Փաստ ինֆո

Էրեբունի և Նուբարաշեն վարչական շրջանների ընդհանուր իրավասության դատարանը, նախագահությամբ դատավոր Արտուշ Գաբրիելյանի, այսօր մերժեց 6 տարի 6 ամիս ժամկետով ազատազրկման դատապարտված պահեստազորի գնդապետ Վոլոդյա Ավետիսյանի վաղաժամ ազատ արձակելու վերաբերյալ պաշտպանի բողոքը:

Ավելի վաղ տեղեկացրել էինք, որ Վոլոդյա Ավետիսյանի պաշտպան Արաքս Մելքոնյանը, նախորդ նիստին ներկայացնելով բողոքը, նշել էր, որ Վոլոդյա Ավետիսյանը 6 անգամ ներկայացվել է պատժից պայմանական վաղաժամկետ ազատ արձակման և ըստ ՔԿՀ-ի պատիժը կրելու կարիք այլևս չունի:

«Ինչո՞ւ ենք մենք առանց որևէ նպատակի անձին պահում անազատության մեջ, եթե դրա կարիքը այլևս չկա և պատժի նպատակը կատարվել է և իմ պաշտպանյալը ուղղված է, ապա որն է նպատակը նրան անազատության մեջ պահելու»,- նշել էր փաստաբանը դատարանին խնդրելով քննել իր դիմումը և Վոլոդյա Ավետիսյանին վաղաժամկետ ազատ արձակել:

Հիշեցնեք, որ Վոլոդյա Ավետիսյանը բաց նամակով դիմել էր ՀՀ գլխավոր դատախազ Գ.Կոստանյանին, ՀՀ արդարադատության նախարար Ա. Հովհաննիսյանին, ՀՀ Մարդու իրավունքների պաշտպան Ա. Թաթոյանին, ՀՀ ԱԺ մի շարք պատգամավորների և ՀՔԱ Վանաձորի գրասենյակի նախագահ Ա. Սաքունցին, որում մասնավորապես նշվում էր, որ ի թիվս այլ իրավունքների, Ավետիսյանը և մյուս ազատազրկված անձինք զրկված են նաև պայմանական վաղաժամկետ ազատ արձակվելու և բաց ռեժիմին անցնելու իրավունքներից:

Նրանք իրենց դժգոհությունը հայտնելով բաց նամակում պահանջե են, որ օրենսդրությանը համապատասխան միջոցներ ձեռնարկվեն իրենց իրավունքները վերականգնելու ուղղությամբ՝ նամակում նշված խնդիրների լուծման ուղղությամբ, ինչպես նաև՝ հանդիպում բաց նամակի հասցեատերերի հետ:

Հիշեցնենք նաև, որ պահեստազորի գնդապետը մեղավոր էր ճանաչվել ՀՀ քրեական օրենսգրքի 34-178-րդ հոդվածի 2-րդ մասի 5-րդ կետով և 178-րդ հոդվածի 2-րդ մասի 2-րդ և 5-րդ կետերով՝ դատապարտվելով 6 տարվա ազատազրկման:

Լուսանկարը՝ Ֆոտոլուրի

Աղբյուր` Փաստինֆո