Փաստ ինֆո

Վալերի Պերմյակովին Հայաստանի իրավազորությանը հանձնելու հարցով անցկացված խաղաղ երթի առնչությամբ ոստիկանության հայցի ու Արգիշտի Կիվիրյանի հակընդդեմ հայցի գործով հույսեր կան ենթադրելու, որ դատարանը արդար դատական ակտ կկայացնի: Այս մասին «Փաստինֆո»-ի լրագրողին հայտնեց վերլուծաբան, հասարակական գործիչ Արգիշտի Կիվիրյանի ներկայացուցիչ, փաստաբան Արամազդ Կիվիրյանը:

Փաստաբանը պարզաբանեց, որ ի տարբերություն այլ գործերի, այս գործով փաստարկները և դատարանի շատ հետաքրքիր հարցադրումները հույս են ներշնչում, որ դատարանն իրապես ցանկություն ունի վեր հանել իրականությունը և այն փաստական հանգամանքները, որոնք իրականում եղել են:

«Պրոցեսի ընթացքում դատարանի կողմից հնչեցված և՛ մեզ, և՛ ոստիկանությանն ուղղված հարցադրումներն այնիսին էին, որ ես, որպես մասնագետ, կարող եմ ասել, որ դատարանն իրապես խորացել էր այդ գործի մեջ և իրականում ակնկալում եմ դատարանի կողմից արդար դատական ակտ»,- ասաց Արամազդ Կիվիրյանը:

Արգիշտի Կիվիրյանի ներկայացուցիչը հավելեց, որ դատարանի հարցադրումները և դրանց վերաբերյալ հնչեցված պատասխաններն այնպիսին էին, որ «իրապես այլ դատական ակտ ես ուղղակի չեմ պատկերացնում՝ իրավական տեսանկյունից»: Փաստաբանն ակնկալում է, որ Արգիշտի Կիվիրյանի հակընդդեմ հայցը կբավարարվի, և ոչ իրավաչափ կճանաչվեն ոստիկանության գործողությունները:

Վարչական դատարանում՝ դատավոր Ալեքսանդրա Հարությունյանի նախագահությամբ, ոստիկանությունն ընդդեմ Արգիշտի Կիվիրյանի հայցի ու ոստիկանության դեմ Արգիշտի Կիվիրյանի հակընդդեմ հայցի գործով քննությունը շուտով ըստ ամենայնի կավարտվի: Արամազդ Կիվիրյանը նշեց, որ իրենց կողմից նյութերն ամբողջությամբ ներկայացված են:
Ոստիկանությունը ՀՀ վարչական դատարան ներկայացրել է ոստիկանության ծառայողի օրինական պահանջը չկատարելու համար Վարչական իրավախախտումների վերաբերյալ ՀՀ օրենսգրքի 182-րդ հոդվածի հատկանիշներով Արգիշտի Կիվիրյանին վարչական պատասխանատվության ենթարկելու պահանջ:

Իսկ Արգիշտի Կիվիրյանը հակընդդեմ հայցով պահանջում է ոչ իրավաչափ ճանաչել ոստիկանության գործողությունները՝ կապված Գյումրիում Ավետիսյանների ընտանիքի սպանության մեջ մեղադրվող Վալերի Պերմյակովին Հայաստանի իրավազորությանը փոխանցելու պահանջի վերաբերյալ 15.01.2015թ. կազմակերպված հավաքի հետ:

Ինչպես նշեց Արամազդ Կիվիրյանը, ոստիկանությունը հայտարարում է, որ իրենց գործողությունները իրավաչափ են եղել՝ պատճառաբանելով, որ Շիրակի մարզի դատախազության շենքի մուտքը փակելու ցանկություն է եղել: Ընդ որում, կոնկրետ Արգիշտի Կիվիրյանը բերման է ենթարկվել ոստիկանություն՝ նույնիսկ դատախազության շենքի մոտ չհասած:

Ոստիկանությունը տվյալ դեպքում պատճառաբանում է, որ եթե այնտեղ հավաք տեղի ունենար և Արգիշտի Կիվիրյանը գտնվեր այնտեղ, ինքն այնտեղ մուտք կփակեր, կխաթարեր ընդհանուր գործունեությունն և այլն: «Այդ փաստարկը որևէ քննադատության չի դիմանում»,- ասաց Արամազդ Կիվիրյանը: Ըստ նրա, իրենց կողմից ապացույցներ են ներկայացվել առ այն, որ դատախազության շենքն ունի երկու մուտք, այսինքն՝ եթե առաջին մուտքը փակվեր, բնականաբար կգործեր երկրորդը:

«Տվյալ դեպքում մուտք փակելը չի կարող պատճառաբանվել անձին իր խոսքի ազատությունից զրկելով, այդ թվում՝ սահմանափակելով վերջինիս և՛ տեղաշարժի իրավունքը, և՛ փաստացի ազատությունը, որովհետև ի վերջո անձին բերման են ենթարկել: Եվ բացի այդ, ամենակարևորը, ոստիկանությունը նշելով, որ մուտքը փակում էին կամ ցանկություն ունեին մուտքը փակելու, պետք էր այդ առումով ինչ-որ պատճառաբանություն ներկայացներ»: Ըստ փաստաբանի, այդ պնդումն աբսուրդային է, քանի որ հավաքի որևիցե մասնակից մուտք փակելու ցանկություն չի ունեցել:

Արամազդ Կիվիրյանը փաստեց, որ հավաքը տեղի է ունեցել բացառապես Պերմյակովին ՀՀ իշխանությունների իրավազորությանը հանձնելու, այսինքն՝ գործը Հայաստանի իրավասու մարմինների կողմից քննելու հարցը բարձրացնելու համար, և շենքի մուտք փակելու որևէ ցանկություն չի եղել:

Աղբյուր` Փաստինֆո