Փաստ ինֆո

Շենգավիթ վարչական շրջանի ընդհանուր իրավասության դատարանը՝ դատավոր Նելլի Բաղդասարյանի նախագահությամբ, երեկ անպարտ է ճանաչել և արդարացրել է 2 անձի դանակահարության մեջ մեղադրվող Գրիգոր Վահանյանին:

Այդ մասին «Փաստինֆո»-ն տեղեկացավ Գրիգոր Վահանյանի պաշտպան Կարեն Սարդարյանից:

ՀՀ քրեական օրենսգրքի 112-րդ հոդվածի 2-րդ մասի 1-ին կետով մեղադրվող Գրիգոր Վահանյանը 2015թ. օգոստոսից գտնվում էր կալանքի տակ:

Նշենք նաև, որ մեղադրող դատախազը, հիմնավորված և ապացուցված համարելով Վահանյանին առաջադրված մեղադրանքը, իր ճառում միջնորդել էր նրան դատապարտել 6 տարի ժամկետով ազատազրկման:

Պաշտպան Կարեն Սարդարյանն էլ, պաշտպանական ճառով հանդես գալով, միջնորդել էր իր պաշտպանյալին արդարացնել:

Ըստ մեղադրանքի՝ Գրիգոր Վահանյանը 2015թ. հունիսի 14-ին, ժամը 23:00-ի սահմաններում, Երևան քաղաքի Ներքին Շենգավիթ 12-րդ փողոցի 1-ին նրբանցքի թիվ 5 տան դիմաց առաջացած վիճաբանության ընթացքում, երկու անձի մարմնական վնասվածք պատճառելու դիտավորությամբ, իր մոտ գտնվող դանակով դիտավորությամբ հարվածել է Էդուարդ Գրիգորյանի կրծքավանդակի ձախ կեսին` վերջինիս առողջությանը դիտավորությամբ պատճառելով կյանքին վտանգ սպառնացող ծանր վնաս, որից հետո իր մոտ գտնվող դանակով դիտավորությամբ հարվածել է Հովհաննես Գրիգորյանի ձախ կեսին` վերջինիս առողջությանը դիտավորությամբ պատճառելով կյանքին վտանգ սպառնացող ծանր վնաս:

Այսպիսով, 1 տարի 8 ամիս կալանքի տակ գտնվելուց հետո Գրիգոր Վահանյանն արդարացվեց և ազատ արձակվեց դատական նիստերի դահլիճից:

Աղբյուր` Փաստինֆո