Փաստ ինֆո

Ապրիլի 2-ի խորհրդարանական ընտրությունների արդյունքներն ամփոփելու մասին ՀՀ ԿԸՀ  որոշումը վիճարկելու մասին Կոնգրես-ՀԺԿ դիմումի գործով այսօրվա նիստում դիմող կողմը հարցեր ուղղեց պատասխանողին ու հարակից պատասխանողներին, իսկ ՍԴ անդամները՝ երկու կողմին էլ:

 Սահմանադրական դատարանում քննության առնվեց նաև դիմող կողմի երկու միջնորդությունն ապացույցները լրացուցիչ հետազոտելու կամ նոր ապացույցներ ձեռք բերելու մասին: ՍԴ-ն  աշխատակարգային որոշմամբ մերժեց միջնորդությունները:

 Մասնավորապես, դիմող կողմը ներկայացրել է միջնորդություն   «Սահմանադրական դատարանի մասին» ՀՀ օրենքի 73-րդ հոդվածի 2-րդ մասի համաձայն, «սույն գործով որոշումն ընդունելու համար անհրաժեշտ ապացույցների, փաստերի վերաբերյալ  տեղեկությունների ձեռքբերումը հանձնարարել իր աշխատակազմի աշխատողներին և այդ կապակցությամբ Սահմանադրական դատարանին ձևավորել  հանձնախմբեր՝ ներգրավելով ՍԴ անդամներին՝ որպես հանձնախմբի կամ հանձնախմբերի ղեկավար, և տարբեր կամ միևնույն մարմինների աշխատակիցներին, ինչպես նաև մեզ՝ ԱԺ ընտրություններին մասնակցող կուսակցությունների դաշինքին և դրա ներկայացուցիչներին, ընտրությունների ընթացքում դիտորդություն իրականացրած տեղական դիտորդներին ու միջազգային դիտորդներին»:

 Դիմող կողմը գործի դատաքննության փուլում միջնորդություն է  ներկայացրել նաև ձևավորել հատուկ հանձնախումբ բոլոր 1500 ընտրական տեղամասերում, որտեղ տեղակայված են եղել տեսանկարահանող սարքեր, նկարահանված նյութերի ուսումնասիրման համար:

 Ըստ  ՍԴ որոշման, ընտրական գործընթացի արդյունքներով Կենտրոնական ընտրական հանձնաժողովի ընդունած որոշման հետ կապված վեճը քննելիս Սահմանադրական դատարանը չի կարող ստանձնել քաղաքական ուժերի կողմից ընտրական գործընթացին մասնակցող ավելի քան 34 000 կոնկրետ իրավասուբյեկտների, ինչպես նաև իրավապահ ու դատական մարմինների գործառույթների իրականացումը և ընտրական գործընթացի նկատմամբ բոլոր ընտրական տեղամասերի 40 000 ժամից ավելի տեսանկարահանումների հետին թվով դիտարկումն ու գնահատումը:

 Միաժամանակ Սահմանադրական դատարանը գտնում է, որ դիմողի կողմից ներկայացված ու իր կողմից պահանջված  նյութերում պարունակված փաստերի վերաբերյալ տեղեկատվությունը գործի դատաքննության փուլում հնարավոր է եղել ուսումնասիրել ամբողջ ծավալով և նոր ապացույցների ձեռք բերման անհրաժեշտություն չի առաջացել: «Դիմողն իրավունք ու հնարավորություն է ունեցել ձեռք բերելու այդ ապացույցները և սահմանված կարգով ներկայացնելու Սահմանադրական դատարան»,- նշվում է ՍԴ աշխատակարգային որոշման մեջ:

 Վաղը կողմերը կօգտվեն եզրափակիչ խոսքով հանդես գալու իրենց իրավունքից՝ ըստ կանոնակարգի, յուրաքանչյուր կողմին տրամադրվում է մինչև երեսուն րոպե ժամանակ՝ եզրափակիչ խոսքով հանդես գալու համար:

Աղբյուր` Փաստինֆո