Փաստ ինֆո

Ինչպե՞ս են անդրադառնում 2015թ. դեկտեմբերի 6-ի հանրաքվեով ընդունված ՀՀ սահմանադրության փոփոխությունները, մասնավորապես, Սահմանադրության երկրորդ գլուխը՝ մարդու և քաղաքացու հիմնական իրավունքներն ու ազատությունները, ռեալ կյանքի վրա, որքանո՞վ են կենսագործվում դրույթները, ի՞նչ խնդիրներ են առաջացնում: Այս հարցերն էին քննարկվում Ֆրիդրիխ Էբերտ հիմնադրամի ու Միջազգային իրավունքի հայկական ասոցիացիայի կազմակերպած միջոցառմանը:

Մի շարք բուհերի իրավագիտության ֆակուլտետների ուսանողների մի մասը միջոցառմանը ծավալված քննարկման ժամանակ բարձրացնում էր աշխատանքի ու սոցիալական հարցերը՝ կարևորելով աշխատանքի ու սեփականության իրավունքները: Ուսանողներից մեկը գտնում էր, որ մեր Սահմանադրությունը կատարյալ է, պարզապես լծակներ չկան օրենսդրական մակարդակով կամ գուցեև լծակներ կան, հնարավորություն չկա դրանց մեխանիզմներն օգտագործելու համար:

Ուսանողների մի մասը բարձրացնում էր խնամակալության ու հոգաբարձության մարմինների հարցը: Նրանք հարց են տալիս՝ արդյոք իրավաչա՞փ է, որ խնամակալության ու հոգաբարձության մարմինները գործում են հասարակական հիմունքներով, քանի որ լինում են դեպքեր, երբ երեխաների իրավունքները ոտնահարվում են հենց խնամակալության ու հոգաբարձության մարմինների, պետական մարմինների կողմից: Հիմնականում ուսանողների այս խումբը թերություններ էր արձանագրում երեխաների իրավունքների հարցում, մասնավորապես, ըստ նրանց, պետական մարմինները խոչընդոտ են հանդիսանում այդ երեխաների իրավունքների համար և «կարելի է ասել նրանց անգործության հետևանքով երեխաների իրավունքները ոտնահարվում են»:

Դա, ըստ ուսանողների և՛ Սահմանադրության, և օրենսդրության իրավակարգավորումների խնդիր է:

Միջոցառման մասնակիցները քննարկեցին նաև սահմանադրական նորմերի մեկնաբանության, դրանք շարքային քաղաքացու համար ավելի մատչելի, հասկանալի դարձնելու խնդիրները: Սահմանադրության մեջ կան ձևակերպումներ, որոնք շարքային քաղաքացու համար հասկանալի չեն, պետք է իրավաբան լինել՝ հասկանալու, իմանալու և կարողանալու համար պաշտպանել սեփական իրավունքներն ու ազատությունները:

Լրագրող Արթուր Հովհաննիսյանը տեսակետ հայտնեց, որ եթե Ֆրիդրիխ Էբերտ հիմնադրամի կողմից կայքէջ է ստեղծվելու, որն այդ գործառույթն է իրականացնելու և փորձելու է մարդու իրավունքների և ազատությունների պաշտպանության հարցում իր ավանդը բերել երկրում, ավելի նպատակային կլինի, որ չբավարարվի եղած օրենսդրական ու սահմանադրական նորմերը հանրությանն ավելի մատչելի ներկայացնելով, այլ նաև լինի խնդիրներ բացահայտող և դրանց լուծմանը հետամուտ լինող զանգվածային լրատվամիջոց:

Հայաստանի Ֆրիդրիխ Էբերտ հիմնադրամի ծրագրերի համակարգող Լիանա Բադալյանը «Փաստինֆո»-ի լրագրողի հետ զրույցում նշեց, որ իրենց պատկերացմամբ, կայքի միջոցով փորձելու են հանրամատչելի ձևով պատասխաններ տալ կոնկրետ այն հարցերին, որոնք առաջանում են Սահմանադրության երկրորդ գլխի՝ մարդու և քաղաքացու հիմնական իրավունքների ու ազատությունների իրացման ժամանակ, նաև կայքում վիզուալ ձևով ներկայացվեն այդ խնդիրների լուծման տարբերակները:

Աղբյուր` Փաստինֆո