Փաստ ինֆո

2015 թվականի սեպտեմբերի 5-ին Գեղարքունիքի մարզի Ծովակ գյուղի վարչական տարածքում գրանցվել էր ավտովթար. ավտոմեքենան դուրս էր եկել ճանապարհի երթևեկելի գոտուց և բախվել էր ծառին:

Վթարի ենթարկված «Մերսեդես-Բենց» մակնիշի ավտոմեքենայի մեջ գտնվել էին զինվորականներ և պատահարի հետևանքով ստացած մարմնական վնասվածքներից մահացել է 1986 թ. ծնված ՀՀ ՊՆ N զորամասի զինծառայող կապիտան Տարոն Սեդրակյանը, իսկ 1977 թ ծնված մայոր Գրիգոր Սահակյանը և 1977 թ ծնված ենթասպա Գևորգ Վարդանյանը մահացել են քիչ անց՝ ՀՀ ՊՆ Վարդենիսի կայազորային զինվորական հոսպիտալում:

Բացի նրանցից, ավտոմեքենայում գտնվել են նաև զինծառայողներ՝ մայոր Սևակ Գասպարյանը և կրտսեր սերժանտ Հարություն Միրզոյանը, վերջիններս տեղափոխվել են ՀՀ ՊՆ կենտրոնական կլինիկական զինվորական հոսպիտալ:

Այս մասին դեպքից հետո պաշտոնական հաղորդագրությամբ հանդես եկավ Քննչական կոմիտեն` հայտնելով, որ հոսպիտալ տեղափոխված զինծառայողների վիճակը գնահատվում է ծանր կայուն:

Դեպքի առթիվ ՀՀ ՔԿ զինվորական քննչական գլխավոր վարչությունում հարուցվեց քրեական գործ` ՀՀ քրեական օրենսգրքի 242-րդ հոդվածի 3-րդ մասով:

Զինծառայողների՝ վթարի հետևանքով մահվան դեպքով գործ է հարուցվել (Լուսանկարներ)

Սակայն օրեր անց` սեպտեմբերի 11-ին, մահացավ նաև վթարի ենթարկված ավտոմեքենայի վարորդը՝ 1985թ. ծնված մայոր Սևակ Գասպարյանը:

Մայոր Սևակ Գասպարյանի մահվանից մեկ ու կես տարի անց նրան անզգուշությամբ մահ պատճառելու մեղադրանքով ամբաստանվում է Վարդենիսի կայազորային զինվորական հոսպիտալի պետը:

Ըստ մեղադրանքի՝ Երվանդ Հովհաննիսյանը, հանդիսանալով ՀՀ ՊՆ Վարդենիսի կայազորային զինվորական հոսպիտալի պետ, մասնագիտությամբ վիրաբույժ, հանդիսանալով բժշկական օգնություն և սպասարկում իրականացնող անձ, ոչ պատշաճ է կատարել իր մասնագիտական պարտականությունները, անփույթ վերաբերմունքի հետևանքով անզգուշությամբ առաջացրել է զինծառայող Սևակ Գասպարյանի մահը։

Երվանդ Հովհաննիսյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասով, նրա նկատմամբ որպես խափանման միջոց է ընտրվել չհեռանալու մասին ստորագրությունը:

Լուսանկարը՝ Shamshyan.com-ի

Աղբյուր` Փաստինֆո