Փաստ ինֆո

Անցած օրվա ընթացքում միանգամից երկու «օրենքով» գող է ձերբակալվել Ռուսաստանի տարածքում:

Կրասնոդարում երկրամասային քրեական հետախուզման աշխատակիցները կալանավորել են արդեն նախկին «օրենքով» գող Դավիդ Ջանգիձեին (Դաթո Կրասնոդարսկի): Նրա մոտ «սփայս» կոչվող թմրանյութ է եղել: Դաթո Կրասնոդարսկուն կալանավորել են 15 օր ժամկետով: Այդ ընթացքում ուժայինները հույս ունեն խոշոր չափերով թմրանյութ պահելու վերաբերյալ քրեական գործ հարուցել: Եթե դա տեղի ունենա, և Ջանգիձեի մեղքը ապացուցվի, ապա նրան սպառնում է երեքից մինչև տասը տարվա ազատազրկում:

Դաթո Կրասնոդարսկին թագադրվել է 2013թ. և Կրասնոդարի երկրամասում ներկայացնում էր Մերաբ Ջանգվելաձեի (Մերաբ Սուխումսկի) գլխավորած սուխումյան գողական կլանի շահերը: Բայց մեկ ամիս առաջ Դաթո Կրասնոդարսկին կորցրել է Սուխումսկու աջակցությունը կրասնոդարցի ձեռնարկատեր Մինդիա Գուլուայի հետ Ջանգվելաձեի կոնֆլիկտից հետո: Դավիդ Ջանգիձեն պաշտպանել էր Գուլուային, ինչի պատճառով էլ թագազրկվել էր Մերաբ Ջանգվելաձեի կողմից:

Իսկ Մոսկվայում ձերբակալել են «օրենքով» գող Լեվան Բուլիսկերիային՝ Լեվան Գալսկի մականվամբ: Նրա մոտ ևս հայտնաբերվել էին թմրանյութեր: Ճիշտ է, նրա դեպքում՝ կոկաին, և հոդվածը, որով քրեական գործ է հարուցվել, ձևակերպմամբ փոքր-ինչ տարբերվում է՝ թմրանյութերի անօրինական շրջանառություն:

Լեվան Գալսկին «թագի» տոհմիկ կրող է և իր կոչումը կրում է արդեն մեկուկես տասնյակ տարուց ավելի: 2009թ. Լեվան Բուլիսկերիան դատապարտվել է 3,5 տարվա ազատազրկման, պատիժը կրում էր Գոռնո-Ալթայսկում: Գալսկին ազատ է արձակվել գաղութից 2012թ.: Ինչպես և նրա հանգուցյալ հորեղբայրը, քրեական վերնախավին պատկանում է նաև Լեվանի զարմիկ Իրակլին:

Աղբյուր` Փաստինֆո