Փաստ ինֆո

Հայաստանի ազգային հավաքականի և մակեդոնական «Վարդարի» կիսապաշտպան Տիգրան Բարսեղյանը կիսվեց տպավորություններով ԱԱ-2018-ի ընտրական փուլում Ղազախստանի նկատմամբ տոնած հաղթանակից հետո.

- Շնորհավորում ենք հաղթանակի առթիվ, ինչպես նաև քեզ՝ ազգային հավաքական վերադառնալու առթիվ: Ինչպիսի՞նն են զգացողությունները:

- Շնորհակալ եմ: Շատ ուրախ եմ, շատ կարևոր խաղ էր մեզ համար: Փառք ու պատիվ մեր թիմին այս հաղթանակի համար, և մեր ազգին՝ մեր կողքին լինելու և աջակցելու համար: Աստված մեզ ուժ տվեց, որ կարողանանք հաղթել այս կարևորագույն խաղում:

- Որքա՞ն մեծ էր դժվարությունը դաշտ դուրս գալ հենց երկրորդ րոպեին և փոխարինել Գևորգ Ղազարյանին:

- Շատ դժվար էր, որովհետև կարելի էր ասել՝ հանպատրաստից մտա խաղադաշտ: Ճիշտ է՝ նախավարժանք արել էի, բայց ոչ այնպես, ինչպես մեկնարկային կազմում դաշտ դուրս գալու դեպքում կանեի: Սկզբում բավականին դժվար էր, այնուհետև աստիճանաբար ընտելացա խաղին:

- Խաղի ընթացքում բազմաթիվ դիրքեր փոխեցիր: Ի վերջո ո՞ր դիրքն էր քեզ ամենահարազատը:

- Երևի՝ եզր, կամ՝ կենտրոն, ինչու չէ նաև հարձակման գծում: Որ դիրքում՝ մարզիչը վստահում է, այնտեղ էլ խաղում եմ:

- Երկրպագուների աջակցությունը որքանո՞վ էր կարևոր, որովհետև մարզադաշտն այսօր գրեթե լեփ-լեցուն էր:

- Միշտ էլ երկրպագուների աջակցությունը շատ կարևոր է, նրանց վանկարկումները քեզ լրացուցիչ ուժ են տալիս: Երբ, օրինակ, հոգնած ես լինում, նայում ես շուրջդ ու տեսնում՝ այդքան մարդ քեզ աջակցում է, հավատում է,  երկրորդ շնչառություն է բացվում: Շնորհակալություն մեր ազգին՝ մեզ հավատալու և այս լավ օրը մեր կողքին լինելու համար:

- Եթե փոփոխություն չլիներ, ի սկզբանե նախատեսվու՞մ էր, որ դու այս խաղին մասնակցելու ես:

- Ճիշտն ասած՝ չեմ կարող պատասխանել այդ հարցին: Մարզիչներին պետք է ուղղեք այդ հարցը:

Աղբյուր` armsport.am