Փաստ ինֆո

Գյումրիում տեղակայված 102-րդ ռուսական ռազմաբազայի զինծառայող 21-ամյա Դմիտրի Յալպաևի սպանության գործը ՀՀ քննչական կոմիտեն ուղարկել է Գլխավոր դատախազություն: Նշենք, որ քրեական գործով նախաքննությունը ՀՀ գլխավոր դատախազի հանձնարարությամբ վարելու է Ազգային անվտանգության ծառայությունը:

Հիշեցնենք, որ ապրիլի 22-ին՝ ժամը 17:15-ի սահմաններում Գյումրի քաղաքի Արգո խանութի մոտ հայտնաբերվել է Գյումրիում տեղակայված 102-րդ ռուսական ռազմաբազայի զինծառայող Դմիտրի Յալպաևի դի:

Ռուս զինծառայողի սպանության մեջ մեղադրվում է հայ երիտասարդ՝ Արման Ջանջուղազյանը, վերջինիս նկատմամբ դատարանը որպես խափանման միջոց է ընտրել կալանավորումը:
Ռուսական ռազմաբազայի զինծառայող Դմիտրի Յալպաևը սպանվել է դանակի գործադրմամբ:

Դեպքից հետո Քննչական կոմիտեն պաշտոնական հաղորդագրությամբ հանդես եկավ և տեղեկացրեց, որ զինվորին պատճառվել է 8 վնասվածք, որոնց հետևանքով նա տեղում մահացել է:
Ավելի վաղ նաև տեղեկացրել էինք, որ Յալպաևի սպանության մեջ մեղադրվող Ջանջուղազյանը նախկինում մի քանի անգամ ինքնավնասումներ է կատարել:

Դեռևս նախորդ տարվա նոյեմբեր ամսին, երբ գտնվել է ծառայության մեջ՝ զորամասում ածելիով ինքնավնասում է կատարել՝ ձախ նախաբազկի շրջանում, տեղի ունեցածի հետևանքով նրան հոսպիտալացրել են, այս անգամ էլ ինքնավնասում է կատարել հիվանդասենյակի զուգարանում:

Եվ որպեսզի նեղ մասնագիտական հետազոտման ենթարկվի Ջանջուղազյանին տեղափոխել են ՀՀ ՊՆ Երևանի կայազորային հոսպիտալի հոգեբուժական բաժանմունք:

Նրա նկատմամբ նշանակվել է ռազմաբժշկական և դատահոգեբուժական ամբուլատոր համալիր փորձաքննություն:

Արդյունքում, նշված փորձաքննության եզրակացության համաձայն՝ Արման Ջանջուղայանի մոտ փորձաքննության կատարման ժամանակ հայտնաբերվել է հոգեկան խանգարումներ:

Ուստիև Ջանջուղազյանը զինվորական ծառայությանը ճանաչվել է ոչ պիտանի և այդ հիմքով այս տարի մարտի 9-ին զորացրվել է:

Մեկ այլ քրեական գործով վերջինս ունի մեղադրյալի կարգավիճակ, խոսքը վերաբերում է զորամասում ոչ կանոնադրային հարաբերություններին՝ Ջանջուղազյանն աթոռով հարվածել է քնած զինծառայողի:

Ըստ մեր տեղեկությունների՝ ռուս զինծառայողի սպանության մեջ մեղադրվող Ջանջուղազյանը ընդունում է, որ ինքն է սպանել զինվորին, բայց իրեն մեղավոր չի ճանաչում։

Աղբյուր` Փաստինֆո