Փաստ ինֆո

Անկախ արդյունքներից Երևանի ավագանու թվով 65 մանդատներ կբաշխվեն ընտրություններին մասնակցող «ԵԼՔ» կուսակցությունների դաշինքի, «Երկիր ծիրանի» կուսակցության և Հայաստանի Հանրապետական կուսակցությանը միջև: Իրավական պարզաբանում է ներկայացնում փաստաբան Նորայր Նորիկյանը:

Պարզաբանումը ներկայացնում ենք ամբողջությամբ.

ՀՀ Ընտրական օրենսգրքի 144-րդ հոդվածի 3-րդ մասի համաձայն՝ Մինչև 2017 թվականի սեպտեմբերի 1-ը նշանակվող՝ համայնքի ղեկավարի և ավագանու անդամների ընտրությունները կազմակերպվում և անցկացվում են 2011 թվականի մայիսի 26-ի Ընտրական օրենսգրքի կանոնակարգումներին համապատասխան:

Սա նշանակում է, որ Երևանի ավագանու ս.թ. մայիսի 14-ին կայանալիք ընգտրությունները անցկացվելու են 2011թ. մայիսի 26-ի Ընտրական օրենսգրքի կանոնակարգումներին համապատասխան:

Վերը նշված օրենսգրքի 165-րդ հոդվածի 3-րդ կետի համաձայն՝ …Եթե Երևանի ավագանու ընտրությանը մասնակցում է մինչև 3 կուսակցություն, կուսակցությունների դաշինք, ապա մանդատների բաշխմանը մասնակցում են բոլոր կուսակցությունները, կուսակցությունների դաշինքները:

Երևանի ավագանու առաջիկա ընտրություններին մասնակցում են թվով երեք կուսկացություն և կուսկացությունների դաշինք՝ «Ելք» կուսակցությունների դաշինքը, «Երկիր Ծիրանի» կուսակցությունը և Հայաստանի Հանրապետական կուսակցությունը: Սա նշանակում է, որ նշված երեք ուժերի միջև էլ կբաշխվեն Երևանի ավագանու թվով 65 մանդատները:

Նշված օրենսգրքի 165-րդ հոդվածի 4-րդ և 5-րդ կետերի համաձայն՝

Երևանի ավագանու անդամների մանդատները բաշխվում են կուսակցությունների, կուսակցությունների դաշինքների ընտրական ցուցակների միջև՝ նրանցից յուրաքանչյուրին կողմ քվեարկված քվեաթերթիկների թվին համամասնորեն: Յուրաքանչյուր ընտրական ցուցակին հասանելիք մանդատների թվի հաշվարկը կատարվում է հետևյալ կերպ. յուրաքանչյուր ընտրական ցուցակին կողմ քվեարկված քվեաթերթիկների թիվը բազմապատկվում է ընտրական ցուցակներին հասանելիք մանդատների թվով, արդյունքը բաժանվում է մանդատների բաշխմանը մասնակցող ընտրական ցուցակներին կողմ քվեարկված քվեաթերթիկների ընդհանուր թվի վրա, և առանձնացվում են ամբողջ թվերը, որոնք յուրաքանչյուր կուսակցության, կուսակցությունների դաշինքի ընտրական ցուցակին հասանելիք մանդատների թվերն են:

Եթե սույն մասով սահմանված կարգով մանդատների բաշխման արդյունքով կուսակցություններից, կուսակցությունների դաշինքներից մեկը ստանում է տեղերի 40 տոկոսից ավելին, սակայն ոչ բացարձակ մեծամասնությունը, ապա տեղերի բացարձակ մեծամասնությունը տրվում է այդ կուսակցությանը, կուսակցությունների դաշինքին: Եթե տեղերի 40 տոկոսից ավելին ստանում են երկու կուսակցություն, կուսակցությունների դաշինք, սակայն ոչ բացարձակ մեծամասնությունը, ապա տեղերի բացարձակ մեծամասնությունը տրվում է այն կուսակցությանը, կուսակցությունների դաշինքին, որը ստացել է առավել թվով մանդատներ: Մնացած մանդատները բաշխվում են մանդատների բաշխմանը մասնակցելու իրավունք ստացած մյուս կուսակցությունների, կուսակցությունների դաշինքների ընտրական ցուցակների միջև:

Մնացած մանդատներն ընտրական ցուցակների միջև բաշխվում են ըստ մնացորդների մեծության հերթականության՝ յուրաքանչյուրին մեկական մանդատ սկզբունքով: Մնացորդների մեծության հավասարության դեպքում վիճարկվող մանդատը տրվում է այն ընտրական ցուցակին, որին կողմ քվեարկված քվեաթերթիկների թիվն ամենամեծն է, իսկ դրանց հավասարության դեպքում հարցը լուծվում է վիճակահանությամբ:

Աղբյուր` Փաստինֆո