Փաստ ինֆո

Արաբկիր և Քանաքեռ-Զեյթուն վարչական շրջանների ընդհանուր իրավասության դատարանում այսօր շարունակվեց թոռան կողմից տատի նկատմամբ ավազակությամբ զուգորդված սպանության փորձի գործով դատաքննությունը:

Դատարանում հարցաքննվեց տուժող Սիրանուշ Կարապետյանի հարևանուհին՝ Իրա Շահբեկյանը, ով տուժողի հետ ունեցել է մտերմիկ հարաբերություններ եւ հաճախակի այցելել նրան: Վկայի խոսքով՝ 2015 նոյեմբերի 4-ին հարեւանուհուն այցելել է վերջինիս աղջկա խնդրանքով, ով, անհնագստանալով, որ մայրը չի պատասխանում հեռախոսազանգերին, զանգել էր հարեւանին եւ խնդրել:

Վկան տուժողի դստեր և հարևաններից մեկի հետ գնացել է Սիրանուշ Կարապետյանի տուն, դուռը փակ է եղել և ներս են մտել դռան ապակին հանելու միջոցով, եւ տուժողին հայտնաբերել ննջարանում` անկողնու վրա բերանքսիվայր պառկած, ոտքերը դեպի գետին:

Վկան ասաց, որ երբ տեսել է այդ վիճակում Սիրանուշ տատիկին, անմիջապես դուրս է եկել սենյակից, «տեսել եմ, որ սպանված էր, իսկ թե ով է սպանել, չգիտեմ, դա ինձ համար մութ է, տեսանք այն, ինչ չէինք պատկերացնում, հարգելի ջան»:

Վկան նաև նշեց, որ տատիկի և նրա սպանության փորձի մեջ ամբաստանվող թոռան հարաբերությունները լավ են եղել, թոռը կնոջ և երեխայի հետ որոշ ժամանակ բնակվել են տատիկի հետ: Հարեւանը մի դրվագ հիշեց, ինչը, նրա կարծիքով, լավագույնս է բնութագրում տատի ու թոռան լավ հարարբերությունները. վերջինս դեպքից օրեր առաջ իրենից գումար էր խնդրել՝ 5000 ՀՀ դրամ, եւ այդ մասին ասել էր Սիրանուշ տատին` ասելով, որ չի տվել: Տատը նեղսրտել էր ու լաց եղել` ասելով. «5000 դրամը ի՞նչ էր, որ Արմանիս չես տվել»:

Վկան, տեսնելով, որ Սիրանուշ տատիկը լաց է լինում, շտապել է նրան հանգստացնել` ասելով, որ կատակում է, ոչ թե 5000, այլ 10 000 ՀՀ դրամ է տվել:

Մեղադրող դատախազի այն հարցին, թե տուժողի ննջարան մտնելով ինչ է տեսել` արյան հետքեր, մարմնական վնասվածքներ, վկան ի պատասխան պնդեց, որ Սիրանուշ տատիկին այդ վիճակում տեսնելով՝ անմիջապես ննջարանից դուրս է եկել:

Մեղադրողի մյուս հարցին էլ, թե ննջարանում՝ տուժողի անկողնու վրա, ապակյա կտորներ տեսե՞լ է, թե՝ ոչ, վկան բացասական պատասխան տվեց, սակայն նշեց, որ ննջարանում` սեղանի վրա, փոքր թղթի կտորներ է տեսել, որոնց վրա գրված են եղել անվայել խոսքեր, որոնք արտաբերել նա հրաժարվեց:

Վկայի դատաքննական և նախաքննական ցուցմունքներում առկա էական հակասությամբ պայմանավորված մեղադրող դատախազը միջնորդեց հրապարակել նրա նախաքննական ցուցմունքը՝ հակասության մասը:

Մասնավորապես, նախաքննության ընթացքում վկան հայտնել էր, որ տուժողի անկողնու վրա նկատել է ապակյա կտորներ, «դա այն շշի կտորն էր, որ տարեց տուժողը տաք ջուր էր լցնում մեջը և դնում ոտքերին»:

Այս հակասության վերաբերյալ վկան ասաց, որ չի հիշում նման բան, սակայն համոզվելու համար, որ իր խոսքերից է նախաքննական ցուցմունքը գրվել, դատարանին խնդրեց տեսնել ցուցմունքի վերջում իր կողմից դրված ստորագրությունը, իսկ նայելուց հետո հաստատեց, որ ստորագրություն իրենն է:

