Փաստ ինֆո

3-ամյա երեխայի առողջությանը անզգուշությամբ միջին ծանրության վնաս պատճառելու համար Արմենը (անունը փոխված է) դատապարտվել է 80 000 ՀՀ դրամի չափով տուգանքի:

Ավելի վաղ տեղեկացրել էինք, որ դեպքը տեղի է ունեցել Սյունիքի մարզում տղամարդը ոտքով հարվածել էր իր հետ փաստական ամուսնական հարաբերությունների մեջ գտնվող կնոջ 3-ամյա որդուն:

Սուտ խոսելու պատճառով բարկացել է 3-ամյա երեխայի վրա ու հարվածել՝ պատճառելով միջին ծանրության վնաս

Ըստ մեղադրանքի՝ Արմենը, 13.10.2016թ. ժամը 21:00-ի սահմաններում կենցաղային շարժառիթով` սուտ խոսելու պատճառով, բարկացել է իր հետ փաստական ամուսնական հարաբերությունների մեջ գտնվող կնոջ 3-ամյա որդու վրա և դրսևորելով հանցավոր անփութություն, անտեսելով լողասենյակի սալահատակի առկայությունը՝ ոտքով մեկ անգամ հարվածել է երեխայի հետույքին, վերջինս կորցրել է հավասարակշռությունը և վայր ընկել, գլխով հարվածել լողասենյակի հատակին, ստացել փակ գանգուղեղի թեթև աստիճանի սալջարդ, որի հետևանքով նրա առողջությանը անզգուշությամբ պատճառվել է միջին ծանրության վնաս:

Նրան մեղադրանք է առաջադրվել ՀՀ քրեական օրենսգրքի 121-րդ հոդվածի 1-ին մասով՝ որպես խափանման միջոց ընտրվելով չհեռանալու մասին ստորագրությունը:

44-ամյա տղամարդն առաջադրված մեղադրանքը ընդունելով միջնորդել է գործի քննությունն անցկացնել արագացված ընթացակարգով:

Դատարանը, ուսումնասիրել է ամբաստանյալի անձը բնութագրող տվյալները, պատասխանատվությունն ու պատիժը մեղմացնող և ծանրացնող հանգամանքները:

Այսպիսով, նրա անձը դրականորեն բնութագրող հանգամանքներն են առաջադրված մեղադրանքում իրեն մեղավոր ճանաչելը, կատարածի համար զղջալը, մեկ պատվոգրի արժանացած լինելը:

Բացի այդ այն, որ 2016 թվականի ապրիլ-մայիս ամիսներին կամավոր ԼՂՀ մարտական հենակետերում է գտնվել:

Նրա նկատմամբ պատիժ նշանակելիս դատարանը հաշվի է առնել նաև այն, որ թեև տուժողի օրինական ներկայացուցիչը չի հաշտվել ամուսնու հետ, սակայն նրանից որևէ պահանջ չի ներկայացրել:

Աղբյուր` Փաստինֆո