Փաստ ինֆո

Մարտի-26-ին՝ ժամը 20:00-ին, Վազգեն Սարգսյանի անվան «Հանրապետական» մարզադաշտում կկայանա Աշխարհի 2018 թ. առաջնության ընտրական փուլի Հայաստան-Ղազախստան հանդիպումը:

Հայաստանի ազգային հավաքականի նախկին ֆուտբոլիստ Լևոն Պաչաջյանը «ArmSport.am»-ի հետ զրույցում կիսվել է առաջիկա խաղից ունեցած սպասելիքներով.

«Միանգամից պետք է ասեմ, որ սպասում եմ 3 միավոր... չնայած, կարծում եմ, Ղազախստանի հավաքականը պինդ կոլեկտիվ է։  Եվ հետո մի փոքր անհայտ է, թե ինչ մարզավիճակում է գտնվում մեր հավաքականի տղաների մեծ մասը։ Նաև շատ կարևոր է իմանալ Մխիթարյանի մարզավիճակի մասին։

ՄՅՈւ-ի վերջին խաղում նա բացակայում էր, չնայած պահեստայինների նստարանին էր։ Մոուրինյուի ակնարկից կարելի էր կռահել, որ նա թեթև վնասվածք ունի։ Բայց ամեն դեպքում խաղում ենք տանը և վերջին հրաշալի քամբեքից հետո ակնկալիքները միայն դրական են:

- Հենց այդ քամբեքով հիանալի ստացվեց գլխավոր մարզիչ Արթուր Պետրոսյանի նորամուտը, և հիմա բոլորը նրանից և հավաքականից առավելագույնը կսպասեն: Ըստ Ձեզ, սա ավելորդ լարվածության պատճառ չի՞ դառնա անձամբ մարզչի և հավաքականի համար:

- Հավաքական գալով՝ բոլորն էլ պետք է որոշ չափով լարված լինեն, քանի որ արդեն իսկ մեծ պատասխանատվություն է խաղալ և մարզվել ազգային հավաքականում: Իսկ առհասարակ պետք է հոգեբանորեն լավ նախապատրաստել թիմին։ Հաղթանակներից հետո, կարծում եմ, հոգեբանորեն ավելի հեշտ է, և ավելորդ լարվածություն պետք է չլինի:

- Ղազախստանի հավաքականն ամենահեշտն է թվում ընտրական փուլում մեզ բաժին հասած մրցակիցներից: Այս մասին ի՞նչ կարծիք ունեք և առհասարակ ինչի՞ն է պետք ուշադրություն դարձնել առաջիկա խաղում:

- Այո, եթե համեմատենք, Ղազախստանը մի փոքր զիջում է մնացած հավաքականներին։ Բայց սխալ կլինի ենթադրել, որ մեզ հեշտ խաղ է սպասվում։ Կարծում եմ Ղազախստանը մեր դեմ կխաղա երկրորդ համարով և մենք հիմնականում կտիրենք գնդակին։

Նրանք կաշխատեն հնարավորինս ազատ տարածություններ չտալ մեզ՝ հաշվի առնելով մեր արագ և տեխնիկապես ուժեղ ֆուտբոլիստներին, և միևնույն ժամանակ կփորձեն հակագրոհել՝ օգտվելով մեր դարպասապահի և պաշտպանների միջև գտնվող ազատ գոտուց՝ պաշտպանների վրայով փոխանցումներ կատարելով ազատ խաղացողներին։ Այդ մասում պետք է շատ ուշադիր լինել և իհարկե անտեղի տուգանայիններ և անկյունային հարվածներ չբերել մեր դարպասին։ Դա նույնպես վտանգավոր կարող է լինել։

- Մոնտենեգրոյի հետ խաղում սառույցը կոտրվեց՝ տևական ժամանակ տնային հաղթանակ չէինք տոնել: Հիմա, ի՞նչ եք կարծքում, ո՞րը պետք է լինի մեր հավաքականի գլխավոր մոտիվացիան:

- Այո, վերջին մի քանի տարիների ընթացքում դա մեր հավաքականի կատարմամբ ամենադիտարժան և դրամատիկ խաղն էր: Եվ դա շատ ոգեվորիչ է։ Բայց ներսից իմանալով այս խաղը՝ կարող եմ ասել, որ մեզ, ցավոք չի հերիքում կայունությունը, որը շատ կարևոր է նպատակներին հասնելու համար։ Մեր հիմնական մոտիվացիան, ինչպես որ եղել և պետք է լինի, երկրի և հավաքականի պատիվը բարձր պահելն է։ Իսկ հետո՝ մեր երկրպագուներին ուրախացնելը։

- Խմբից դուրս գալու ի՞նչ շանսեր ենք պահպանում:

- Խմբում շատ բարդ իրավիճակում ենք հայտնվել մեկնարկային խաղերը ձախողելու պատճառով։ Բայց սա ֆուտբոլ է, և հրաշքներ հնարավոր են, ինչպես՝ դա եղավ Մոնտենեգրոյի հետ խաղում։ Ես ուզում եմ հավատալ, որ մեր հավաքականը կարող է հրաշք գործել և դուրս գալ խմբից։ Տեսնենք, պետք է ամեն խաղում հաղթանակի ձգտել և մոտեցնել այդ հրաշքը:

- Վերջին օրերի ընթացքում երկրպագուներն ակտիվորեն քննարկում են, թե որ դարպասապահին պետք է վստահել մեկնարկային կազմում՝ Արսեն Բեգլարյանի՞ն, թե՞՝ Անատոլի Այվազովին: Այս մասին ի՞նչ կարծիք ունեք, և արդյոք օպտիմա՞լ կազմով ենք ներկայանում առաջիկա խաղին:

- Անկեղծ ասած, երկու դարպասապահն էլ գրեթե նույն մակարդակի են, պարզապես Բեգլարյանը մի փոքր ավելի մեծ փորձ ունի հավաքականի կազմում և նրա թեկնածությունը մի փոքր ավելի նախնտրելի է։

Ափսոս որ ձմեռային դադարի ընթացքում մեր հավաքականն ընկերական խաղ չանցկացրեց և մենք հաստատ չենք կարող ասել, թե ով է ավելի լավ պատրաստված։ Բայց կարծում եմ՝ Բեգլարյանը կլինի մեկնարկային կազմում։

Կազմը հիմնականում օպտիմալ է։ Եթե հաշվի չառնենք ոչ ֆուտբոլային պատճառներով չհրավիրվածներին, ապա կարծում եմ՝ օպտիմալ է։

Նաև կցանկանայի նշել Էդգար Մանուչարյանի վերադարձը։ Կարծում եմ՝ նա շատ կօգնի հավաքականին առջևի գծում:

- Ի՞նչ կմաղթեք մեր հավաքականին և երկրպագուներին առաջիկա խաղում:

- Իհարկե, միայն հաղթանակ: Մեր երկրպագուներն ամենալավին են արժանի:

Նարե Հովհաննիսյան

Աղբյուր` armsport.am