Փաստ ինֆո

«Ընդդեմ իրավական կամայականության» ՀԿ-ն՝ կազմակերպության նախագահ Մ.Արամյանի ստորագրությամբ, հաղորդում է ներկայացրել ՀՀ գլխավոր դատախազին՝ խնդրելով անհապաղ միջոցներ ձեռնարկել ակնհայտ հանցագործություն կատարած դատախազի նկատմամբ` հարուցել քրեական գործ և ենթարկել պատասխանատվության: Այս մասին «Փաստինֆո»-ին հայտնեց «Սասնա Ծռեր»-ի գործով մեղադրյալ, Արայիկ Խանդոյանի պաշտպան, հիշյալ ՀԿ փաստաբան Արա Ղարագյոզյանը:

Միաժամանակ ՀԿ-ն խնդրում է հանցագործության մասին ներկայացված հաղորդումը չուղարկել ՀՀ հատուկ քննչական ծառայություն, քանի որ վերջինս Արայիկ Խանդոյանի նկատմամբ իրականացնում է քրեական հեետապնդում և ՀՀ հատուկ քննչական ծառայությունը օբյեկտիվ բազմակողմանի և լրիվ քննության չի կարող իրականացնել:

Հաղորդման մեջ նշվում է, որ «Ընդդեմ իրավական կամայականության» հասարակական կազմակերպությունն իր կանոնադրական խնդիրների շրջանակներում անվճար իրավաբանական օգնություն է տրամադրում Խոշտանգման և վատ վերաբերմունքի արժանացած անձանց: Մասնավորապես, ՀԿ-ի փաստաբան Արա Ղարագյոզյանը իրականացնում է Արայիկ Խանդոյանի շահերի պաշտպանությունը:

04.04.2017 թ Վերաքննիչ քրեական դատարանում նախագահությամբ դատավոր Ա.Խաչատրյանի, շարունակվում էր, Արայիկ Խանդոյանի պաշտպանների կողմից բերված վերաքննիչ բողոքի քննությունը: Արայիկ Խանդոյանի հեռախոսային խոսակցությունների ու տեսակցությունների արգելքի դեմ պաշտպանական կողմի վերաքննիչ բողոքի քննության ժամանակ Արայիկ Խանդոյանը՝ տեսնելով, որ նիստը դռնփակ է անցկացվում, բորբոքվել է և ագրեսիվ պահվածք դրսևորել: Արայիկ Խանդոյանը՝ դիմելով դատախազին ու քննչական խմբի ղեկավարին, հայտարարել է որ «Ես չեմ ուզում ձեզ տեսնել, քանի որ դուք եք սպանել իմ եղբորս՝ Հաց բերողին»:

Դատախազն ի պատասխան սեռական բնույթի հայհոյանքներ է ուղղել Արայիկ Խանդոյանի մոր հասցեին: Այդ պահին նիստերի դահլիճում ներկա են եղել նախագահող դատավորը, նիստերի քարտուղարը, Արայիկ Խանդոյանը, Արայիկ Պապիկյանը, Արա Ղարագյոզյանը և այլ անձինք:

«Որքան էլ սխալ ձևով իրեն դրսևորեր Ա.Խանդոյանը, դատախազը պարտավոր է զսպվածություն ցուցաբերեր, այլ ոչ թե դառնար իրավախախտ: Նման դատախազը չպետք է տեղ ունենա դատախազության համակարգում»,- նշվում է հաղորդման մեջ, որի մեջ մեջ է բերվում ՀՀ քրեական օրենսգրքի 343-րդ (Դատարանի նկատմամբ անհարգալից վերաբերմունքը) 2-րդ մասը, որը քրեական պատասխանատվություն է նախատեսում դատարանի նկատմամբ անհարգալից վերաբերմունքի համար, որը դրսևորվել է դատավարությանը մասնակցող անձանց վիրավորելով:

Ըստ ՀԿ-ի, դատախազը անհարգալից վերաբերմունք է դրսևորել ինչպես դատարանի նկատմամբ, այնպել էլ դատավարության մասնակիցների նկատմամբ, սեռական բնույթի հայհոյանքներ ուղղելով Ա.Խանդոյանի մոր հասցեին:

Աղբյուր` Փաստինֆո