Փաստ ինֆո

ԼՂՀ պաշտպանության բանակի նախկին հրամանատար Սամվել Բաբայանը քաղաքական բանտարկյալ է, նրա նկատմամբ քաղաքական հետապնդում է իրականացվում: Այսօր լրագրողների հետ հանդիպմանը նման կարծիք հայտնեց ՕՐՕ դաշինքի նախընտրական ցուցակի երրորդ հորիզոնականը զբաղեցնող նախկին արտգործնախարար Վարդան Օսկանյանը:

Վերջինս գտնում է, որ քաղաքական բանտարկյալներ են նաև Ժիրայր Սեֆիլյանը, Անդրիաս Ղուկասյանը և «Սասնա ծռեր» խմբի անդամները, ովքեր գտնվում են կալանքի տակ:

Դաշինքի առաջնորդ, ՀՀ պաշտպանության նախկին նախարար Սեյրան Օհանյանն էլ հայտարարեց, թե Սամվել Բաբայանը իրենց մարտական ընկներ է, գաղափարակից գործընկերը և նրա իրավունքների պաշտպանության գործում իրենք պետք է հաստատակամ լինեն և մինչև վերջ գնալու են:

Սեյրան Օհանյանը նաև նշեց, որ Սամվել Բաբայանի փաստաբանի միջոցով տեղեկանում են գործի ընթացքի մասին և, ըստ փաստաբանի, որևէ փաստ գոյություն չունի, Բաբայանը առաջադրված մեղադրանքը չի ընդունել և որևէ առնչություն չունի դրա հետ:

«Չեմ կարծում, որ նա կարող էր այսպիսի փոքր խնդիրներով զբաղվել, մանավանդ այս ժամանակահատվածում»,- ասաց Օհանյանը՝ հավելելով, որ եթե կան տեղեկություններ, ապա թող այդ տեղեկությունները հրապարակեն որպեսզի իրենք ևս տեղեկանան, եթե ոչ, ապա գոնե այս ժամանակահատվածում իրենք գտնում են, որ դա քաղաքական հետապնդում է և՛ Սամվել Բաբայանի և ՕՐՕ դաշինքի նկատմամբ:

Օհանյանի գնահատմամբ՝ նախընտրական քարոզարշավի ընթացքում այս ամենն անընդունել է, սակայն սա ապացուցում է, որ իրենց դաշինքը ուժ ունի, վերահսկողությունից դուրս է և անկասկած՝ այն դերակատարությունն է իրականացնելու որպեսզի երկրում փոխեն իշխանությունը՝ անկախ անձանցից ձևավորեն նոր կառավարման համակարգ:

Ինչ վերաբերում է մաքսանենգ ճանապարհով Հայաստան բերված «Իգլա» տեսակի զենիթա-հրթիռային համալիր տեղափոխելու փաստին, ապա Օհանյանը գտնում է, որ այն ինչ իրենք տեսել են նկարներով դա պարզապես խողովակատիպ գործիք է առանց տարբեր մեխանիզմների, որը երբևիցե այդ իրավիճակում կրակելու հնարավորություն չի ունենա:

Հիշեցնենք, որ ըստ Գլխավոր դատախազության պաշտոնական հաղորդագրության՝ 2017 թվականի մարտի 22-ին ՀՀ կառավարությանն առընթեր ազգային անվտանգության ծառայության քննչական վարչությունում հարուցվել է քրեական գործ:

Նշված հանցագործության կատարմանը մասնակցելու կասկածանքով նույն օրը ձերբակալվել են երեք քաղաքացիներ, այդ թվում՝ Սամվել Անդրանիկի Բաբայանը:

Նախաքննության ընթացքում ձեռք բերված բավարար ապացույցների համակցության հիման վրա մի խումբ անձանց կողմից նախնական համաձայնությամբ ապօրինի կերպով ռազմամթերք ձեռք բերելու, պահելու, փոխադրելու և ռազմամթերքի մաքսանենգության համար Սամվել Բաբայանին և նրա հանցակիցներին մեղադրանք է առաջադրվել ՀՀ քրեական օրենսգրքի 235-րդ հոդվածի 2-րդ մասով և 235.1-րդ հոդվածի 2-րդ մասի 1-ին կետով:

Թեև հանցագործության կատարման մեջ մեղադրվող անձինք առաջադրված մեղադրանքում իրենց մեղավոր չեն ճանաչել, սակայն կասկածյալի դատավարական կարգավիճակում հարցաքննության ընթացքում նրանք, այդ թվում՝ Սամվել Բաբայանը, ընդունել են իրենց առնչությունը նշված ռազմամթերքի ապօրինի շրջանառությանը և տեղեկություններ հայտնել դրա հանգամանքների վերաբերյալ:

Երևան քաղաքի Կենտրոն և Նորք-Մարաշ վարչական շրջանների ընդհանուր իրավասության առաջին ատյանը, հիմնավոր համարելով մինչդատական վարույթն իրականացնող մարմնի միջնորդությունը, 2017 թվականի մարտի 24-ի որոշմամբ մեղադրյալների նկատմամբ որպես խափանման միջոց է կիրառել կալանավորումը՝ 2 ամիս ժամկետով:

Լուսանկարը՝ Armenpress-ի

Աղբյուր` Փաստինֆո