Փաստ ինֆո

Սպանության փորձի՝ Արման Մարջանյանի վերաբերյալ գործով դատական նիստում երկրորդ անգամ բարձրացվեց այս գործը և նոր դատարան մտած Հենրիկ Բարսեղյանի վերաբերյալ գործը մեկ վարույթում միավորելու հարցը:

Ըստ պաշտպանական կողմի, նոր գործը, որն ընդունվել է դատարանի մեկ այլ դատավորի՝ Մեսրոպ Մակյանի, վարույթ, Ա.Մարջանյանի գործի անքակտելի մասն է՝ երկու ամբաստանյալներն էլ նույն ենթադրյալ հանցագործությունը կատարելու մեջ են մեղադրվում:

Ըստ նոր գործով ամբաստանյալ Հենրիկ Բարսեղյանին առաջադրված մեղադրանքի, նա խմբի կազմում կատարել է խուլիգանություն և բացի այդ երկու և ավելի անձանց ապօրինաբար կյանքից զրկելու դիտավորությամբ խմբի կազմում իր մոտ ապօրինի պահվող հրազենի գործադրմամբ կատարել է սպանության փորձ:

Հ.Բարսեղյանի ու Ա.Մարջանյանի մեղադրանքի հիմքում ընկած դեպքի ժամանակ հրազենով վնասվածքներ են պատճառվել չորս հոգու և տուժողների դիմադրությանը հանդիպելու պատճառով հանցագործությունն ավարտին չի հասցվել:

Հ.Բարսեղյանին մեղադրանք է առաջադրվել ՀՀ քրեական օրենսգրքի 34-104-րդ հոդվածի 2-րդ մասի 1-ին և 7-րդ կետով՝ մի խումբ անձանց կամ կազմակերպված խմբի կողմից երկու կամ ավելի անձանց սպանության փորձ, 235-րդ հոդվածի 1-ին մասով՝ ապօրինի կերպ զենք ձեռք բերելը, պահելը, կրելը, և 258-րդ հոդվածի 3-րդ մասի 1-ին կետով՝ մի խումբ անձանց կամ կազմակերպված խմբի կողմից կատարված խուլիգանություն: Առաջին երկու հոդվածներով մեղադրվում է նաև Արման Մարջանյանը:

Դատարանը՝ դատավոր Արշակ Վարդանյանի նախագահությամբ, Ա.Մարջանյանի գործի քննության շրջանակներում մերժեց պաշտպանական կողմի հիշյալ միջնորդությունը: Դատարանն որոշեց, որ դատարանը իրավասու չէ կայացնել մի որոշում, որը վերաբերվում է մեկ այլ դատավորի վարույթում գտնվող գործին: Բացի այդ, գործերը գտնվում են տարբեր փուլերում, Հ.Բարսեղյանի գործով դեռ դատավարությունը չի սկսվել, իսկ Արման Մարջանյանի գործով ապացույցների 80-85 տոկոսն արդեն իսկ հետազոտված է:

Դատական նիստում հայտարարվեց, որ գործով մի վկա բացակայում է երկրից: Պաշտպանական կողմը հայտարարեց, որ այդ պարագայում խախտվում է իրենց հակընդդեմ հարցման իրավունքը և միջնորդեց անթույլատրելի ճանաչել վկայի նախաքննական ցուցմունքը և հանել այն ապացույցների ցանկից:

Դատարանը որոշեց փոխել ապացույցների հետազոտման կարգը, ըստ որի կհետազոտվեն գործի գրավոր ապացույցները, կզննվեն իրեղեն ապացույցները, ցանկության դեպքում ցուցմունք տալու իր իրավունքից կօգտվի ամբաստանյալը: Եվ դատաքննությունը լրացնող միջնորդությունների քննարկումից հետո, այսինքն՝ դատաքննության ավարտական փուլում, դատարանը նորից կանդրադառնա վկայի հետ կապված հարցին:

Աղբյուր` Փաստինֆո