Փաստ ինֆո

«Իսլամական պետություն» ծայրահեղական խմբավորումը ստանձնել է մարտի 22-ին Լոնդոնում բրիտանական խորհրդարանի մոտ մարդկանց վրա հարձակման պատասխանատվությունը:

Ըստ BBC-ի ռուսական ծառայության, այդպիսի հաղորդագրություն խմբավորումը տարածել էր իր հետ կապ ունեցող «Ամաք» լրատվական գործակալության միջոցով: Մինչ այդ բրիտանական ոստիկանությունը հաղորդել է, որ հարձակում կատարողը մենակ է եղել, բայց ոգեշնչված է եղել այլ երկրներում մարդկանց վրա ԻՊ կողմնակիցների նմանատիպ հարձակումների սցենարով:

Լոնդոնում մարտի 22-ի ցերեկը կատարված հարձակման հետևանքով զոհվել է չորս մարդ, այդ թվում՝ ինքը՝ հարձակում կատարողը և նրա կողմից դանակահարված ոստիկանը: Բացի նրանցից զոհերի թվում է նաև երկու հետիոտն: Միջադեպի հետևանքով մոտ 40 մարդ վնասվածքներ է ստացել, որոնցից 29-ը դեռևս հիվանդանոցում է, իսկ յոթը կրիտիկական վիճակում է:

Իշխանությունները տեղի ունեցածը ահաբեկչական ակտ են որակել: Գիշերվա ընթացքում ոստիկանությունը ռեյդեր է իրականացրել Լոնդոնում, Բիրմինհեմում և այլ քաղաքներում՝ վեց հասցեներով՝ փորձելով գտնել հարձակվողի հետ հնարավոր կապ ունեցող մարդկանց: Առայժմ ձերբակալվել է յոթ մարդ:

Աղբյուր` Փաստինֆո