Փաստ ինֆո

Երևանի Մաշտոցի պողոտայում աղմկահարույց ծեծռտուքի գործով ամբաստանյալ Գարիկ Բաբախանյանը օրերս ինքնասպանության փորձ է կատարել և գտնվում է «Դատապարտյալների հիվանդանոց»-ում: Այս մասին տեղեկացանք ամբաստանյալի պաշտպան, փաստաբան Վարդան Զուռնաչյանից:

Պաշտպանի ունեցած տեղեկություններով, ամբաստանյալը խմել է բարձր դոզայով, ըստ ամենայնի, քնաբեր դեղ, ընկել կոմայի մեջ, երեք օր անգիտակից վիճակում է եղել, հիմա դեռևս հիվանդանոցում է: Ըստ ամբաստանյալի՝ ինքն ինքնասպանության փորձ է կատարել:

Ավելի վաղ ամբաստանյալը դատարանում ինքնավնասման փորձ էր կատարել, որը կանխվել է դատական կարգադրիչների կողմից: Ըստ պաշտպանի, հաշվի առնելով, որ ամբաստանյալը փորձում էր կտրել երակները, «դա նույնպես կարող ենք դիտել ինքնասպանության փորձ»,- ասաց Վարդան Զուռնաչյանը:

Ի դեպ, գործով այսօրվա նիստը տեղի չունեցավ, Գ.Բաբախանյանը մեկ ժամից ավելի ուշացումով պետք է հասցվեր դատարան հիվանդանոցից, սակայն բացի նրանից չէին ներկայացել նաև մեկ այլ ամբաստանյալի պաշտպանը և վկան, այդ պատճառով դատական նիստը տեղի չունեցավ և հետաձգվեց:

Հիշեցնենք, որ ըստ գործի տվյալների, 2015թ. սեպտեմբերի 19-ի առավոտյան ժամը 06.30-ի սահմաններում ԱԺ պատգամավոր Գուրգեն Արսենյանը իրեն պատկանող «Լեքսուս» մակնիշի ավտոմեքենայով անցնում էր Մաշտոցի պողոատայով, չհասած Պողոտայի ու Թումանյան փողոցի խաչմերուկին նկատել էր, թե ինչպես մի խումբ անձինք ֆիզիկական բռնության են ենթարկում գետին տապալված մեկին:

Պատգամավորը փորձել է միջամտել, սակայն ինչպես նշել էր Գ.Արսենյանն իր ցուցմունքում, հակառակ կողմն անցել է անթույլատրելի լեքսիկոնի, այն է՝ հայհոյանքների, ապա գործի են դրվել բռունցքները, ապա նաև դանակը, ինչի հետևանքով պատգամավորի օգնականը վնասվածքներ էր ստացել:

Հիշեցնենք, որ գործով ամբաստանյալները չորսն են՝ ամբաստանյալ Անդրանիկ Գաբրիելյանին մեղադրանք է առաջադրվել ՀՀ քրեական օրենսգրքի 176-րդ հոդվածի երկրորդ մասի 1-ին և 4-րդ կետերով՝ մի խումբ անձանց կողմից նախնական համաձայնությամբ կատարված կողոպուտ, որը զուգորդվել է կյանքի կամ առողջության համար ոչ վտանգավոր բռնություն գործադրելով, 258-րդ հոդվածի 4-րդ մասով՝ զենքի կամ որպես զենք օգտագործվող առարկաների գործադրմամբ խուլիգանություն, 34-104-րդ հոդվածի 2-րդ մասի 2-րդ կետ՝ ծառայողական գործունեության կամ հասարակական պարտքի կատարման հետ կապված սպանության փորձ:

Գարիկ Բաբախանյանը մեղադրվում է ՀՀ քրեական օրենսգրքի 176-րդ հոդվածի 1-ին մասով, նույն հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով՝ մի խումբ անձանց կամ կազմակերպված խմբի կողմից կատարված խուլիգանություն, որը զուգորդվել է հասարակական կարգի պահպանություն իրականացնող կամ հասարակական կարգի խախտումը խափանող անձին դիմադրություն ցույց տալով:

Հակոբ Բոյաջյանին մեղադրանք է առաջադրվել ՀՀ քրեական օրենսգրքի 176-րդ հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով, իսկ Սամվել Սաֆարյանը՝ ՀՀ քրեական օրենսգրքի 176-րդ հոդվածի 2-րդ մասի 1-ին և 4-րդ կետերով, 258-րդ հոդվածի 3-րդ մասի 1-ին և 2-րդ կետերով:

Տեսանյութը՝ Armlur.am-ի

Աղբյուր` Փաստինֆո