Փաստ ինֆո

Գյումրիում Ավետիսյանների ընտանիքի անդամների դաժան սպանության գործով տուժող կողմի քաղհայցն առանց քննության թողնելու Վերաքննիչ դատարանի որոշման դեմ ներկայացված վճռաբեկ բողոքի հետ կապված առայժմ որևիցե նորություն չկա: Այս մասին «Փաստինֆո»-ին հայտնեց տուժողների իրավահաջորդների ներկայացուցիչ, փաստաբան Արամազդ Կիվիրյանը: «Սպասում ենք որոշմանը, չնայած, անկեղծորեն ասած, ենթադրում եմ, որ Վճռաբեկ դատարանը վարույթ չի ընդունի այս գործը»,- ասաց փաստաբանը:

Արամազդ Կիվիրյանը միաժամանակ նշեց, որ Սահմանադրական դատարան դիմելու հիմքեր կան, հնարավոր է, որ տուժող կողմը կդիմի Սահմանադրական դատարան, բնականաբար, նաև հետագայում կքննարկվի Եվրոպական դատարան դիմելու հնարավորությունը:

Արամազդ Կիվիրյանը նշեց նաև, որ իրենց վճռաբեկ բողոքն ավելի վաղ վերադարձվել էր այն պատճառաբանությամբ, որ վճռաբեկ բողոքը չի ուղարկվել տուժողների իրավահաջորդների այլ ներկայացուցիչներին:

Փաստաբանն ընդգծեց, որ Քրեական դատավարության օրենսգրքով սահմանված չէ, որ բողոքը պետք է ուղարկել տուժողների իրավահաջորդների ներկայացուցիչներին: Բացի այդ, պարզաբանեց Արամազդ Կիվիրյանը, քանի որ տվյալ դեպքում ինքն է ներկայացնում տուժողների բոլոր իրավահաջորդներին, իրապես ստացվում է, որ «ես ինքս ինձ եմ ուղարկում իմ ներկայացրած բողոքը»: Սակայն զուտ այն բանի համար, որպեսզի այդ հարցը հետագայում չշահարկվի, բողոքն ուղարկվել է նաև տուժողների իրավահաջորդների մյուս ներկայացուցիչներին և կրկին ներկայացվել վճռաբեկ բողոք, որպեսզի այս հանգամանքը հիմք չհանդիսանա գործը չքննելու համար:

Տուժողների իրավահաջորդների ներկայացուցիչ Արամազդ Կիվիրյանը Վերաքննիչ քրեական դատարան ներկայացրած բողոքում խնդրել էր վերացնել 27.05.2016թ. ներկայացված քաղաքացիական հայցն ընդունելուց հրաժարվելու վերաբերյալ ՀՀ Շիրակի մարզի ընդհանուր իրավասության առաջին ատյանի դատարանի որոշումը և տուժողների իրավահաջորդների քաղաքացիական հայցն ընդդեմ Ռուսաստանի Դաշնության` ոչ նյութական վնասի հատուցման պահանջի մասին, համարել վարույթ ընդունված:
Ռուսաստանի Դաշնության դեմ ներկայացված քաղհայցում տուժողների իրավահաջորդներն ու նրանց ներկայացուցիչները պահանջում են հատուցել կյանքի իրավունքի խախտման հետևանքով հասցված բարոյական վնասը՝ ընդհանուր առմամբ 450 հազար եվրոյի չափով:

Բողոքն առանց քննության թողնելու Վերաքննիչ դատարանի որոշումը Արամազդ Կիվիրյանը բողոքարկել է ՎՃռաբեկ դատարան: Բողոքում փաստաբանը հիմնավորում է, որ տվյալ դատական ակտը ենթակա է բողոքարկման, ընդ որում հենց Սահմանադրական դատարանի կողմից արտահայտված դիրքորոշման հիման վրա:

ՍԴ-ն, մասնավորապես, իր արտահայտած դիրքորոշմամբ սահմանել է, թե որոնք են համարվում բողոքարկվող դատական ակտերը, իսկ որոնք հետաձգված բողոքարկվող դատական այտերը, այսինքն՝ այն դատական ակտերը, որոնք բողոքարկվում են ընդհանուր վճռի կամ դատավճռի հետ միասին:

Մեր հետ հարցազրույցում ավելի վաղ Արամազդ Կիվիրյանը նշել էր, որ ՍԴ որոշման տրամաբանությունից հետևում է, որ առաջին ատյանի հիշյալ որոշումը կարող է բողոքարկվել անմիջականորեն՝ դատարանի մատչելիության սկզբունքին համապատասխան:

Արամազդ Կիվիրյանը միաժամանակ գտել էր, որ քաղաքացիական հայցը քրեական գործի վարույթում պետք է քննվի, քանի որ կա փոխկապակցվածություն քրեական գործի ու քաղաքացիական հայցի միջև և տվյալ դեպքում հենց այդ վարույթում քննելը ավելի ողջամիտ կլիներ՝ արդար դատաքննության իրավունքի տեսակետից:

Աղբյուր` Փաստինֆո