Փաստ ինֆո

2016թ. հունիսի 4-ին Նուբարաշենի խճուղում 58-ամյա Եղիշե Խաչատրյանի սպանության գործով այսօր դատական նիստին չէին ներկայացել տուժողի իրավահաջորդ Փառանձեմ Մեյթիխանյանը և տուժող Սանասար Բադալյանը: 

Դատարանը նրանց բացակայության մասին որևէ գրություն չէր ստացել, սակայն Փառանձեմ Մեյթիխանյանի ներկայացուցիչ փաստաբան Ինեսսա Պետրոսյանը դատարանին տեղեկացրեց, որ Մեյթիխանյանը գրությամբ հայտնել է, որ նախորդ դատական նիստում, երբ դատախազը հրապարակում էր մեղադրական եզրակացության եզրափակիչ մասը, ինքը հասկացել է, որ ի զորու չէ լսել անմարդկային գործողությունների հետևանքով իր ամուսնու սպանության գործը և միաժամանակ նայել այդ ամբաստանյալների դեմքերին:

Ուստիև՝ Մեյթիխանյանը խնդրել էր՝ որպես տուժողի ներկայացուցիչ ներգրավել Ինեսսա Պետրոսյանին:

Փաստաբանը նաև նշեց, որ հաջորդ դատական նիստերին Մեյթիխանյանը կներկայանա ըստ անհրաժեշտության, իսկ քանի դեռ մեղադրական եզրակացություն է հրապարակվում նա չի ներկայանա:

Այսպիսով՝ փաստաբան Ինեսսա Պետրոսյանը ներգրավվեց որպես Փառանձեմ Մեյթիխանյանի ներկայացուցիչ:

Հիշեցնենք, նաև, որ նախորդ դատական նիստում, երբ մեղադրող դատախազի կողմից հրապարակվում էր մեղադրական եզրակացության եզրափակիչ մասը, լեզվաբանը հեռացել էր նիստերի դահլիճից, ապա վերադարձել ջերմուկի շշով, որով և հարվածել էր ամբաստանյալ Յուրի Հակոբյանին։ Նիստերի դահլիճում մեծ աղմուկ էր բարձրացել, սկսվել էր իրարանցում, հնչել  էին հայհոյանքներ, և նիստն ընդմիջվել էր։

Դատարանն այսօր արձանագրեց, որ անթույլատրելի միջադեպ է տեղի ունեցել. տուժողի իրավահաջորդի նկատմամբ սանկցիայի քննարկումը տեղի կունենա այն ժամանակ, երբ նա ներկա կլինի դատական նիստին:

Աղբյուր` Փաստինֆո