Փաստ ինֆո

Առանձնապես խոշոր չափերի փողերի լվացման ու խարդախության գործով այսօրվա դատական նիստում «Հայբիզնեսբանկ» ՓԲԸ վարչության նախկին նախագահ, ամբաստանյալ Արա Կիրակոսյանն իր պաշտպանական ճառում ամբողջությամբ հերքեց իրեն առաջադրված մեղադրանքը:

Ըստ ամբաստանյալի, մեղադրողի մեղադական ճառն արտագրված է մեղադրական եզրակացությունից: Երկուսուկես տարվա դատաքննության ընթացքում որևէ տառ չի փոխվել՝ ո՛չ դեպի լավը, ո՛չ դեպի վատը:

Արա Կիրակոսյանը հայտարարեց, որ ինքն որևէ առնչություն չունի և ոչնչի հետ, մասնավորապես, ինքը տեղյակ չի եղել, որ փաստաթղթերը կեղծված են եղել և որ փողերը հանցավոր ծագում ունեն, որևէ պայմանավորվածություն չի ունեցել: Մարդու ճակատագրի մասին է խոսքը, ինչպե՞ս կարող էր մեղադրողը այդպիսի թեթևությամբ իրեն չորս հոդվածներով մեղավոր ճանաչելու ու խիստ պատժաչափ նշանակելու՝ 15 տարվա ազատազրկում, միջնորդություն անել, հայտարարեց ամբաստանյալը:
Նա հավելեց, որ հիմնական գործող անձինք չեն հարցաքննվել:

Առանձնապես խոշոր չափերի խարդախության մեղադրանքի առնչությամբ Արա Կիրակոսյանը հայտարարեց. «Անձամբ ես ո՞ւմ գումարն եմ հափշտակել, որևէ տեղ երևո՞ւմ է գործի 35 հատորում: Աբսուրդի գագաթնակետն է»:

Մեկ առ մեկ հերքելով մեղադրանքի բոլոր չորս հոդվածները՝ Արա Կիրակոսյանը հավելեց՝ ենթադրություններ անելով չի կարելի մարդու ճակատագրի հետ խաղալ:

Մեղադրողը ռեպլիկում ամբաստանյալի ճառն որակեց որպես հուզական երանգներ ունեցող: Ըստ մեղադրողի, ամբողջ ներկայացվածը հերքվում է հետազոտված ապացույցներով:

Հաջորդ դատական նիստում պաշտպանական կողմը կներկայացնի շուրջ ութ մլն եվրո բռնագանձելու մասին Հայբիզնեսբանկի քաղաքացիական հայցի վերաբերյալ իր դիրքորոշումը, ապա ամբաստանյալը հանդես կգա վերջին խոսքով, և դատարանը կհեռանա խորհրդակցական սենյակ՝ դատական ակտ կայացնելու:

Հիշեցնենք, որ ըստ մեղադրանքի՝ 2006 թվականի օգոստոսի 21-ից մինչև 2013 թվականի հոկտեմբերի 01-ը ներառյալ ժամանակահատվածում «Հայբիզնեսբանկ» ՓԲ ընկերության Վարչության նախագահ աշխատած Արա Կիրակոսյանը բանկի վարչության նախագահի տեղակալ-Տարածքային զարգացման և տեղեկատվական տեխնոլոգիաների դեպարտամենտի տնօրեն Մելիք Եսայանի, ԻԻՀ և ԱՄՆ քաղաքացի Մաջիդ Ռ Նազիֆի, ԻԻՀ և ԱՄՆ քաղաքացի, ՀՀ-ում գրանցված «Ալֆա Զեներալ Թրեյդինգ» ՍՊ ընկերության հիմնադիր-տնօրեն Բեհրուզ Բեհնամի, ԻԻՀ և ՀՀ քաղաքացի Վահիկ Մանուկյանսի, Շվեյցարիայի Համադաշնության ժնև քաղաքում գրանցված, «Կոսմոս Տրադինգ» ընկերության հիմնադիր, ՀՀ քաղաքացի Անդրանիկ Դոների, վերջինիս կողմից լիազորված անձ՝ Սուրեն Դաբրիելյանի և ՀՀ-ում գրանցված «Դավ Տրանս Ստրոյ» ՍՊ հիմնադիր տնօրեն, ՀՀ քաղաքացի Դավիթ Դերզյանի հետ, մի խումբ անձանց կողմից նախնական համաձայնությամբ, 2012 թվականի օգոստոսից մինչև 2013 թվականի մարտ ամիսը ներառյալ ժամանակահատվածում, օգտագործելով իրավունք վերապահող պաշտոնական փաստաթղթեր հանդիսացող կեղծ պայմանագրեր և վճարման հանձնարարականներ, խարդախությամբ՝ խաբեության եղանակով հափշտակել, ապա օրինականացրել են Ռուսաստանի Դաշնության Մոսկվա քաղաքում գործող «Միր Բիզնես Բանկ» ՓԲ ընկերության կողմից, «Սբերբանկ» ՓԲ ընկերության միջոցով (միջնորդությամբ), «SWIFT» համակարգով «Հայբիզնեսբանկ» ՓԲ ընկերություն փոխանցված առանձնապես խոշոր չափերով ընդհանուր 5.804.577.000 ՀՀ դրամին համարժեք 10.980.000 եվրո գումար, որից՝ 1.000.000 եվրոն նախատեսված է եղել գումարի իրական շահառու, Բանկում թղթակցային հաշվեհամարներ բացած, ԻԻՀ «Քիշ Ինտերնեյշնլ Բանկ» ընկերության համար, իսկ 9.980.000 եվրոն՝ «SWIFT» հաղորդագրություններում անճշտություններ լինելու և վերջնական շահառուն նշված չլինելու պատճառով, ենթակա Է եղել վերադարձման ուղարկող «Միր Բիզնես Բանկ» ՓԲ ընկերությանը, ինչի հետևանքով «Քիշ Ինտերնեյշնլ Բանկ» և «Միր Բիզնես Բանկ» ՓԲ ընկերությունները իրավունք են ձեռք բերել նույն չափով գումարներ ստանալու հայցապահանջ երկայացնել «Հայբիզնեսբանկ» ՓԲ ընկերության նկատմամբ, որը հատուցման պարտավորություն է ստանձնել։

Արա Կիրակոսյանին մեղադրանք է առաջադրվել ՀՀ քրեական օրենսգրքի 214-րդ հոդվածի 2-րդ մասով՝ առևտրային կազմակերպության ծառայողի կողմից լիազորությունները չարաշահելը, որն առաջացրել է ծանր հետևանքներ, 325-րդ հոդվածի 2-րդ մասով՝ մի խումբ անձանց կողմից նախնական համաձայնությամբ փաստաթղթեր կեղծելը, իրացնելը կամ օգտագործելը, 178-րդ հոդվածի 3-րդ մասի 1-ին կետով՝ առանձնապես խոշոր չափերի խարդախություն, 190-րդ հոդվածի 3-րդ մասի 1-ին կետով՝ առանձնապես խոշոր չափերի փողերի լվացում:

Աղբյուր` Փաստինֆո