Փաստ ինֆո

Երկիր Մեդիա հեռուստաալիքի նախաձեռնությամբ և ֆինանսավորմամբ ս.թ. մարտի 18-27 ընկած ժամանակահատվածում ՀՀ-ում իրականացվել է հասարակական կարծիքի ուսումնասիրություն: Ուսումնասիրության նպատակն է բացահայտել և վերլուծել Հայաստանի բնակչության հասարակական-քաղաքական տրամադրություններն ու կարծիքները 2017թ.-ի խորհրդարանական ընտրությունների շեմին: Ծրագիրն իրականացրել են Հայկական սոցիոլոգիական ասոցիացիան և BS/The Gallup Organization մասնագիտացված կազմակերպությունները:

Համապետական ներկայացուցչական հանրային կարծիքի հարցմանը մասնակցել է համապետական ընտրություններում ընտրելու իրավունք ունեցող Հայաստանի 1005 չափահաս բնակիչ: Հարցազրույցներն անցկացվել են ընտրողի տանը` «դեմ առ դեմ»  հարցման սոցիոլոգիական մեթոդով:

Հարցվածների արձագանքների մակարդակը կազմել է 70%, հարցման արդյունքների սխալի լուսանցքը չի գերազանցում +/- 3,2%, տվյալների վստահության մակարդակը 95%:

Հարցման ժամանակ ընտրողների 50%-ը նշել է, որ հաստատապես մասնակցելու է ընտրություններին, իսկ 35%-ը` հավանաբար կմասնակցի: Ընտրություններից մի քանի օր առաջ ընտրողների առավել մեծ աջակցությունն են վայելում երկու կուսակցություններ` Հայաստանի Հանրապետական կուսակցությունը, որին պատրաստ է ձայն տալ ընտրողների 30,2%-ը (կամ հավանական ընտրողների 33,0%-ը) և «Ծառուկյան» դաշինքը, որի օգտին պատրաստ է քվեարկել ընտրողների 29,1%-ը (կամ հավանական ընտրողների 29,4%-ը): Քանի որ այս անգամ քվեարկության ժամանակ ընտրողները նշելու են նաև ընտրատարածքներում տարբեր կուսակցություններից ընդգրկված այսպես կոչված ռեյտինգային մասնակիցներ, ապա մեր հարցաթերթում նույնպես նման հարց էր տեղադրվել ու ստացվել էին պատասխաններ, որոնց համաձայն  ՀՀԿ-ի բոլոր ռեյտինգային թեկնածուներին տրվել է` 31,7%, «Ծառուկյան» դաշինքի թեկնածուներին` 21,8% և մնացած յոթ կուսակցություններին ու դաշինքներին  3-8–ական տոկոսներ: Քվեարկության ժամանակ հասկանալի է, որ այս ձայները կգումարվեն համապատասխան կուսակցությունների ստացված քվեներին:

Հարցման արդյունքները ցույց են տալիս, որ 3-4 այլ կուսակցություն ու դաշինք, որոնք վայելում են ընտրողների համեմատաբար ավելի փոքր մասնաբաժնի աջակցությունը, նույնպես կարող են անցնել Ազգային Ժողով: Դրանք են` «Հայ հեղափոխական դաշնակցություն», «Հայկական վերածնունդ»  կուսակցությունները և «Ելք» դաշինքը:    

Հարցման արդյունքների վերլուծությունը ցույց է տալիս, որ երկու առաջատար կուսակցությունների սոցիալ-ժողովրդագրական պատկերները բավականին մոտ են, և այդ երկուսը հիմնականում մրցում են միմյանց հետ, մինչդեռ ավելի փոքր կուսակցությունների ընտրողների պատկերները տարբեր են: Հավանական ընտրողների զգալի մասը (63,4%) կողմնորոշված է, թե ում է ընտրելու, իրենց վերջնական ընտրության ձևավորման համար գրեթե ժամանակ չի մնացել:

Gallup կազմակերպության ներկայացուցիչ, դոկտոր Ռասա Ալիսաուշկիենեն նշում է, որ հայ ընտրողները բավական մեծ հետաքրքրություն են ցուցաբերում գալիք ընտրությունների հանդեպ. նրանց 50%-ն ասել է, որ հաստատ մասնակցելու է ընտրություններին, իսկ 35%-ը նշել է, որ «հավանաբար կմասնակցի»: Ընտրողների 24%-ը  մասնակցության մասին վերջնական որոշում դեռ չեն կայացրել:

Հարցման արդյունքները վկայում են այն մասին, որ մեր բնակչության համար ամենամտահոգիչը շարունակում են մնալ սոցիալ-տնտեսական խնդիրները, որոնցից առաջնայինը` աշխատատեղերն ու կենսապայմաններն են:

Աղբյուր` Փաստինֆո