Փաստ ինֆո

Ապրիլի երկուսի խորհրդարանական ընտրությունների արդյունքներն ամփոփելու մասին ՀՀ ԿԸՀ որոշման դեմ ՀԱԿ-ՀԺԿ դաշինքի դիմումի գործով այսօր ՀՀ սահմանադրական դատարանը հեռացավ խորհրդակցական սենյակ՝ որոշում կայացնելու, որը կհրապարակվի պատրաստ լինելուն պես: 

Մինչ այդ ՍԴ-ում եզրափակիչ խոսքով հանդես եկան կողմերը՝ յուրաքանչյուր կողմը 30 րոպե տևողությամբ:

Մինչ եզրափակիչ խոսքի իրավունք տրամադրելը ՀՀ ՍԴ նախագահ Գագիկ Հարությունյանը հիշեցրեց Սահմանադրական դատարանի մասին ՀՀ օրենքի դրույթն, ըստ որի կողմերն իրավունք չունեն իրենց խոսքն օգտագործել քաղաքական հայտարարությունների համար՝ հակառակ դրան քաղաքական հայտարարություններ եղան:

Դիմող կողմն՝ ի դեմս ՀՀ ԱԺ պատգամավոր Լևոն Զուրաբյանի,կարևորեց ՍԴ-ում եռօրյա լսումները, որով, ըստ նրա, հաստատվեցին պետականորեն կազմակերպված ընտրակեղծարարության, իրավապահ մարմինների կողմից դրանք պարտակելու փաստերը: Սրա մասին, ըստ Լ.Զուրաբյանի «չգիտեն» ընտրությունների օրինականության նկատմամբ վերահսկողություն իրականացնող պետական մարմինները՝ ՀՀ կենտրոնական ընտրական հանձնաժողովը, դատախազությունն ու ոստիկանությունը:

Ըստ դիմող կողմի, թեև ստացված են, մասնավորապես, ընտրողներին կաշառելու ապացույցները, սակայն իրավապահ համակարգը զբաղված է եղել ոչ թե դրանք բացահայտելով, այլ պարտակելով, այսինքն՝ դրսևորել է հանցավոր անգործություն:

Մասնավորապես, ստացվել են դպրոցների և մանկապարտեզների ղեկավարների կողմից իրենց աշակերտների կամ սաների ծնողների վրա ՀՀԿ-ի օգտին քվեարկելու ճնշման անհերքելի ապացույցներ՝ ձայնագրությունների տեսքով, ճնշումներ, ըստ Լ.Զուրաբյանի, որոնք կարող էին էական ազդեցություն ունենալ ընտրությունների արդյունքների վրա: Ըստ նրա, առկա են եղել հիմքերը կուսակցության գրանցումը չեղյալ հայտարարելու համար:

Դիմող կողմը կասկած հայտնեց այդ փաստով ԿԸՀ-ի կողմից վարչական վարույթի օրինականության հետ կապված: Ըստ կողմի, վարչական վարույթ չի եղել և բացատրություններ էլ չեն վերցվել, այլ ՀՀԿ ընտրական շտաբից են դրանք ստացվել:

Ըստ Լևոն Զուրաբյանի, հանցագործությունը պարտակելու դրսևորում է ԿԸՀ նախագահ Տիգրան Մուկուչյանի հայտարարությունը, թե որոշ ընտրակաշառք բաժանելու դեպքեր չեն ուղարկվել դատախազություն, քանի որ դրանք ընտրակաշառք բաժանելու խոստումներ են եղել, իսկ վերջինս քրեորեն հետապնդելի արարք չէ: Լ.Զուրաբյանը վկայակոչեց ՀՀ քրեական օրենսգրքի 154.2-րդ հոդվածի 2-րդ մասն, որը քրեական պատասխանատվություն է նախատեսում ընտրողին թեկնածուներից, կուսակցություններից (կուսակցությունների դաշինքներից), հանրաքվեի քարոզչական նախաձեռնություններից որևէ մեկի օգտին կողմ կամ դեմ քվեարկելու, ընտրություններին մասնակցելուն կամ ընտրություններին մասնակցելուց հրաժարվելուն հարկադրելու համար, որը կատարվել է գույքին վնաս պատճառելով կամ գույքին վնաս պատճառելու սպառնալիքով, բռնությամբ կամ բռնություն գործադրելու սպառնալիքով, անձամբ կամ միջնորդի միջոցով իր կամ իր ներկայացրած անձի (կուսակցության, կուսակցության դաշինքի) համար կաշառք տալը, այսինքն` դրամ, գույք, գույքի նկատմամբ իրավունք, արժեթղթեր կամ որևէ այլ առավելություն խոստանալը կամ տրամադրելը:

