Փաստ ինֆո

Վաղարշ Վաղարշյանի անվան թիվ 80 հիմնական դպրոցի 9-րդ դասարանի աշակերտը Հայաստանի Հանրապետությունից բացակայելու և պետական ավարտական քննություններին ներկա չգտնվելու պարագայում ստացել է ավարտական վկայական:

2015թ. նոյեմբերից-դեկտեմբեր ամիսներին աշակերտը կրկին բացակայել է հանրապետությունից, դասերին չի հաճախել, սակայն տնօրենի հրահանգով չեն դրվել բացականեր, անգամ բացակայած օրերի ընթացքում նա գնահատվել է, այնինչ ուսումնական տարվա ընթացքում 120-ից 200 ժամ բացակայություն ունեցող աշակերտը պետք է քննություններ հանձնի, որպեսզի շարունակի հետագա ուսումը:

«Փաստինֆո»-ի լրագրողի հետ զրույցում նույն դպրոցի պատմության ուսուցչուհի Կարինե Քոչարյանը փաստեց, որ այդ աշակերտին ինքը դասավանդել է 4 տարի, ուսուցչուհին վստահեցնում է, որ ընդգրկված լինելով իր առարկայից անցկացվող քննության հանձնաժողովում՝ դպրոցի տնօրեն Ռիտա Արսենյանը թույլ չի տվել, որպեսզի ուսուցչուհին մասնակցի քննական թեստերի ստուգմանը և չի էլ ստորագրել քննական թեստերի տակ:

Ի վերջո, դպրոցի տնօրենի կողմից թույլ տրված այս ապօրինությունների վերաբերյալ ուսուցչուհին բարձրաձայնել է և կատարվել են ուսումնասիրություններ:

Այսպիսով, ՀՀ կրթության գիտության նախարարության աշխատակազմի կրթության պետական վարչության պետի կողմից ստացված գրության համաձայն, ուսումնասիրությամբ պարզվել է, որ 2015-2016 ուսումնական տարվա 9-րդ դասարանի ավարտական քննությունների ընթացքում 9-րդ դասարանի աշակերտը Հայաստանի Հանրապետությունից բացակայելու պատճառով չի մասնակցել ավարտական 5 քննություններին (բացառությամբ ֆիզկուլտուրա առարկայի), սակայն դպրոցի տնօրինության կողմից այդ աշակերտը գնահատվել է և ստացել է ավարտական վկայական:

Ըստ տնօրենի կողմից ներկայացված պարզաբանման՝ աշակերտին աջակցել են որպեսզի չզրկվի վկայականից:

Գրության մեջ նշվում է նաև, որ չեն պահպանվել ՀՀ ԿԳ նախարարի 06.05.2016թ «2015-2016 ուսումնական տարվա սովորողների գիտելիքների ստուգման, ավարտական, պետական ավարտական քննությունների կազմակերպման, անցկացման աշխատակարգը և ժամանակացույցը հաստատվելու մասին» N 415 –Ա/Ք հրամանի պահանջը:

Այս ուսումնասիրության արդյունքներն ուղարկվել են Երևանի քաղաքապետարան ՝ խախտումների վերաբերյալ համապատասխան միջոցներ ձեռնարկելու առաջարկությամբ:

Ուսուցչուհի Կարինե Քոչարյանը նշում է, որ այն դեպքում, երբ կրթության պետական տեսչության կողմից կատարված ստուգումների արդյունքում հաստատվել է այդ հանգամանքը դպրոցի տնօրենը իր անօրինական գործողությունները բարեգործություն, աջակցություն և մարդասիրություն է համարում և հպարտությամբ հայտարարում է, որ թիկունքն ամուր է, շատ- շատ նկատողություն են տալու և վերջ:

Փաստի կապակցությամբ ոստիկանությունում նախապատրաստված նյութերն ուղարկվել են ՀՀ գլխավոր դատախազություն՝ հետագա ընթացքը լուծելու համար:

Աղբյուր` Փաստինֆո