Փաստ ինֆո

Կաշառք ստանալու համար 8 տարի ժամկետով ազատազրկման դատապարտված Լոռու մարզի ընդհանուր իրավասության դատարանի դատավոր Խաչատուր Խաչատրյանի գործով դատական նիստը հետաձգվեց:

Նիստը նախագահող՝ Վերաքննիչ դատարանի դատավոր Սևակ Համբարձումյանը  տեղեկացրեց, որ ամբաստանվող դատավորի պաշտպան Կարեն Թումանյանից դիմում է ստացվել, առ այն, որ նա վատառողջ է և խնդրել է դատական նիստը հետաձգել:

Խաչատուր Խաչատրյանի մյուս պաշտպան Ռուբեն Հակոբյանն էլ հեռախոսազանգի միջոցով էր դատարանին տեղեկացրել է, որ Սպիտակի ոլորաններում է և մերկասառույցի պատճառով չի կարողանում ճանապարհը հաղթահարել և ներկայանալ նիստին:

Ամբաստանյալի պաշտպանների բացակայության պատճառով դատական նիստը հետաձգվեց և նշանակվեց մայիսի 2-ին:

Հիշեցնենք, որ 2014թ. դեկտեմբերի 25-ին ՀՀ ազգային անվտանգության մամուլի կենտրոնը տեսանյութ էր հրապարակել, որում ներկայացվում էր, որ ծառայության կողմից իրականացված օպերատիվ-հետախուզական միջոցառումների արդյունքում կաշառք ստանալու պահին ձերբակալվել է ՀՀ Լոռու մարզի ընդհանուր իրավասության դատարանի դատավոր Խաչատուր Խաչատրյանը:

Ըստ ԱԱԾ-ի՝ դատավորն իր վարույթում քննվող գործարարի վերաբերյալ քաղաքացիական գործով, նրա օգտին գործողություններ կատարելու համար, պահանջել և ստացել է 20.000 ԱՄՆ դոլար: Ի դեպ, տեսանյութից պարզ էր դառնում, որ դատավորի ցուցումով կաշառք տվող գործարարն ինքն իր ձեռքով է այն դնում գրասեղանի դարակում: Ինքը՝ Խաչատրյանը, գումարին չի դիպչում:

Ավելի ուշ Հատուկ քննական ծառայության կողմից գործի վերաբերյալ հաղորդագրություն տարածվեց որում մասնավորապես նշվում էր, որ 2014թ. հոկտեմբերի 2-ի դրությամբ «Զոսեկար» ՍՊԸ-ի պարտքը բանկի հանդեպ կազմել է շուրջ 517 մլն 940 հազ. ԱՄՆ դոլար, իսկ ՍՊԸ-ի պարտավորությունների կատարումն ապահովված է եղել անշարժ գույքի գրավադրմամբ:

Դատավոր Խաչատրյանը սնանկության հետագա գործընթացում ինչպես իր լիազորությունների շրջանակում հիշյալ ՍՊԸ-ի տնօրեն Ս. Կարապետյանի օգտին գործողություններ կատարելու, այնպես էլ պաշտոնից բխող հեղինակությունն ու ազդեցությունն օգտագործելով, ՍՊԸ-ի վարկային պարտավորությունների կատարումն ապահովելու նպատակով բանկում գրավադրված անշարժ գույքն աճուրդի եղանակով վաճառքի գործընթացը մինչև 2015թ. մարտ երկարաձգելու, այդ կերպ` Ս. Կարապետյանին գրավադրված գույքը ձեռք բերելու հնարավորություն ընձեռելու դիմաց 2014թ. նոյեմբերին նրանից պահանջել է առանձնապես խոշոր չափերով` 10 հազ. ԱՄՆ դոլար կաշառք:

Դատավորի կողմից առանձնապես խոշոր չափերով կաշառք ստանալու պահանջին ՍՊ ընկերության տնօրենը համաձայնել է: Վերջինիս հետ կայացած մյուս հանդիպումների ժամանակ դատավոր Խ. Խաչատրյանը ավելացրել է սահմանված կաշառքի չափը և 2014թ. դեկտեմբերի 20-ին պահանջել ու 2014թ. դեկտեմբերի 25-ին` ժամը 18.30-ի սահմաններում, հիշյալ դատարանի իր աշխատասենյակում Ս. Կարապետյանից անձամբ ստացել է առանձնապես խոշոր չափերով` 9 մլն 186 հազ. ՀՀ դրամին համարժեք 20 հազ. ԱՄՆ դոլար կաշառք, որից անմիջապես հետո տեղում բռնվել է ԱԱԾ աշխատակիցների կողմից:

Խաչատուր Խաչատրյանին մեղադրանք է առաջադրվել ՀՀ քրեական օրենսգրքի 311-րդ հոդվածի 4-րդ մասի 2-րդ և 3-րդ կետերով, և վերջինիս նկատմամբ մինչդատական վարույթում որպես խափանման միջոց ընտրվել է կալանավորումը:

Նշենք նաև, որ առաջին ատյանում մեղադրող դատախազը հիմնավորված համարելով նախկին դատավորին առաջադրված մեղադրանքը միջնորդել էր նրան դատապարտել 9,5 տարի ժամկետով ազատազրկման:

Ավելի վաղ «Փաստինֆո»-ի թղթակցի հետ զրույցում Խաչատուր Խաչատրյանի պաշտպան Ռուբեն Հակոբյանը կարծիք էր հայտնել է, որ իր պաշտպանյալին վերագրվող արարքին սխալ քրեաիրավական գնահատական է տրվել, ուստիև պաշտպանական կողմը առաջին ատյանի դատավճիռը բողոքարկել է վերաքննիչ դատարան պահանջով ամբողջությամբ բեկանել Խաչատուր Խաչատրյանի վերաբերյալ 04.08.2016թ. դատավճիռը և կայացնել նոր, գործն ըստ էության լուծող դատական ակտ` ճանաչել և հռչակելով ՀՀ քր. օր-ի 311-րդ հոդվածի 4-րդ մասով չթույլատրված հանցանքի կատարման մեջ ամբաստանյալ Խաչատուր Խաչատրյանի անմեղությունը:

Իսկ Խաչատուր Խաչատրյանին արդարացնելու հիմքեր չգտնելու դեպքում՝ պատժի մասով բեկանել բողոքարկվող դատական ակտը և նրա նկատմամբ նշանակել համաչափ արդարացի մեղմ պատիժ` տվյալ հոդվածի սանկցիայով սահմանված նվազագույն չափով և կիրառել ՀՀ քրեական օրենսգրքի 70-դ հոդվածի դրույթները`պատիժը պայմանականորեն չկիրառել:

Աղբյուր` Փաստինֆո