Փաստ ինֆո

Մեղադրողն այսօր իր մեղադրական ճառում միջնորդեց զանգվածային անկարգություններին մասնակցելու մեջ մեղադրվող Արման Առաքելյանին դատապարտել 4 տարվա ազատազրկման: Հաջորդ դատական նիստում ճառով հանդես կգա ամբաստանյալի պաշտպան, «Ընդդեմ իրավական կամայականության» ՀԿ փաստաբան Արա Ղարագյոզյանը:

«Փաստինֆո»-ի հետ զրույցում փաստաբանը նշեց, որ գործով տուժող է ճանաչվել 46 տուժող, սակայն քրեական գործով չի հիմնավորվել, որ Ա.Առաքելյանն է նրանց վնասվածք պատճառել: «Այսինքն՝ ստացվում է, որ իմ պաշտպանյալը պետք է պատասխանատվության ենթարկվի ուրիշների արած գործողությունների համար»,- ասաց Ա.Ղարագյոզյանը՝ հավելելով, որ միակ վկան, որ ցուցմունք էր տվել, նախաքննության ժամանակ նրա հետ առերեսում չի անցկացվել, իսկ դատաքննության ժամանակ էլ դատարանը չի ապահովել, որպեսզի պաշտպանական կողմը կարողանա օգտվել առերես հարցեր տալու իր իրավունքից: Դա, նշեց Արա Ղարագյոզյանը, Մարդու իրավունքների եվրոպական կոնվենցիայի 6-րդ հոդվածի՝ արդար դատաքննության իրավունք, խախտում է:

Հույս հայտնելով, որ դատարանն արդար դատական ակտ կկայացնի, Արա Ղարագյոզյանը պարզաբանեց, որ նման հույս ունի այն պատճառով, որ ըստ էության չի հիմնավորվել Արման Առաքելյանի մեղադրանքը: «Ասեմ ավելին՝ այստեղ ընդհանրապես զանգվածային անկարգությունների թե՛օբյեկտիվ, թե՛ սուբյեկտիվ կողմը բացակայում է, այդ ամեն ինչին ես կանդրադառնամ իմ ճառում»,- ասաց Ա.Ղարագյոզյանը:

Այս գործը սկզբնապես քննվում էր Արարատ Խանդոյանի գործի հետ նույն վարույթում: Արա Ղարագյոզյանը, ով նաև Արարատ Խանդոյանի պաշտպանությունն է իրականացնում, նշեց. «Արարատ Խանդոյանը, գիտեք, քաղաքական բանտարկյալ է, նա չուզեցավ, որ այդ գործը շարունակվի նույն վարույթի շրջանակներում, միջնորդություն ներկայացրեց, իր մասն առանձնացրեցին և առանձին վարույթում այն քննվում է»,- ասաց պաշտպանը:

Աղբյուր` Փաստինֆո