Փաստ ինֆո

«Հանրապետական» մարզադաշտի մամուլի ասուլիսների սրահում կայացավ Հայաստանի հավաքականի գլխավոր մարզիչ Արթուր Պետրոսյանի մամուլի ասուլիսը:

 - Թիմերը հավասար են. ի՞նչ սպասելիքներ կան (հարց հյուրերի լրագրողի կողմից):

 - Այո, հավասարազոր թիմեր են: Բարդ խաղ եմ սպասում: Դուք լավ թիմ ունեք, պայքար եմ ակնկալում: Կապ չունի, որ ետնապահներ են, կլինի համառ և լարված պայքար:

 - Դիտե՞լ եք Կիպրոսի հավաքականի հետ հանդիպումը (հարց հյուրերի լրագրողի կողմից):

 - Չնայած ամեն ինչ արվել է, որ խաղը չդիտենք, բայց նայել ենք խաղը, մեր հետևություններն արել ենք: Այնպես որ, եթե ոչինչ չփոխվի, լավ ենք ուսումնասիրել Ղազախստանի հավաքականին:

 - Որոշում կայացրե՞լ եք, թե՞ աջ պաշտպանի գոտում ով է լինելու: Մանոյանի բացակայության պարագայում որոշե՞լ եք ինչ եք անելու:

 - Կամո Հովհաննիսյանը խաղում է կիսապաշտպանությունում, եթե նա մեկնարկային լինի, ապա այդ գոտում: Հովհաննես Համբարձումյանը թեթև վնասվածք ունի, վաղն առավոտյան վերջնական որոշում կկայացնենք: Այդ առումով մտածելու շատ բաներ կան: Մանոյանի բացակայությունը բարդ հարց է մեզ համար, շատ ափսոս, շատ լավ մարզավիճակում էր գտնվում: Հուսով եմ՝ կկարողանանք ճիշտ որոշում կայացնել և ելք գտնել:

 - Մխիթարյանի ֆունկցիոնալ վիճակի մասին ի՞նչ կասեք:

 - Մխիթարյանը լավ պատրաստ է: Մարզավիճակի մասին ոչ մի բացասական բան չեմ կարող ասել:

 - Մրցակցի մասին:

 - Վերլուծել ենք նրանց խաղը: Պայքարող, ֆիզիկապես շատ ուժեղ թիմ է, փորձում է պրեսինգի դիմել ամբողջ խաղի ընթացքում: Ղազախների թույլ կողմերի մասին կխոսենք խաղից հետո:

 - Այս խաղում ոչ ոքին դրակա՞ն արդյունք կլինի:

 - Նախորդ խաղից առաջ ասացի, որ դրական է, բայց պայքարելու ենք հաղթելու համար: Հիմա էլ նույնը կասեմ:

 - Հարձակման գիծը թերևս այժմ ամենաթույլ օղակն է. ի՞նչ եք անելու այդ մասով:

 - Անպայման հարձակվողական ենք գործելու վաղը: Տակտիկական փոփոխություններ ենք արել, որպեսզի ավելի հարձակվողական ուղղվածություն ունենանք:

 - Արաս Օզբիլիսն ի՞նչ վիճակում է:

 - Արասը հիմնական կազմում չի խաղում պրակտիկա չունի, վերջին 3 շաբաթվա ընթացքում մեկ անգամ ընկերական խաղի է մասնակցել, մեկ անգամ էլ երկրորդ թիմի հետ է խաղացել;Իսկ նա այն ֆուտբոլիստն է, որ ըխաղից խաղ է ավելացնում, ուստի կասեմ, որ ֆիզիկական վիճակը դեռ բարելավելու տեղ ունի:

 - Հետևում եք առաջնության խաղերին, բայց այս անգամ Հայաստանի առաջնությունից ֆուտբոլիստները քիչ են...

 - Կան թեկնածուներ, բայց դեռ 3 խաղ է տեղի ունեցել, իրենք դեռ չեն հասցրել լավ մարզավիճակ հավաքել: Իսկ դրսում խաղացող տղաները հիմնականում մասնակցել են իրենց թիմերին խաղերին: 

 - Հրայր Մկոյանի վիճակն ինչպիսի՞ն է և որքանո՞վ է պատրաստ վաղվա խաղին

 - Մկոյանը վերջին 2 ամսվա ընթացքում չէր խաղում, վնասվածքներ ուներ: Երկրորդ շաբաթն է, ինչ մարզվում է, դեռ իր մարզավիճակը չի հավաքել:

 - Խորեն Բայրամյանի մասին ի՞նչ կասեք:

 - Մոնտենեգրոյի հետ խաղից հետո կապվել ենք Բայրամյանի հետ, 2 անգամ հեռախոսազրույց ենք ունեցել, պայմանավորվել ենք հանդիպել, ես պետք է գնայի Ռոստով, բայց ինչ-ինչ պատճառով չստացվեց: Մեզնից կախված չէր: Հեռախոսազրույցի ընթացքում իր կողմից հետաքրքրություն կար: Հուսով եմ՝ այս խաղից հետո պայմանավորվածություն ձեռք կբերենք, անպայման փորձելու ենք: Բայց իհարկե դա անսահման չի լինելու: Ընդառաջ քայլեր կանենք, բայց խաղացողը ևս պետք է քայլեր անի:

 - Մանչեսթերի մի քանի խաղում Հենրիխն առջևի գծում էր խաղում: Հնարավո՞ր է՝ հավաքականում ևս նրան տեսնենք այդ դիրքում:

 - Հենրիխը կարող է նույնիսկ ձախ պաշտպան գործել, մի քիչ բարձրահասակ չի, թե չէ դարպասապահ էլ կկանգներ: Մեզ պետք է, որ Մխիթարյանը խաղը կառուցի, թիմին առաջ տանի, առջևի գիծն օպտիմալ չէ:

 - Սարգիս Ադամյանին հետևո՞ւմ եք:

 - Նա Գերմանիայի 4-րդ դիվիզիոնում է խաղում: Չեմ ճանաչում անձնապես: Եթե բարձր որակներ ունի, ուրեմն շանս ունի վերև բարձրանալու: Այդ դեպքում կլինի մեր ուշադրության կենտրոնում:

 - Ղազախստանում հանդես եկող հայ ֆուտբոլիստներից ինֆորմացիա հարցրե՞լ եք:

 - Անկեղծ ասած՝ ոչ: Այժմ ինֆորմացիայի պակաս չկա:

 - Ձեր կարծիքը Ազգերի լիգայի մասին:

 - Այս խաղերից հետո պարզ կլինի, դեռ շանսեր ունենք 3-րդ զամբյուղում հայտնվել: 3-րդ խումբը շատ ուժեղ է լինելու: Դեռ լուրջ չեմ մտածել:

  - Ստանդարտ իրավիճակները ովքե՞ր են իրացնելու:

 - 3-4 ֆուտբոլիստներ կարող են: Փորձում ենք փոփոխական լինի, միայն ՄԽիթարյանը կամ Ղազարյանը չլինեն:

«Ամեն ինչ անելու ենք հաղթանակի համար: Ցանկանում եմ երկրպագուներին խնդրել, որ գան մարզադաշտ և աջակցեն հավաքականին»,- հավելեց Պետրոսյանը:

Աղբյուր` armsport.am