Փաստ ինֆո

Ոստիկանության լրատվական ծառայությունը հաղորդագրություն է տարածել՝ նախօրեին՝ ուշ երեկոյան, Մալաթիա վարչական շրջանում տեղի ունեցած միջադեպի առնչությամբ:

Հաղորդագրության մեջ մասնավորապես ասվում է.

Մարտի 31-ին՝ ժամը 23.15-ին, ոստիկանության Երևան քաղաքի վարչության օպերատիվ կառավարման կենտրոնից ոստիկանության Մալաթիայի բաժնում հաղորդում է ստացվել, որ իրենց է զանգահարել ԱԺ պատգամավոր Նիկոլ Փաշինյանը և հայտնել, որ Սվաճյան և Անդրանիկի փողոցների խաչմերուկում իրենց վստահված անձանց վրա զինված հարձակում է տեղի ունեցել և գողացել են դրոշները:

Ապրիլի 1-ին՝ ժամը 1:00-ին, 1992 թ. ծնված Հայկ Ս.-ն հաղորդում է տվել, որ մարտի 31-ին՝ ժամը 22.50-ին, Անդրանիկի և Սվաճյան փողոցների խաչմերուկի մոտ, վիճաբանության ժամանակ, անհայտ անձը հարվածել է իրեն՝ պատճառելով վնասվածքներ, ինչպես նաև հանել է ատրճանակը և ուղղել իր վրա, սակայն վնասազերծվել է 1994 թ. ծնված Գառնիկ Վ.-ի կողմից:

Ահազանգը ստանալուն պես դեպքի վայր են մեկնել ոստիկանության ծառայողներ՝ ոստիկանության Երևան քաղաքի վարչության պետ, ոստիկանության գնդապետ Սարգիս Մարտիրոսյանի գլխավորությամբ: Կատարվել են անհետաձգելի մի շարք միջոցառումներ և կարճ ժամանակ անց ոստիկանության ծառայողները պարզել են հանցագործությունը կատարողի ինքնությունը, ով հանդիսանում է 1977 թ. ծնված Արթուր Ա.:

Հարուցվել է քրեական գործ ՀՀ քրեական օրենսգրքի 258-րդ հոդվածի 2-րդ մասի հատկանիշներով:

Արթուր Ա.-ն ձերբակալված է:

Ատրճանակը ոստիկանություն է ներկայացվել Ն. Փաշինյանի կողմից:

Նշանակվել են համապատասխան փորձաքննություններ:

Կատարվում է քննություն:

Զինված հարձակում Մալաթիայում

Ավելի վաղ «Փաստինֆո»-ն տեղեկացրել էր, որ Հարավ-Արեւմտյան թաղամասում զինված հարձակում է տեղի ունեցել «Ելք» դաշինքի վստահված անձանց վրա: Ն.Փաշինյանի ներկայացմամբ` զինված հարձակման հետևանքով իրենց վստահված անձինք ստացել են վնասվածքներ:  

Աղբյուր` Փաստինֆո