Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանում այսօր վերջապես սկսվեց Նուբարաշենի խճուղում 58-ամյա Եղիշե Խաչատրյանի սպանության գործով դատաքննությունը:

Մինչ այդ այսօր դատարանը վերանայեց իր որոշումը և թույլատրեց լրատվամիջոցներին տեսանկարահանում և լուսանկարահանում իրականացնել առանց ժամանակի սահմանափակման, սակայն առանց լուսարձակման և ձայնային էֆեկտների:

Նախագահող դատավորը ներկաներին տեղեկացրեց, որ դատարան է ստացվել Հատուկ քննչական ծառայությունից գրություն, որով դատարանին հայտնել են, որ գործով պաշտպանության միջոց կիրառված վկա Արմեն Վաչագանի Սարգսյան կեղծանվամբ, հաղորդում է ներկայացրել ՀՔԾ՝ իր նկատմամբ իրավապահ մարմինների աշխատակիցների կողմից ենթադրաբար կատարված ոչ իրավաչափ գործողությունների վերաբերյալ:

Այս կապակցությամբ ՀՔԾ-ում հարուցվել է քրեական գործ:

Գրությամբ նաև ՀՔԾ-ից դատարանին հայտնել էին, որ վկան «shamshyan.com» կայքի միջոցով տեղեկություն է տարածել և բացահայտել իր ինքնության վերաբերյալ տվյալները:

Այս կապակցությամբ դատարանը դատավարության մասնակիցների կարծիքը հարցրեց, թե արդյոք նպատակահարմա՞ր է հետագայում ևս շարունակել պահպանել նրա պաշտպանության միջոցը: Տուժողի իրավահաջորդի ներկայացուցիչ փաստաբան Ինեսսա Պետրոսյանը կարծիք հայտնեց, որ պետք է շարունակել պահպանել:

Հարցի վերաբերյալ պաշտպանական կողմն այլ կարծիք ուներ: Ամբաստանյալ Արարատ Նիկողոսյանի պաշտպան Լիպարիտ Սիմոնյանը նշեց, որ քանի որ վկան բացահայտել է իրեն, հետևաբար անհրաժեշտությունը չկա փակ վկայի կարգավիճակում նրան պահելու: Պաշտպանը կրկին անգամ միջնորդեց իրենց տրամադրել վկայի վերաբերյալ գործում առկա նյութերը՝ դրանց ծանոթանալու և արդյունավետ պաշտպանություն իրականացնելու նպատակով:

Գործով մյուս ամբաստանյալների պաշտպանները համակարծիք էին փաստաբան Լիպարիտ Սիմոնյանի հետ:

Ամբաստանյալ Արտաշես Չիչոյանի պաշտպան Երեմ Սարգսյանն էլ կարծիք հայտնեց՝ եթե դատարանի համար կարևոր է, որ պաշտպանական կողմը կարողանա օգտվել իր իրավունքներից և արդյունավետ պաշտպանություն իրականացնել, իսկ դատարանն էլ արդար դատաքննություն ապահովվի, ապա այս տվյալից հետո, որը դատարանը ստացել է, անմիջապես պետք է վերացվի վկայի նկատմամբ պաշտպանության միջոցը և նյութերը տրամադրվի պաշտպանական կողմին:

Քանի որ վկան խոչընդոտել է իր նկատմամբ կիրառված պաշտպանության միջոցի կիրառմանը, կատարել է գործողություններ, որոնք բովանդակազրկում են կիրառված պաշտպանության միջոցը, հետևաբար դատարանը որոշեց դադարեցնել վկայի նկատմամբ կիրառված պաշտպանության միջոցը և վկայի ցուցմունքները տրամադրել պաշտպանական կողմին:

Սակայն դատարանը նշեց, որ առանձնացված նյութերում նաև առկա է ձայնագրությունը, որը փաթեթավորված և կնքված է: Այս ապացույցի վերաբերյալ դատարանն ասաց, որ այս պահին դա չի կարող տրամադրվել կողմերին, քանի որ պետք է հետազոտվի դատական նիստի կարգով՝ ապացույցների հետազոտման ժամանակ:

Սակայն պաշտպան Երեմ Սարգսյանը պնդեց իր միջնորդությունը՝ վկային վերաբերող փաստաթղթերն անհրաժեշտ են ամբողջությամբ և եթե մեկ փաստաթուղթ չտրամադրվի, ապա իրենք պաշտպանությունը լիարժեք իրականացնել չեն կարող:

Նշենք, որ փաստաթուղթը, որը դատարանը չէր ցանկանում տրամադրել պաշտպանական կողմին, վկայի հարցաքննության ձայնագրությանն էր վերաբերում: Ուստիև՝ պաշտպանը պնդեց, որ նյութեր ամբողջությամբ տրամադրվեն իրենց, քանի որ չտրամադրելու դեպքում կխախտվի կողմեր հավասարության և պաշտպանության իրավունքը:

Դատարանը որոշեց պաշտպանության կողմին տրամադրել վկայի վերաբերյալ բոլոր նյութերը:

Այսպիսով, դատարանն անցավ դատաքննության, սակայն մինչ մեղադրող դատախազը հրապարակում էր մեղադրական եզրակացության եզրափակիչ մասը, տուժողի իրավահաջորդ լեզվաբան Փառանձեմ Մեյթիխանյանը դատական նիստերի դահլիճը լքեց, նրան հաջորդեց դուստրը: Կարճ ժամանակ անց, երբ լեզվաբանը վերադարձավ դահլիճ, նրա ձեռքին կար պոլիմերային շիշ, որով նա հարվածեց ամբաստանյալ Յուրի Հակոբյանի գլխին, ապա հանգիստ եկավ և նստեց դահլիճում իր համար նախատեսված աթոռին:

Տուժողի իրավահաջորդի վարքագիծն ամբաստանյալների հարազատների զայրույթն առաջացրեց, դահլիճում փոխադարձ վիրավորանքներ և հայհոյանքներ հնչեցին: Յուրի Հակոբյանի մայրը տուժողի իրավահաջորդի պահվածքի վերաբերյալ ասաց, որ դեռ հերիք չէ, որ այսքան ժամանակ որդին անօրինական պահվում էկալանքի տակ, դեռ լեզվաբանը նման պահվածք է դրսևորում և որդուն հարվածում է: Ամբաստանյալի մայրը մեղադրող դատախազների ուշադրությունը հրավիրեց տեղի ունեցածին:

Այս իրարանցման մեջ դատական նիստերի դահլիճից հեռացվեցին ամբաստանյալները, և մինչև կարգադրիչները ներկաներին հանդարտեցնում էին, նկատեցինք, որ դատավորը դահլիճը լքել էր, առանց որևէ բառ ասելու:

Աղբյուր` Փաստինֆո