Փաստ ինֆո

Եթե 2015թ. հուլիսի 27-ի առավոտյան Մերի Մարգարյանին կեսարյան հատում կատարեին, ապա հնարավոր էր պտուղը փրկվեր: Նման կարծիք այսօր դատարանում հայտնեց Երևանի Պերինատոլոգիայի, մանկաբարձության և գինեկոլոգիայի կենտրոնի ղեկավար և Հանրապետության գլխավոր մանկաբարձ-գինեկոլոգ Ռազմիկ Աբրահամյանը, ով կես դար է աշխատում է մանկաբարձության ոլորտում:

Ծննդկան Մերի Մարգարյանի և նրա դստեր մահվան գործով այսօր ի վերջո դատարան էր ներկայացել Ռազմիկ Աբրահամյանը:

Վերջինս, հղելով Առողջապահության նախարարության 2015թ. 886 որոշմնանը, նշեց, որ եթե հղին դիմում է բժշկի և նշում է, որ ունեցել 38 և ավել ջերմություն, ապա ցանկալի է և անհրաժեշտ, որպեսզի նրան հոսպիտալացնեն:

Նախագահող դատավոր Դավիթ Բալայանի ճշտող հարցին, թե դեպքից առաջ է այդ հրամանը եղե՞լ, թե՝ հետո, փորձագետը դժվարացավ պատասխանել, սակայն նշեց, որ դատաբժշկական փորձաքննության եզրակացությունը կազմելիս իրենք առաջնորդվել են 2007թ. Առողջապահության նախարարության ուղեցույցներով, որտեղ գրված է, որ հղիի մոտ բարձր ջերմություն համարվում է 38-ը:

Միևնույն ժամանակ Աբրահամյանը նշեց, որ, ըստ փաստաթղթերի, երբ Մերին դիմել է հիվանդանոց, նրա ջերմությունը 37-աստիճան է եղել և ցուցում չի եղել՝ հոսպիտալացնելու համար:

Իսկ թե մինչ այդ՝ հուլիսի 23-ից 27-ը ընկած ժամանակահատվածում, նրա նկատմամբ իրականացված բժշկական օգնությունը պատշաճ է եղե՞լ, դինամիկ հսկողությա՞ն տակ է նա գտնվել, Աբրահամյանը պատասխանեց, որ դինամիկ հսկողության համար պետք էր նրան հոսպիտալացնել:

«Եթե հուլիսի 23-ից սկսած նա ունեցել է բարձր ջերմություն, ապա պետք է հոսպիտալացվեր»,- ասաց Ռազմիկ Աբրահամյանը: Իսկ չհոսպիտալացները թերացում համարում է, թե՝ ոչ հարցին, փորձագետը չկարողացավ հստակ պատասխան տալ, սակայն հավելեց, որ ցանկալի էր հոսպիտալացվեր:

Անդրադառնալով HELLP սինդրոմին, փորձագետը նշեց, որ հիվանդության հիմնական կլինիկական նշաններն են՝ արյան մակարդելիության անկման նկատում, լյարդի ֆերմենտների ակտիվացում, տրոմբոցիտների քանակի նվազում և ըստ հիվանդության պատմագրի՝ նրա մոտ այդ ախտանիշներն առաջ են եկել հուլիսի 27-ին:

Միևնույն ժամանակ փորձագետը նշեց, որ Մերի Մարգարյանը ընդունվել էր հիվանդանոց հուլիսի 26-ին՝ ժամը 16.10 րոպեին, և 26 լույս 27 գիշերը նրա մոտ վատթարացում է եղել՝ փսխում, ընդհանուր թույլություն, քանի որ HELLP սինդրոմn ագրեսիվ նշաններով և ագրեսիվ ընթացող հիվանդություն է, հնարավոր է, որ այդ նշանները առաջ են եկել հենց 26 լույս 27-ի գիշերը:

Իսկ երբ հուլիսի 27-ի առավոտյան ստացվել է նրա լաբորատոր հետազոտության պատասխանները, հետազոտության տվյալներն արդեն խոսում էին այդ չարաբաստիկ HELLP սինդրոմի մասին:

Ինչ վերաբերում է պտղին, ապա կեսդարյա մասնագիտական փորձով բժիշկն ասաց, որ հուլիսի 27-ին պտղի զարկերը եղել է 140՝ նորմայի սահմաններում, սակայ մինչ այդ պտղի մոտ ախտորոշվել էր սակավաջրություն, աճի դանդաղում, ինչպես նաև պորտալարի փաթաթում, այս բոլոր տվյալների պարագայում, եթե որոշում կայացնողn ինքը լիներ, ապա կեսարյան հատում կկատարեր:

Նշենք, որ Ռազմիկ Աբրահամյանը եղել է դատաբժշկական փորձաքննության խմբում, սակայն մասնակցել է նաև «Էրեբունի» բժշկական կենտրոնում Մերի Մարգարյանի համար ձևավորված կոնսիլիումին: Դատարանը նկատեց, որ այս պարագայում Աբրահամյանn իրավունք չուներ ընդգրկվեր դատաբժշկական փորձաքննության խմբի կազմում, այս կապակցությամբ Աբրահամյանը հայտնեց, որ կոնսիլիումին մասնակցելու մասին ինքը տեղեկացրել է, երբ ձևավորվել է խումբը, սակայն իրեն ներառել են, իսկ թե ինչո՞ւ, չի կարող պատասխանել:

Աղբյուր` Փաստինֆո