Փաստ ինֆո

Հենրիկ Բարսեղյանի վերաբերյալ սպանության փորձի գործով առաջին դատական նիստը հետաձգվեց՝ մեղադրողի բացակայության պատճառով:

Մեղադրող Տիգրան Ենոքյանը տեղեկացրել էր դատարանին (նախագահող դատավոր Մեսրոպ Մակյան), որ նախօրոք նշանակված այլ գործով աշխատանքային զբաղվածության պատճառով չի կարող ներկայանալ դատական նիստին և խնդրել էր նիստը հետաձգել:

Նշենք, որ դատավոր Արշակ Վարդանյանի վարույթում քննվում է նույն դեպքին առնչվող մեկ այլ՝ ամբաստանյալ Արման Մարջանյանի վերաբերյալ գործը:

Նույն դեպքին վերաբերվող երկու գործերը կքննվեն առանձին

Երկու ամբաստանյալների պաշտպանությունն էլ նույն փաստաբաններն են իրականացնում՝ Արման Արզումանյանը, Թադևոս Ալեքսանյանը և Գագիկ Խաչիկյանը:

Պաշտպանական կողմն ավելի վաղ, Արման Մարջանյանի գործի քննության շրջանակներում միջնորդել էր այդ և դատարան նոր մուտք գործած՝ Հենրիկ Բարսեղյանի վերաբերյալ, գործերը մեկ վարույթում միավորել ու քննել միասին:

Ըստ պաշտպանական կողմի, Հ.Բարսեղյանի վերաբերյալ գործը Ա.Մարջանյանի գործի անքակտելի մասն է՝ երկու ամբաստանյալներն էլ նույն ենթադրյալ հանցագործությունը կատարելու մեջ են մեղադրվում:

Հ.Բարսեղյանի ու Ա.Մարջանյանի մեղադրանքի հիմքում ընկած դեպքի ժամանակ հրազենով վնասվածքներ են պատճառվել չորս հոգու և տուժողների դիմադրությանը հանդիպելու պատճառով հանցագործությունն ավարտին չի հասցվել:

Հ.Բարսեղյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասի 1-ին և 7-րդ կետով՝ մի խումբ անձանց կամ կազմակերպված խմբի կողմից երկու կամ ավելի անձանց սպանության փորձ, 235-րդ հոդվածի 1-ին մասով՝ ապօրինի կերպ զենք ձեռք բերելը, պահելը, կրելը, և 258-րդ հոդվածի 3-րդ մասի 1-ին կետով՝ մի խումբ անձանց կամ կազմակերպված խմբի կողմից կատարված խուլիգանություն: Առաջին երկու հոդվածներով մեղադրվում է նաև Արման Մարջանյանը:

Ա.Մարջանյանի գործի քննության շրջանակներում դատարանը՝ դատավոր Արշակ Վարդանյանի նախագահությամբ, մերժել էր պաշտպանական կողմի հիշյալ միջնորդությունը: Դատարանի որոշման համաձայն, ինքն իրավասու չէ կայացնել մի որոշում, որը վերաբերվում է մեկ այլ դատավորի վարույթում գտնվող գործին: Բացի այդ, գործերը գտնվում են տարբեր փուլերում, Հ.Բարսեղյանի գործով դեռ դատավարությունը չի սկսվել, իսկ Արման Մարջանյանի գործով ապացույցների 80-85 տոկոսն արդեն իսկ հետազոտված է:

Աղբյուր` Փաստինֆո