդրել էին բեկանել ՀՀ վերաքննիչ քրեական դատարանի` 2016 թվականի դեկտեմբերի 19-ի որոշումը և գործն ուղարկել ստորադաս դատարան` նոր քննության:

Իսկ տուժողների իրավահաջորդների ներկայացուցիչ Ա.Կիվիրյանը խնդրել էր մասնակիորեն բեկանել ՀՀ վերաքննիչ քրեական դատարանի հիշյալ որոշումը և գործն ուղարկել ստորադաս դատարան` նոր քննության` տուժողների իրավահաջորդներ Լ.Ավետիսյանի, Ա.Կոշտոյանի, Ա.Պողոսյանի, Ն.Պողոսյանի հայցն ընդդեմ Ռուսաստանի Դաշնության` ոչ նյութական վնասի հատուցման պահանջի մասին, քննելու համար:

Աղբյուր` Փաստինֆո