Փաստ ինֆո

Տաքսու լիցենզավորման կարգի փոփոխությունները դաշտում ստեղծել են բարձիթողի վիճակ: Մի մասը ընդունում է տվյալ ժամանակահատվածում գործող օրենքը և լիցենզավորվելուց հետո օրինական դաշտում  աշխատում, մուծում  հարկերը, իսկ մյուս մասը՝ բարձիթողի վիճակում տաքսի է վարում՝ չվճարելով հարկեր:

Հայաստանի տաքսի ծառայությունների գործատուների միության նախագահ Վահագն Սահակյանն այսօր լրագրողների հետ հանդիպման ժամանակ նշել է, որ շատերը գործում են անօրինական դաշտում, և ստեղծվում է անհավասար մրցակցային դաշտ՝ ինչն անարդար է:

Վահագն Սահակյանի խոսքով՝ ստեղծված իրավիճակից վերջին ամիսներին օգտվում են ոչ միայն մեր անփույթ, անպատասխանատու, անհատ վարորդներն ու տաքսի ծառայություններ͵ այլև արտասահմանյան կազմակերպություններ՝ «ի դեմս «Յանդեքս» տաքսի ծառայության, ովքեր չգիտես ինչու հերքում են, որ տաքսի ծառայություն են մատուցում՝ հայտարարելով, որ ընդամենն ինտերնետ պրովայդեր են, ը հավելված են տրամադրում͵ ինչի հետ բանախոսը համամիտ չէ։ 

Բանախոսը նշեց, որ տաքսի ծառայությունը լիցենզավորվող և պետության կողմից խիստ վերահսկվող գործունեություն է և երբ տնտեսվարող սուբյեկտներից մեկն օրինական դաշտում է գործում, հարկեր վճարում, իսկ մյուսը չի վճարում, ապա ըմբոստություն է առաջանում:

Անհատ վարորդներ͵ ովքեր տաքսի ծառայություն են մատուցում ամիսներ շարունակ չեն վճարել 12 հազար դրամները, որոշ մարդկանց մոտ սա բողոքի ձև է։

Հայաստանի տաքսի ծառայությունների գործատուների միության նախագահը կարծիք հայտնեց, որ այս գործում մեծ է Տրանսպորտի նախարարության դերակատարումը՝ վերջիններս ամիսներ շարունակ չեն հետևել դաշտին, և չեն տուգանել այն վարորդներին, ովքեր գործում են անօրինական դաշտում, բազմաթիվ խախտումներով գործում է մեծ ընկերություն, որը ոչ մի հարկ չի վճարում պետությանը՝ հայտարարելով, որ տաքսի ծառայություն չէ:

Վահագն Սահակյանը գտնում է, որ եթե «Յանդեքսի» ծառայությունը վճարի հարկերը, ինչպես բոլոր տաքսիները, այսինքն՝ ամսական մոտավորապես 30 հազար դրամ ամեն մեքենայից, ապա նրա խոսքով՝ 600- 700 ՀՀ դրամով երբեք տեղափոխում չի իրականացնի։

Ըստ նրա՝ հավասար պայմանները ենթադրում է͵ որ օրինական դաշտում պետք է աշխատեն բոլորը և հարկեր վճարեն:

Աղբյուր` Փաստինֆո