Փաստ ինֆո

Ընդդեմ ոստիկանության հայտնի սփյուռքահայ դերասանուհի Արսինե Խանջյանի հայցադիմումի գործի վարույթը կարճելու ՀՀ վարչական դատարանի որոշումը շատ անօրինական դատական ակտ է և իրավական դաշտում իրապես չի տեղավորվում: Այս մասին «Փաստինֆո»-ի լրագրողի հետ զրույցում հայտնեց Արսինե Խանջյանի ներկայացուցիչ, փաստաբան Արամազդ Կիվիրյանը:

Փաստաբանը նկատեց, որ, պարզ է, դատարանը չցանկացավ քննել այդ գործը, սակայն այդ չցանկանալը պետք է տեղավորվի իրավական դաշտում, իսկ տվյալ դեպքում այն իրավական դաշտում չի տեղավորվում:

«Ի՞նչ է նշանակում, որ անձի գործողությունը կարող է քննության առարկա դառնալ քրեաիրավական տեսանկյունից, ուստի և տվյալ դեպքում բացառվում է Վարչական դատարան դիմելու հնարավորությունը:

Այստեղ խոսքը վերաբերվում է ընդհանուր առմամբ ոստիկանության ոչ իրավաչափ գործողություններին, իսկ առանձին անձանց գործողություններն ենթակա են քրեաիրավական որակման, թե ոչ, դա այլ հարց է»,- ասաց Արամազդ Կիվիրյանը՝ հավելելով, որ այն հանգամանքը, որ օրինակ, որոշ անձանց գործողությունները հնարավոր է նաև որակել քրեաիրավական տեսանկյունից, չի բացառում և չի զրկում անձին Վարչական դատարան դիմելու իրավունքից: Ուստի դատարանն իրապես խախտել է անձի կարևոր իրավունքներից մեկը՝ դատարան դիմելու, այն է՝ դատարանի մատչելիության իրավունքը, ընդգծեց փաստաբանը:

Արամազդ Կիվիրյանը նշեց նաև, որ հոգեբանորեն որոշակի առումով ինքը պատրաստ էր նրան, որ այս դատական համակարգը կմերժի հայցը: «Մենք տեսանք այն գործողությունները, որոնք տեղի ունեցան Արսինե Խանջյանի դեմ, և ես հույս չունեի, որ դատարանը տվյալ դեպքում օբյեկտիվ քննություն կիրականացնի, արդար դատական ակտ կկայացնի»,- ասաց Ա.Կիվիրյանը՝ ընդգծելով, որ դատարանը, սակայն, էլ ավելի հեռուն գնաց՝ ընդհանրապես բացառեց դատարանում այդ հարցի քննությունը և կարճեց գործի վարույթը:

«Անկեղծորեն ասեմ՝ խոսքերն այստեղ ավելորդ եմ գտնում, որովհետև չգիտեմ նույնիսկ ինչպես որակել դատական ակտը»,- ասաց Ա.Խանջյանի ներկայացուցիչը:

Արամազդ Կիվիրյանը պարզաբանեց, որ դատարանն ընդհանրապես ցանկություն չունեցավ քննության առարկա դարձնելու ոստիկանության ոչ իրավաչափ գործողությունները, ինչի հիմքում դրեց ըստ էության ոստիկանության կողմից ներկայացված պատճառաբանությունները:
Ոստիկանությունը տվյալ դեպքում իր առարկության մեջ նշում էր, որ ոստիկանության այդ գործողությունները ենթակա են քննության քրեաիրավական տեսանկյունից և այդ պատճառով Վարչական դատարանում այդ հարցը ենթակա չէ քննության: Եվ դատարանն ըստ էության հիմք ընդունեց այդ հանգամանքը և կարճեց գործի վարույթը:

Արամազդ Կիվիրյանը հայտնեց նաև, որ այս պահին իրենք աշխատում են բողոքի վրա, որը կներկայացվի Վերաքննիչ վարչական դատարան:

Հիշեցնենք, որ Արսինե Խանջյանը հայցադիմումով, մասնավորապես, պահանջում էր ոչ իրավաչափ ճանաչել հայցվորի արտահայտվելու ազատության, խաղաղ հավաքների ազատության, ազատ տեղաշարժվելու, անձնական ազատության և անձեռնմխելիության, ձերբակալման պահից իր ընտրությամբ պաշտպան ունենալու, իրավաբանական օգնություն ստանալու, նվաստացնող կամ անմարդկային վերաբերմունքից, խտրական վերաբերմունքից, խտրական վերաբերմունքից զերծ մնալու իրավունքներին միջամտող ոստիկանների գործողությունները:

Հայցվորը պահանջում էր իրավունքների խախտումների կապակցությամբ սահմանել բարոյական վնասի փոխհատուցում 500.000 ՀՀ դրամի չափով:

Արսինե Խանջյանը Խորենացու փողոցից անցյալ տարվա հուլիսի 26-ին բերման էր ենթարկվել ոստիկանություն և մոտ երեք ժամ գտնվել ոստիկանության բաժանմունքում, ապա դերասանուհուց ներողություն էին խնդրել՝ ասելով՝ թյուրիմացություն է:

Աղբյուր` Փաստինֆո