Փաստ ինֆո

Ականավոր սփյուռքահայ դերասանուհի Արսինե Խանջյանի հայցի գործի վարույթը կարճելու մասին Վարչական դատարանի որոշման դեմ հայցվոր կողմը բողոք է ներկայացրել Վարչական վերաքննիչ դատարան: Բողոքը մակագրվել է դատական կազմին՝ դատավոր Արա Բաբայանի նախագահությամբ:

ՀՀ վարչական դատարանը՝ դատավոր Կարեն Ավետիսյանի նախագահությամբ, փետրվարի 28-ի որոշմամբ կարճել էր վարչական գործի վարույթն ըստ հայցի Արսինե Խանջյանի ընդդեմ ՀՀ ոստիկանության:

Վարչական դատարանը խախտել է Արսինե Խանջյանի՝ դատարանի մատչելիության իրավունքը. Արամազդ Կիվիրյան

Հայցում Արսինե Խանջյանը պահանջում է ոստիկանության գործողությունները, այդ թվում՝ իր արտահայտվելու ազատության, խաղաղ հավաքների ազատության, ազատ տեղաշարժվելու, անձնական ազատության և անձեռնմխելիության, ձերբակալման պահից իր ընտրությամբ պաշտպան ունենալու, իրավաբանական օգնություն ստանալու, նվաստացնող կամ անմարդկային վերաբերմունքից, խտրական վերաբերմունքից զերծ մնալու իրավունքներին միջամտող գործողությունները ոչ իրավաչափ ճանաչել և բարոյական վնասը հատուցելուն պարտավորեցնել:

Վարչական դատարանը բավարարել էր պատասխանող կողմի՝ ոստիկանության, միջնորդությունը գործի վարույթը կարճելու մասին՝ արձանագրելով, որ հայցով հայցվորի բարձրացրած այն խնդիրները, որոնք կարող են հանցակազմի տարրեր պարունակել, նախ քննության առարկա պետք է դառնան քրեադատավարական ընթացակարգերով, որպեսզի պարզվի այն հարցը, թե արդյո՞ք համապատասխան պաշտոնատար անձինք թույլ են տվել քրեորեն պատժելի արարք, թե՝ ոչ։ Եվ միայն նշված հարցի բացասական լուծման պարագայում դրանք կարող են Վարչական դատարանի քննության առարկան դառնալ՝ որպես վարչական մարմնի վարչարարություն։

Մասնավորապես, ՀՀ քրեական օրենսգրքով պատիժ է նախատեսված մարդուն ապօրինի ազատությունից զրկելու համար (հոդված 133), կախված քաղաքական կամ այլ հայացքներից` մարդու և քաղաքացու իրավունքներն ու ազատություններն ուղղակի կամ անուղղակի խախտելու համար (հոդված 143), պաշտոնեական լիազորությունները չարաշահելու (հոդված 308) և պաշտոնեական լիազորություններն անցնելու (հոդված 309) համար և այլն:

Նման պայմաններում հայցվորի կողմից վիճարկվող գործողությունները նախ պետք է ստանան քրեաիրավական գնահատական, իսկ դրանցում հանցագործության հատկանիշների բացակության դեպքում միայն կարող են ստուգվել վարչադատական կարգով՝ որպես վարչարարություն։ Ուստի, նկատի ունենալով, որ տվյալ պահին առկա չէ քրեական վարույթ իրականացնող իրավասու մարմնի համապատասխան որոշում առ այն, որ խնդրո առարկա գործողություններում բացակայում են հանցագործության հատկանիշներ, դրանց իրավաչափությունը չի կարող քննարկվել Վարչական դատարանի կողմից:

Վարչական դատարանը գտել էր նաև, որ բարոյական (ոչ նյութական) վնասի հատուցման պահանջի հետ կապված այս հայցով վեճը ենթակա չէ Վարչական դատարանում քննության, քանի որ ՀՀ վարչական դատավարության օրենսգրքի 69-րդ հոդվածով ամրագրված է վարչարարության հետևանքով պատճառված գույքային վնասի հատուցում պահանջելու հնարավորություն։

Այսպիսով, դատարանի համոզմամբ, ներկա փուլում հայցը ենթակա չէ դատարանում քննության, իսկ ՀՀ վարչական դատավարության օրենսգրքի 96-րդ հոդվածի 1-ին մասի 1-ին կետի համաձայն՝ դատարանը գործի քննության ցանկացած փուլում կարճում է գործի վարույթը, եթե վեճը ենթակա չէ որևէ դատարանում քննության։

Հիշեցնենք, որ Արսինե Խանջյանը Խորենացու փողոցից անցյալ տարվա հուլիսի 26-ին բերման էր ենթարկվել ոստիկանություն և մոտ երեք ժամ գտնվել ոստիկանության բաժանմունքում, ապա դերասանուհուց ներողություն էին խնդրել՝ ասելով՝ թյուրիմացություն է:

Աղբյուր` Փաստինֆո