Փաստ ինֆո

Հայկական շուկայում ադրբեջանական խնձորների հայտնվելու մասին հանրային քննարկումները լրացուցիչ անգամ ի ցույց դրեցին իրավասու մարմինների մի շարք հարցերում ոչ կոմպետենտությունը, ինչու չէ նաեւ` չկայացվածությունն ու անլրջությունը:

Օրեր շարունակ տեւող հանրային քննարկումներից հետո ՀՀ ԳՆ սննդամթերքի անվտանգության պետական ծառայությունը միայն հայտարարեց, որ ստույգայցերի ժամանակ ադրբեջանական խնձորի վաճառքի դեպքեր են բացահայտվել ինչպես Երեւանի տարբեր վարչական շրջանների շուկաներում, նաեւ սուպերմարկետներում, այնպես էլ մարզերում եւ հանձնարարել անմիջապես դրանք ոչնչացնել:

Իսկ ՊԵԿ-ը շտապեց հայտարարել, թե ադրբեջանական խնձորի մաքսանենգության դեպք չեն հայտնաբերել, ասել է թե` դրանք Հայաստան են ներկրվել օրինական:

Արդյունքում` ստացվեց, որ x ներկրողն իր շահույթի համար ի հեճկուս Հայաստանի ազգային շահի ձեռք է բերել եւ Հայաստան ներկրել ադրբեջանական խնձոր, ինչի համար հանրային ճնշման ներքո պատասխան են տալիս մանրածախ առեւտրով զբաղվողները, քանի որ ավելի քան վստահ ենք, որ ՍԱՊԾ-ի պահանջով ոչնչացված խնձորի համար ներկրողը չի փոխհատուցելու այն խեղճ ու կրակ վաճառականներին, ովքեր մի քանի կիլոգրամ խնձոր վերավաճառելով վաստակում են իրենց օրվա ապրուստը:

Ադրբեջանական խնձորների՝ Հայաստան ներկրումը պաշտոնատար անձանց միջոցով է կազմակերպվե՞լ. Պարզաբանում է ԱԱԾ-ն

Սակայն իրավիճակն ավելի լրջացավ ԱԱԾ հայտարարությունից հետո, որը կարծես սառը ցնցուղ լիներ հատկապես ՊԵԿ-ի համար: ԱԱԾ մամուլի կենտրոնի պետ Սամսոն Գալստյանը «Փաստինֆո»-ի հարցմանն ի պատասխան հայտարարել է, որ ՀՀ տարածք ադրբեջանական խնձորի առերևույթ ապօրինի ներկրմանը ՀՀ իրավասու մարմինների պաշտոնատար անձանց հնարավոր առնչությունը պարզելու նպատակով Ազգային անվտանգության ծառայության համապատասխան ստորաբաժանումն իրականացրել է մի շարք ստուգողական գործողություններ եւ դրանց արդյունքում, մասնավորապես, տվյալներ են ստացվել՝ ներկրում իրականացրած հնարավոր անձանց շրջանակի, ինչպես նաև՝ ներկրման եղանակի վերաբերյալ, որը, ըստ նախնական տվյալների, եղել է անօրինական:

Ընդգծենք, որ ԱԱԾ-ն օգտագործում է «անօրինական» որակումը, իսկ մեղսակից անձանց շրջանակը պարզելու համար գործողությունները շարունակվում են: Եվ սա այն դեպքում, երբ ՊԵԿ-ն ապրիլի 26-ին պաշտոնապես հայտարարել է, թե  «ՀՀ օրենսդրությամբ հանրապետության տարածք անձնական օգտագործման համար թույլատրված քանակով (մինչև 50 կգ) խնձորի և այլ պտուղ-բանջարեղենի ներկրումն անգամ իրականացվում է խիստ հսկողության տակ»:

Փաստորեն ունենք մի իրավիճակ, երբ ՊԵԿ-ը բացառում է խնձորների` մաքսանենգ ճանապարհով Հայաստանում հայտնվելը, պնդում է, թե պտուղ-բանջարեղենի ներկրումն ընդհանրապես կատարվում է խիստ հսկողության պայմաններում, ինչից հետո ԱԱԾ-ն, ըստ էության, հակառակն է ասում` հայտարարելով, որ ներկրման եղանակը եղել է անօրինական: Ակնհայտ է, որ գնդակը ներկայումս ՊԵԿ-ի դարպասում եւ վերջինս պետք է հրապարակավ բացատրություններ ներկայացնի հարցի առնչությամբ, հոդաբաշխ բացատրի, թե  ինչպես է ստացվել, որ «խիստ հսկողության» պայմաններում գործ ունենք անօրինական ներկրման հետ եւ արդյոք խոսքը չի գնում կոռուպցիոն դրսեւորումների մասին: Այս դեպքում, իհարկե, առանց հարկային ու մաքսային մարմինների պատասխանատու աշխատակիցների «առնչության» դժվար է պատկերացնել որեւէ տեսակի մթերքի «անօրինական» բարեհաջող ներկրումը Հայաստան:

Աղբյուր` Փաստինֆո