Փաստ ինֆո

Ոստիականությունում հետաքննություն է սկսվել  Երևանի թիվ 127 ավագ դպրոցի երկու աշակերտների կողմից նախաբազուկները կտրելու դեպքի առթիվ։

«Փաստինֆո»-ն ավելի վաղ տեղեկացրել է͵ որ դպրոցի բակում  10-րդ եւ 11-րդ դասարանների երկու աշակերտ վնասել են նախաբազուկները։ Ըստ նախնական վարկածի՝ դպրոցի տնօրենը բարկացել է 10-րդ դասարանի աշակերտի վրա՝ դպրոցի կողմից տրամադրված գրքերի գումարը չվճարելու համար, ինչից ընկճվելով նույն օրը ժ.10.00-ին՝ դպրոցի բակում դպրոցականը եւ նրա ընկերը  ածելիով վնասել են իրենց ձախ ձեռքերի նախաբազուկները:

 Դպրոցի տնօրեն Նելսիկ Էլոյանին այսօր հրավիրել էին ԿԳՆ: Տնօրենն «Առաջին լրատվական»-ի հետ զրույցում իր վարկածն է ներկայացրել՝ ասելով͵ որ դեռահասները ոչ թե երակներ են կտրել͵ ձեռքերի դրսի մասը՝ «խազել»։

«10-րդ դասարանի աշակերտին դասղեկը բերել է տնօրենի մոտ, քանի որ իրեն լավ չի պահում դասի ընթացքում: Դասագրքի վարձավճարները պետք է բերեին դեռ սեպտեմբերի վերջին, սոցիալապես անապահով ընտանիքներին դպրոցի ընդհանուր վարձավճարների չափով իրավունք ունենք տասը տոկոս զեղչ անել, բայց այս երեխայի հայրն ասել է, որ ինքը կվճարի: Դասղեկն ասել է՝ ծնողիդ ասա գա, որ դասագրքերի գումարը բերի, տղան սկսել է իրեն վատ պահել: Դասղեկը բերեց ինձ մոտ և ասաց, որ իրեն լավ չի պահում, ես էլ ասացի երկուշաբթի օրը ծնողիդ հետ կգաս, հասկանանք՝ ինչու ես քեզ վատ պահում: Սա առաջին դեպքը չէ, այս տղան հիմնական դպրոցը ավարտելուց հետո երկու տարի դպրոց չի հաճախել, հայրը բերել է, ես ընդունել եմ, քանի որ օրենքը թույլ է տալիս, ես ընդունել եմ, որ երեխան դրսում չմնա»,- պատմեց տնօրենը: Երեկ, դպրոց գալով, տնօրենը տեսել է նրան դրսում նստած: Նա տնօրենին ասել է, որ եկել է գործերը վերցնի. «Հարցին՝ հայրդ ո՞ւր է, ասաց՝ աշխատանքի է, չի կարող գալ, հետո պարզվեց, որ տանը ոչինչ էլ չի ասել: Ես ասացի, որ օրենքը արգելում է աշակերտին տալ գործերը, իրավասություն ունի ծնողը կամ նրան փոխարինող անձը: Ասացի՝ գնա, ծնողիդ հետ արի: Մոտ մեկ ժամ անց, դպրոցի տեսուչ-ոստիկանն ասաց, որ այդ տղան և 11-րդ դասարանում սովորող մեկ այլ տղա, որն իր ընկերն է, քանի որ նախորդ դպրոցում միասին են սովորել, դրսում հանդիպել են, ապա ձեռքերը վնասած եկել են դպրոցի բուժկետ մշակելու: Ոստիկանն ասաց, տարեք զբաղվեք նրանցով»,-հավելեց տնօրենը: Դպրոց ներկայացել է միայն 11-րդ դասարանի աշակերտի ծնողը, տնօրենը նրանց բաժին է ուղարկել:

Ձեռքերը խազելու պատճառը եղել է այն, որ 10-րդ դասարանի աշակերտը չի ցանկացել, որ ծնողը դպրոց գա, իսկ թե ինչու է նրան միացել 11-րդ դասարանցին, տնօրենը այդպես էլ չի հասկացել:

Աղբյուր` Փաստինֆո