Փաստ ինֆո

ՀՀ ԱԱԾ քննչական մարմնի կողմից քննված՝ տրանսպորտային միջոցների տեխնիկական զննության կեղծ կտրոնների վերաբերյալ աղմկահարույց գործն արդեն դատարանում է: Այն մակագրվել է դատավոր Արմեն Բեկթաշյանին: Գործով մեղադրվում է վեց անձ:

«Դատալեքս» տեղեկատվական համակարգից տեղեկանում ենք, որ, ըստ մեղադրանքի, Արտյոմ Գալստյանը, ունենալով «HEIDELBERG GTO 52» մոդելի պոլիգրաֆիական տպագրության համար նախատեսված սարքավորում և զբաղվելով ապօրինի տպագրությամբ, ինչպես նաև տեղեկացված լինելով Հրաչ Մանգասարյանի կողմից խարդախության եղանակով` տրանսպորտային միջոցների տեխնիկական զննության կեղծ կտրոնների այլ անձանց իրացման միջոցով միասնական դիտավորությամբ առանձնապես խոշոր չափերով գումարների հափշտակությունը կազմակերպելու մտադրության մասին, 2015թ. սեպտեմբեր և դեկտեմբեր ամիսներին վերջինիս հետ հանցավոր համաձայնության է եկել` նշված գործունեությանն օժանդակելու վերաբեյալ, և տպագրելով տրանսպորտային միջոցների տեխնիկական զննության կտրոնների 1.200 կեղծ ձևաթուղթ, դրանք փոխանցել է Հրաչ Մանգասարյանին, յուրաքանչյուրի համար ստանալով պայմանավորված 1.000 ՀՀ դրամ գումարը:

Այնուհետև այն իրագործելով՝ ՀՀ տարբեր մարզերում խաբեության եղանակով պատճառել է առանձնապես խոշոր չափերի, նվազագույնը 10.650.000 ՀՀ դրամ գույքային վնաս:

Ըստ Սամվել Բարխոյանին առաջադրված մեղադրանքի՝ «նա հանդիսանալով «Վիկտորիա-Արման» ՍՊԸ տրանսպորտային միջոցների տեխնիկական զննության կայանի աշխատակից, շահադիտական դրդումներով, իրավունք վերապահվող և պատասխանատվությունից ազատող պաշտոնական փաստաթղթերի` տրանսպորտային միջոցների տեխնիկական զննության կեղծ կտրոնների իրացմամբ` օրինական կերպ կտրոններ ձեռք բերելու համար դիմած քաղաքացիներից, առանձնապես խոշոր չափերով` ընդհանուր 7.046.750 ՀՀ դրամի»:

Ըստ Սարգիս Հակոբյանին առաջադրված մեղադրանքի, նա՝ հանդիսանալով «Դավիթ և Էլինա» ՍՊԸ տրանսպորտային միջոցների տեխնիկական զննության կայանի աշխատակից, շահադիտական դրդումներով, տրանսպորտային միջոցների տեխնիկական զննության կեղծ կտրոնների իրացմամբ` օրինական կերպ կտրոններ ձեռք բերելու համար դիմած քաղաքացիներից խաբեության եղանակով հափշտակություն կատարելու վերաբերյալ նախնական համաձայնության գալով Դավիթ Մնացականյանի հետ, ձեռք են բերել կեղծ կտրոններ՝ հափշտակելով ստացված ընդհանուր 612.375 ՀՀ դրամ գումարը, ինչի հետևանքով պետությանը պատճառվել է նույն` խոշոր չափերի գույքային վնաս:

Ըստ մեղադրանքի՝ Արտյոմ Օրդուխանյանը շահադիտական դրդումներով, տրանսպորտային միջոցների տեխնիկական զննության կեղծ կտրոնների իրացմամբ օրինական կերպ կտրոններ ձեռք բերելու համար դիմած քաղաքացիներից խաբեության եղանակով հափշտակել է 887.500 ՀՀ դրամ գումար, ինչի հետևանքով պատճառվել է խոշոր չափերի գույքային վնաս:

Իսկ Արմեն Օրդուխանյանը մեղադրվում է այն բանի համար, որ «նա տեղեկացված լինելով, որ Արտյոմ Օրդուխանյանը ցանկություն ունի շահադիտական դրդումներով, տրանսպորտային միջոցների տեխնիկական զննության կեղծ կտրոնների իրացմամբ` օրինական կերպ կտրոններ ձեռք բերելու համար դիմած քաղաքացիներից խաբեության եղանակով հափշտակություն կատարելու եղանակով պետությանը պատճառել է խոշոր չափերի` նվազագույնը 887.500 ՀՀ դրամ գույքային վնաս»:

Արտյոմ Գալստյանին մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով՝ Փաստաթղթեր կեղծելը, իրացնելը կամ օգտագործելը, 38-178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախությանն օժանդակելը, 38-184-րդ հոդվածի 2-րդ մասի 1-ին կետով՝ առանձնապես խոշոր չափերի վնաս պատճառելով՝ խաբեության կամ վստահությունը չարաշահելու եղանակով գույքային վնաս պատճառելուն օժանդակելը:

Սամվել Բարխոյանին մեղադրանք է առաջադրվել ՀՀ քրեական օրենսգրքի 34-178-րդ հոդվածի 3-րդ մասի 1-ին կետով՝ առանձնապես խոշոր չափերով խարդախության փորձ, 38-184-րդ հոդվածի 2-րդ մասի 1-ին կետով:

Սարգիս Հակոբյանին և Դավիթ Մնացականյանին մեղադրանք է առաջադրվել ՀՀ քրեական օրենսգրքի 178-րդ հոդվածի 2-րդ մասի 1-ին և 2-րդ կետերով՝ մի խումբ անձանց կողմից նախնական համաձայնությամբ խոշոր չափերով խարդախություն կատարելը, 38-184-րդ հոդվածի 2-րդ մասի 2-րդ կետով՝ մի խումբ անձանց կողմից նախնական համաձայնությամբ կատարված խաբեության կամ վստահությունը չարաշահելու եղանակով գույքային վնաս պատճառելուն օժանդակելը:

Արտյոմ Օրդուխանյանին մեղադրանք է առաջադրվել ՀՀ քրեական օրենսգրքի 325-րդ հոդվածի 1-ին մասով, 34-184-րդ հոդվածի 1-ին մասով՝ խաբեության կամ վստահությունը չարաշահելու եղանակով գույքային վնաս պատճառելու փորձ:

Արմեն Օրդուխանյանին մեղադրանք է առաջադրվել ՀՀ քրեական օրենսգրքի 38-325-րդ հոդվածի 1-ին մասով՝ Փաստաթղթեր կեղծելուն, իրացնելուն կամ օգտագործելուն օժանդակելը, 38-34-184-րդ հոդվածի 1-ին մասով՝ խաբեության կամ վստահությունը չարաշահելու եղանակով գույքային վնաս պատճառելու փորձին օժանդակելը:

Մեղադրյալներից երեքի նկատմամբ ընտրվել է խափանման միջոց կալանավորումը, իսկ երեքի նկատմամբ՝ չհեռանալու մասին ստորագրությունը:

Աղբյուր` Փաստինֆո