Փաստ ինֆո

Երևանի Նար-Դոսի փողոցում տաքսիստի սպանության գործով այսօրվա դատական նիստում ամբաստանյալ Վահրամ Վերանյանը հայտարարեց, որ առաջադրված մեղադրանքում իրեն մասնակի է մեղավոր ճանաչում:

Ամբաստանյալը, մասնավորապես, նշեց, որ սպանելու նպատակ ինքը չի ունեցել՝ մեռնելը նրա՝ տուժողի, փրկությունն էր, ասաց ամբաստանյալը: Ավելին, հայտարարեց ամբաստանյալը, ինքը կուզենար պատժել տուժողին՝ կոտրել ոտքերը, թեկուզ ողնաշարը, որպեսզի նա հայտնվեր սայլակում, սակայն ապրեր:

Վ.Վերանյանը հայտնեց, որ մեկ անգամ մահակով հարվածել է տուժողին, վերջինս իր ձեռքից մահակը խլել է, և ինքը որպես վերջին տարբերակ հանել է դանակը՝ պաշտպանվելու համար:

Ամբաստանյալը հայտնեց, որ դանակով մեկ անգամ է հարվածել՝ կրծքավանդակի հատվածին, շատ արյուն է սկսել հոսել, տուժողի հագուստը միանգամից կարմրել է, իսկ երկրորդ անգամ ինքը չի հարվածել, պարզապես տուժողն առաջ է եկել մեքենայի մեջ ու մտել դանակի մեջ:

Ամբաստանյալը հայտնեց, որ իր հետ դեպքի վայրում եղած իր ընկերոջն ասել է, որ գնում է հանձնվելու: Իր երեխային «հաջող է ասել», ապա ներկայացել իրավապահ մարմիններին ու ներկայացրել նաև դանակը, որն, ըստ ամբաստանյալի, արյունոտ չէր:

Վահրամ Վերանյանը հայտնեց, որ տուժողն անընդհատ հետապնդել է իրեն, վարկաբեկել: Մինչև սպանությունը՝ իրեն դաժան ծեծի ենթարկելու դեպքից ամբաստանյալն ոչինչ չի հիշում: Ըստ նրա, հիշում է միայն, որ տուժողը մեքենայի երկաթյա գործիքով խփել է իր քունքային հատվածին, ինքն ընկել է, հաջորդ օրը զարթնել է հիվանդանոցում: Հետապնդումները շարունակվել են նաև այդ դեպքից հետո, տուժողը նաև իրեն հեռախոսով սպառնացել է:

Բռնության ու նվաստացումների հետևանքով ծնված սպանություն

Ամբաստանյալը հաստատեց, որ եղել են դեպքեր, երբ իր փաստացի կնոջն ասել է, որ տեսնի շքամուտքում մարդ կա՞, նոր մտնի շքամուտք՝ իմանալով, որ տուժողը «հետևից խփող է»:

Ի դեպ այսօր դատարանում վերջապես հարցաքննվեց տուժողի կինն ու ամբաստանյալի սիրուհին: Նա հայտնեց, որ 2015թ. ամուսինը՝ տուժողը, տանը դանակահարել է իրեն և երբ որ իրեն տեղափոխել են հիվանդանոց, ստիպել է հայտարարություն տալ, որ Վահրամն է հարվածել կնոջը:

«Եթե չես համարձակվի, դու պետք է ասես, որ ինքդ ես քեզ խփել»,- ըստ վկայի, ասել է ամուսինը: Վահրամ Վերանյանի նկատմամբ գործ է հարուցվել, քննության ընթացքում վերջինս այլուրեքության ապացույցներ է ներկայացրել, որ ինքը չէր կարող դանակահարել, Երևանում չի եղել: Դրանից հետո կինը քննիչին ցուցմունք է տվել, որ ինքն է իրեն հարվածել, բայց սուտ մատնության համար, այնուամենայնիվ, դատվել է: Իսկ Նոր Նորքի քննչական բաժնում հարուցված գործը որպես չբացահայտված դեռևս մնում է:

Դատարանում կինը ցուցմունք տվեց, որ իր ամուսինն է իրեն դանակահարել, ինքը չի համարձակվել ասել այդ մասին, որովհետև ամուսինն ասել է՝ «եթե հանկարծ իմ անունը տաս, քեզ խփելու եմ»:

Գործով ևս մեկ վկայի նախաքննական ցուցմունքները հրապարակվեցին, քանի որ ըստ էության սպառվել էին նրա ներկայությունը դատարանում ապահովելու հնարավորությունները: Վկան սպանության դեպքին ականատես է եղել: Վկան ավելի ուշ է հասկացել, որ խիտ մազերով երիտասարդը դանակով է հարվածել և ոչ թե ձեռքով, երբ տեսել է նրան հեռանալիս՝ դանակը ձեռքին: Վկան զանգահարել է շտապօգնություն՝ ասելով, որ մարդ է դանակահարվել, սակայն երբ տուժողին մեկ այլ մեքենայով տեղափոխել են, նորից զանգել է շտապօգնություն և ասել, որ էլ մեքենա չուղարկեն: Վկան հայտնել է նաև, որ խիտ մազերով երիտասարդը Վահրամ Վերանյանն է:

Այսօրվա դատական նիստում ավարտվեց դատաքննությունը և հայտարարվեց դատական վիճաբանությունների փուլ սկսելու մասին: Հաջորդ դատական նիստում ճառով հանդես կգա մեղադրողը:

Աղբյուր` Փաստինֆո