Փաստ ինֆո

ՀՀ Սահմանադրական դատարանում այսօր սկսվեց ապրիլի 2-ին տեղի ունեցած ԱԺ ընտրությունների արդյունքներն ամփոփելու մասին ԿԸՀ ապրիլի 9-ի որոշումը վիճարկող ՀԱԿ-ՀԺԿ դաշինքի դիմումի քննությունը։

Դիմումատուին Սահմանադրական դատարանում ներկայացնում են ԱԺ պատգամավոր Լեւոն Զուրաբյանը, փաստաբաններ Վահե Գրիգորյնաը եւ Տիգրան Եգորյանը, իսկ որպես պատասխանող ներգրավված ԿԸՀ–ն ներկայացնում են ԿԸՀ նախագահ Տիգրան Մուկուչյանը, քարտուղար Արմեն Սմբատյանը, ԿԸՀ անդամ Նունե Հովհաննիսյանը։ Հարակից պատասխանող են ճանաչվել գլխավոր դատախազությունն ու ոստիկանությունը։

Դիմումը քննելու համար ՍԴ-ում ստացվել են տարբեր իրավասու մարմիններից պահանջված 1410 էջ կազմող նյութերը և տրամադրվել կողմերին։

Իր բացատրություններում դիմող կողմը ներկայացնող Լևոն Զուրաբյանը հայտարարեց, որ 2017 թվականի խորհրդարանական ընտրություններն անցել են համատարած խախտումներով, որոնք կրել են համակարգային բնույթ։

Ապա անդրադարձավ նախորդ ընտրութուններին՝ 2003 թվականից սկսած տեղի ունեցած բոլոր՝ թե՛ նախագահական,թե՛ խորհրդարանական ընտրություններին՝ հայտարարելով, թե դրանք ևս անցել են զանգվածցային և համակարգային բնույթ կրող խախտումներով և այսօր ՍԴ-ում ներկայացնելով ապրիլի 2-ի ընտրությունների արդյունքները վիճարկող դիմումը՝ դեժավյու զգացում է ապրում։

Նա նկատեց, որ նախորդ տարիներին ևս քվեարկութան արդյունքները վիճարկող դիմումներ են ներկայացվել ՍԴ, որոնք սակայն մերժվել են մտացածին հիմնավորումներով՝ նշելով, թե դրանք չեն ազդել ընտրությունների արդյունքների վրա։ ՀՀ ՍԴ նախագահ Գագիկ Հարությունյանը նկատեց, որ ՍԴ որոշումը համարժեք է լինում այն հիմնավորումներին, որոնք ներկայացվում են ՍԴ։

Վերադառնալով՝ 2017 թվականի ընտրությունների արդյունքները վիճարկող դիմումին և հիմքերին՝ Լևոն Զուրաբյանն անդրադարձավ ընտրակաշառքի թեմային՝ նշելով, որ այն կրել է զանգվածային բնույթ՝ 10.000 դրամի չափով, թեև, պատգամավորի տեղեկություններով, որոշ տարածքներում ընտակաշառքի չափն ու ձևը որոշ չափով տարբերվել է։

Ըստ նրա՝ համատարած խախտվել է նաև քվեարկության գաղտնիությունը, ճնշումներ են գործադրվել ընտրողների կամքի ազատ արտահայտման նկատմամբ։ Լ.Զուրաբյանի գնահատմամբ՝ ընտրախախտումները կրել են համակագային, զանգվածային բնույթ՝ պետական լծակների օգտագործմամբ։

Որպես հիմնավորում հիշատակվեց դպրոցների և մանկապարտեզների տնօրենների աղմկահարույց ձայնագրությունը, ապա մատնանշեց մեկ այլ աղմկոտ՝ ՍԱՍ-ի ժողովի ձայնագրությունը, որը ևս, ըստ նրա, ապացուցում է ընտրողների կամարտահայտության վրա գործադրված ճնշումները։

Ինչ վերաբերում է ընտրատեղամասերում տեղադրված տեսանկարահանող սարքերին, ապա, դիմումատուի դիտարկմամբ, դրանց աշխատանքներում արձանագրվել են խափանումներ և առաջարկեց ստեղծել հանձնախումբ, որը եռօրյա ժամեկտում կուսումնասիրի բոլոր ընտրատեղամասրի ձայնագրությունները, որի արդյունքների վերաբերյալ տեղեկանք կներկայացնի ՍԴ-ին։

Լ.Զուրաբյանը կասկածահարույց համարեց նաև ընտրությունների մասնակիցների թիվը՝ հայտարարելով, որ ընտրողների թիվը չի համապատասխանում ժողովրդագրական, մասնավորապես՝ արտագաղթի տվյալներին։ Ըստ նրա՝ բարձր մասնակության նման թիվ բնորոշ է բռնապետական պետություններին։

Լուսանկարը՝ Ֆոտոլուրի

Աղբյուր` Փաստինֆո