Վկան դատարանում նաև նշեց, որ հարցաքննվել է իր տանը, այդ օրն իրենց տուն են գնացել շուրջ երեք տասնյակ ոստիկաններ. «Ձեր օրգաններից մեր տուն էին եկել, մինչև ուշ գիշեր մնացին»:

Ամբաստանյալ Արման Կարապետյանի պաշտպան Վաղինակ Աթոյանը հայտարարեց, որ վկայի նախաքննական ցուցմունքը արժանահավատ չի կարող լինել, քանի որ վկայի ցուցմունքը վերցնելու պահին ոստիկանության աշխատակիցներ են եղել, ինչը, ըստ պաշտպանի, ճնշող հանգամանք է:

Ի պատասխան պաշտպանի այս հայտարարության` վկան ասաց, որ իր վրա ոչ ոք չի կարող ճնշում գործադրել:

Վկայի հարցաքննությունից հետո դատարանը ներկաներին տեղեկացրեց, որ գործով ծանուցագիր է ուղարկվել ևս 2 վկայի և դատարանը ստացել է չպահանջված նշումով գրություն:

Վկա Արմեն Խաչատրյանի վերաբերյալ, ով դատարան է հրավիրվել պաշտպանական կողմի միջնորդությամբ, տուժողի իրավահաջորդը հայտարարությամբ հանդես եկավ` հայտնելով, որ վկան իրենց հարևանն է և ծանուցագիրը ստացել է, ինքն անձամբ տեսել է, սակայն նա պաշտոնապես հրաժարվել է այն ստանալ և գալ դատարան:

Դատարանը, հաշվի առնելով տուժողի իրավահաջորդի հայտարարությունը, վկային բերման ենթարկելու որոշում կայացրեց:

Այսօր արդեն երկրորդ անգամ հրապարակվեց մեղադրական եզրակացության եզրափակիչ մասը, ըստ որի՝ Արման Կարապետյանը 04.11.2015թ. ժամը 18։00-ի սահմաններում գնացել է իր տատի՝ Սիրանուշ Կարապետյանի տուն և ավազակությամբ զուգորդված սպանություն կատարելու՝ ապօրինաբար Ս.Կարապետյանին կյանքից զրկելու ուղղակի դիտավորությամբ՝ առաջին հարկի ննջասենյակում հարձակվել, կյանքի և առողջության համար վտանգավոր բռնություն գործադրելով՝ ջրով լի ապակյա տարայով՝ շշով հարվածել է մահճակալին պառկած Ս.Կարապետյանի գլխին: Դրա հետևանքով տատն սկսել է խռխռալ։

Տեսնելով, որ տատը չի մահացել՝ ջրով լի մեկ այլ ապակյա տարայով ևս մեկ անգամ հարվածել է Ս.Կարապետյանի կենսական կարևոր նշանակություն ունեցող մարմնի հատվածին՝ գլխի ձախ գագաթային շրջանին՝ պատճառելով մարմնական վնասվածքներ՝ գլխի սալջարդ վերքի և գլխի մաշկի տակ արյունահավաքի ձևով, ինչի հետևանքով վերջինս կորցրել է գիտակցությունը և անշարժացել։

Կարծելով, որ հարվածների հետևանքով Ս.Կարապետյանը մահացել է, շարունակել է մտադրված հանցավոր գործողությունները՝ հափշտակել տուժողի՝ 14.000 ՀՀ դրամ արժողությամբ ոսկյա ականջօղերը, 50.000 ՀՀ դրամ գումարը, 10.500 ՀՀ դրամին համարժեք 20 եվրո գումարը ու հեռացել, սակայն Արման Կարապետյանի կամքից անկախ հանգամանքներով հանցագործությունն ավարտին չի հասցվել, քանի որ Ս.Կարապետյանի մահվան պատճառը հանդիսացել է սուր սրտային անբավարարությունը։

Արման Կարապետյանն իրեն առաջադրված՝ ՀՀ քրեական օրենսգրքի 34-104-րդ հոդվածի 2-րդ մասի 8-րդ կետով՝ ավազակությամբ զուգորդված սպանության փորձ, մեղադրանքում իրեն մեղավոր չճանաչեց՝ հայտարարելով՝ «էդ սուտ ա»:

Աղբյուր` Փաստինֆո