Փաստ ինֆո

2016թ. նոյեմբերի 13-ին Շենգավիթում «Լիա» գեղեցկության սրահում տեղի ունեցած աղմկահարույց սպանության գործով դատավարական հսկողություն իրականացնող դատախազը ցուցում է տվել ձերբակալել չարբախցի Գեղամիկի՝ Պետրոս Իսրայելյանի որդուն Գոռ Իսրայելյանին:

«Փաստինֆո»-ի տեղեկությունները հաստատեցին ՀՀ քննչական կոմիտեից՝ նշելով, որ դատախազը մարտի 27-ին  գրավոր ցուցում  է տվել ՀՀ քրեական օրենսգրքի 104-րդ հոդվածի 2-րդ մասի 7-րդ կետով՝ Գոռ Իսրայելյանին ձերբակալելու մասին, ինչի դեմ քննիչը գրավոր առարկություն է ներկայացրել։ Համամիտ չլինելով դատախազի դիրքորոշմանը՝ քննիչը, այդուհանդերձ, ձերբակալել է Գ.Իսրայելյանին, քանի որ առարկությունը չի կասեցնում ցուցումի կատարումը:

Մինչ վերադաս դատախազը կքննարկեր ձերբակալելու ցուցումի դեմ քննիչի առարկությունները՝ պաշտպանը եւս բողոք է ներկայացրել դատարան եւ դատարանը ձերբակալումը ոչ իրավաչափ է համարել։

Հիշեցնենք, որ ավելի վաղ ձերբակալվել էր նաեւ չարբախցի Գեղամիկի կինը՝ վերջինիս ձերբակալվել էին ծանր հանցագործությունը պարտակելու կասկածանքով, սակայն ավելի ուշ նրան ազատ արձակեցին, քանի որ պարզվեց, որ հիմնակա մեղադրյալը նրա ամուսինն է։

Ավելի վաղ «Փաստինֆո»-ն տեղեկացրել էր, որ 2016 թվականի նոյեմբերի 13-ին  Շենգավիթում գործող «Լիա» գեղեցկության սրահում հնչած կրակոցների հետևանքով 2 անձ է մահացել՝  Գևորգ Ավետիսյանը և Մուշեղ Մուշեղյանը, ևս մեկ անձ՝ Արամ Պետրոսյանը, հրազենային վնասվածք է ստացել կրծքավանդակի աջ հատվածում:

Պարզվել էր նաև, որ Մուշեղ Մուշեղյանը բացի հրազենային վնասվածքից՝  վնասվածք է ստացել որովայնի շրջանում՝ կտրող-ծակող առարկայով հարվածելու հետևանքով:

Դեպքից հետո Քննչական կոմիտեն տեղեկացրեց, որ քրեական գործով ներգրավված է 5 անձ և քննիչը միջնորդություն էր ներկայացրել դատարան՝ բոլոր մեղադրյալների նկատմամբ որպես խափանման միջոց կալանավորումը կիրառելու վերաբերյալ:

 Քրեական գործով մեղադրյալներից երկուսը քրեական հեղինակություններ են` Ալիկ Բանդուրյանը  և Արմեն Գասպարյանը, վերջիններս առավել հայտնի են «Քյավառցի Ալիկ» և «Բդո» մականուններով։

Բանն այն է, որ Չարբախցի Գեղամիկը (Պետրոս Իսրայելյան) սպանված Մուշեղ Մուշեղյանի հետ հարցեր է ունեցել պարզաբանելու և այդ նպատակով վերջինիս կանչել է զրուցելու:

Մեր տեղեկություններով՝ Մուշեղը  եղել է քյավառցի Ալիկի (Ալիկ Բանդուրյան) «զինվորներից» մեկը, սակայն ինչ-ինչ պատճառներով վերջինս կորցրել է վստահությունը և վտարվել է Ալիկի շրջապատից:

Ինչ վերաբերում է դեպքին՝ որին մասնակցել են քրեական հեղինակություններ, սպանված Մուշեղը փորձել էր որպես իրեն երաշխավոր ներգրավել նաև օրենքով գողի, ով սակայն քյավառցի Ալիկի հետ հեռախոսազրույցից հետո հեռացել է, իսկ Մուշեղը մնացել է չարբախցի Գեղամիկի հետ:

Եվ այս ամենից հետո զրույցը թեժացել է, և քրեական հեղինակությունների մասնակցությամբ հարցերի պարզաբանումը ավարտվել երկու անձի սպանությամբ:

Նշենք նաև, որ սպանված Գևորգ Ավետիսյանն էլ  եղել է չարբախցի Գեղամիկի մտերիմը, այստեղ էլ պարզ է դառնում, որ նրա վրա կրակողը եղել է Գեղամիկի հակառակորդներից:

Աղբյուր` Փաստինֆո