Փաստ ինֆո

 Վերջին տարիներին հայ-վրացական հարաբերությունները շոշափելի զարգացում են ապրել և առաջ են ընթանում փոխշահավետ համագործակցության ոգով։ Այս մասին ՀՀ ԱԳՆ հաղորդմամբ, հայտարարել է Հայաստանի ԱԳ նախարար Էդվարդ Նալբանդյանը պաշտոնական այցելությամբ Երևան ժամանած Վրաստանի արտաքին գործերի նախարար Միխեիլ Ջանելիձեի հետ բանակցությունների ավարտին:

«Երկու կողմերն էլ պարբերաբար կրկնում են, որ Հայաստանի և Վրաստանի միջև չկան խնդիրներ, կան հարցեր, որոնք համատեղ ջանքերով լուծվում են։ Մեր այսօրվա հանդիպումը ևս դրա ապացույցն էր»,- ընդգծել է Հայաստանի արտաքին քաղաքական գերատեսչության ղեկավարը:

ՀՀ ԱԳ նախարարը նկատել է, որ Միխեիլ Ջանելիձեն մեկ տարի առաջ արտերկրյա առաջին բարձրաստիճան հյուրն էր, «ում ընդունեցինք արտգործնախարարության նոր շենքում»։ Դրանից հետո բազմաթիվ հանդիպումներ են տեղի ունեցել ինչպես Թբիլիսիում, այնպես էլ միջազգային համաժողովների շրջանակներում։

«Պարոն Ջանելիձեի հետ մեր մշտական ինտենսիվ երկխոսությունը հնարավորություն է ընձեռում քննարկելու երկկողմ օրակարգի հարցերի լայն շրջանակ, առաջ մղելու համագործակցության ամրապնդմանն ու խորացմանն ուղղված մեր ջանքերը»,- ասել է Է.Նալբանդյանը՝ անդրադառնալով ներկայիս երևանյան հանդիպման օրակարգին։

Մասնավորապես, հանդիպման ընթացքում անդրադարձ է կատարվել երկու երկրների ղեկավարների միջև ձեռք բերված պայմանավորվածությունների իրականացման ընթացքին։

Ըստ Է.Նալբանդյանի, երկկողմ փոխգործակցության կարևոր բաղադրիչն է տարածաշրջանում կայունության շուրջ շահագրգիռ երկխոսությունը:

Նախարարները գոհունակությամբ արձանագրել են, որ տնտեսական համագործակցությունն առաջընթաց է արձանագրել, արդյունավետ գործունեություն է ծավալում համատեղ միջկառավարական հանձնաժողովը։

Բանակցությունների ընթացքում քննարկվել են առևտրատնտեսական, էներգետիկ, տրանսպորտային ենթակառուցվածքների զարգացման, զբոսաշրջության ոլորտներում համագործակցության ընդլայնմանը վերաբերող բազմաթիվ հարցեր: Անդրադարձ է կատարվել երկու երկրների միջև առկա ընդգրկուն իրավապայմանագրային դաշտի կատարելագործմանը. այսօր այն ներառում է ութ տասնյակից ավելի փաստաթղթեր։

Զրույցի ընթացքում արծարծվել են նաև վիրահայությանը հուզող խնդիրները և դրանց լուծման ուղղությամբ իրականացվող քայլերը։

«Ես վրացի գործընկերոջս տեղեկացրի ղարաբաղյան հիմնախնդրի կարգավորման գործընթացն առաջ մղելու նպատակով համապատասխան պայմանների ստեղծմանն ուղղված ԵԱՀԿ Մինկի խմբի համանախագահների և Հայաստանի համատեղ ջանքերի մասին։ Այս առումով մենք կարևորում ենք Վրաստանի շարունակական աջակցությունը Մինսկի խմբի համանախագահների գործունեությանը»,- նշել է մամուլի համար իր հայտարարության մեջ Էդվարդ Նալբանդյանը՝ հավելելով, որ իր վրացի գործընկերոջ հետ քննարկվել են նաև տարածաշրջանային և միջազգային հրատապ մի շարք խնդիրներ։

Աղբյուր` Փաստինֆո