Դիմող կողմն խոսեց ընտրակաշառքների հանդեպ պետականորեն ոչնչով չբացատրվող հանդուրժողականության մասին՝ հիշատակելով ՀՀԿ առաջնորդների հայտարարություններն առ այն, որ կաշառք չէ, բարեգործություն է:

Ըստ Լևոն Զուրաբյանի, ընտրությունների արդյունքները չեն արտացոլում ժողովրդի ազատ կամքը և պետք է ճանաչվեն անվավեր: Միաժամանակ նա համոզմունք հայտնեց, որ ՍԴ-ն չի բավարարելու իրենց դիմումը, և խնդիրը ապացույցների անբավարարությունը չէ, այլ որքան հնարավոր է իշխող կուսակցությանն ու նրա ղեկավարին պաշտպանելու ցանկությունը:

Լ.Զուրաբյանը հայտարարեց, որ Հայաստանում առկա է ահաբեկված, վախեցած, հեռանկարներին չվստահող ժողովուրդ: Ելքն, ըստ նրա, ճշմարտության հաղթանակի համար ամեն ինչ անելն է՝ մի օր դա ազգովին անելու ենք, ասաց նա:

Դիմող կողմի ներկայացուցիչ, փաստաբան Վահե Գրիգորյանն իր եզրափակիչ խոսքում անդրադարձավ «ՀՀԿ-ի միակուսակցական ամբողջատիրությանը»: Կուսակցությունը օրինական հիմունքներով վերահսկում է օրենսդիր, գործադիր, դատական իշխանության ճյուղերը, ինչը ծայրահեղ հակասահմանադրական է: Ըստ նրա, այդպիսով չի կարող ապահովվել Սահմանադրության իրացումը, և դա հանգեցնում է սահմանադրական ճգնաժամի:

Ելնելով դրանից՝ Վահե Գրիգորյանը նպատակահարմար համարեց, որպեսզի նույնիսկ մերժելով դիմումը, ՍԴ-ն անդրադառնա բարձրացված հարցերին:

Պատասխանող կողմն իր եզրափակիչ խոսքում նշեց, որ իրենք հեռու են այն մտքից, որ ընտրություններն անթերի ու իդեալական են եղել, սակայն դրանք եղել են ժողովրդավարական: Կողմն ընդգծեց, որ ընտրական գործընթացի նկատմամբ վստահությունը վերականգնելու ուղղությամբ ջանքեր պետք է գործադրի ոչ միայն իշխանությունն, այլև ընդդիմությունը: Որպես ասվածի վկայություն ԿԸՀ-ն նշեց, որ դիմումատու ընդդիմադիր դաշինքը որպես ընտրակեղծարարություն է որակում ընտրական թերությունները:

Նշելով, որ դիմող կողմը ընտրախախտումների վերաբերյալ որևէ փաստարկված ապացույց չներկայացրեց, ՀՀ ԿԸՀ նախագահ Տիգրան Մուկուչյանը՝ օգտագործելով դիմող կողմի արտահայտությունը, նշեց. «Ամբողջ կյանքը դեժավյու է, երբ շարժվում եք ոչ թե առաջ, այլ դեպի հետ»:

Լուսանկարը՝ Ֆոտոլուրի

Աղբյուր` Փաստինֆո