Փաստ ինֆո

«Սասնա Ծռեր»-ի գործով մեղադրյալ Արայիկ Խանդոյանի հեռախոսային խոսակցությունների ու տեսակցությունների արգելքի դեմ վերաքննիչ բողոքի քննությունն այսօր ընդմիջվել է և հետաձգվել մինչև ապրիլի 4-ը:

Ինչպես «Փաստինֆո»-ի լրագրողին հայտնեց մեղադրյալի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանը, ինքը դատարանին՝ դատավոր Արշակ Խաչատրյանի նախագահությամբ, ինքնաբացարկի միջնորդություն է ներկայացրել:

Ըստ պաշտպանի՝ դատավորը չի կարող անկողմնակալ լինել. նրա նախագահությամբ է մերժվել Ա.Խանդոյանի կալանավորման դեմ պաշտպանական կողմի բողոքը:

Փաստաբանը հայտարարել է, որ հանցագործները պետական պաշտոններ են զբաղեցնում, իսկ հերոսները, որոնց օգնությամբ պետականություն է կերտվել, գտնվում են անազատության մեջ: Պաշտպանը նաև կոչ է արել դատարանին քաղաքական պատվեր չկատարել, իսկ նրա պաշտպանյալն իր հերթին հայտարարել է, որ ցանկանում է իր կարծիքը հայտնել իշխող կուսակցության մասին:

Դատարանը որոշել է նիստը շարունակել դռնփակ պայմաններում, սակայն դահլիճում ներկա հանրության ներկայացուցիչները չեն հեռացել դատական նիստերի դահլիճից, և դատական նիստն ընդմիջվել է ու հետաձգվել:

Արա Ղարագյոզյանը հայտնեց նաև, որ եթե հաջորդ դատական նիստը դռնփակ անցկացվի, ապա պաշտպանական կողմը, հնարավոր է, չի մասնակցի դատական նիստին:

Աղբյուր` Փաստինֆո