Փաստ ինֆո

2015թ. հունվարի 29-ին ՀՀ ՊՆ Վազգեն Սարգսյանի անվան ռազմական ինստիտուտի կուրսանտ Հայկազ Բարսեղյանի սպանության գործով այսօր հարցաքննվեց վկա Հովհաննես Պետրոսյանը. վերջինս քնել է միևնույն ննջարանում, որտեղ և՝ սպանված Հայկազ Բարսեղյանը:

Ըստ վկայի ցուցմունքի՝ ինքը տեսել է, թե ինչպես են Գնել Թևոսյանը, Նորիկ Սահակյանը, Վաչե Սահակյանը և Մովսես Ազարյանը մտել իրենց ննջարան, նախ ծեծի ենթարկել Հայկազ Բարսեղյանին, ապա խոսել են նրան պատշգամբից ցած նետելու մասին, որից հետո քննարկել են այդ ամենը որպես ինքնասպանության իմիտացիա ներկայացնելու հարցը:

Վկայի դատաքննական ցուցմունքները փոքր-ինչ վերացական էին, անունները չէր նշում, դեպքը նկարագրում էր մակերեսորեն, սակայն հայտնեց, որ այդ ընթացքում, երբ ամբաստանվող 4 անձինք՝ Գնելը, Վաչեն, Մովսեսը և Նորիկը, մուտք են գործել իրենց ննջասենյակ, կանգնել են Հայկազի մահճակալի մոտ, նրա բերանը փակել են, որպեսզի չբղավի, իսկ Հայկազը հայհոյանքներ է հնչեցրել, իսկ երբ Գնելը ձեռքի մի շարժում է կատարել վերևից ներքև, դրանից հետո Հայկազի ձայնը էլ չի լսվել:

Այդ ամենից հետո էլ Հայկազին թևից և ոտքերից բռնած ննջարանից դուրս են տարել, ինքը մտածել է, որ բուժկետ են տանում՝ բժշկական օգնություն ցուցաբերելու, բայց այն որ Հայկազին սպանում են, ինքն այդպիսի տպավորություն չի ստացել:

Թե այս ամենը գիշերվա ո՞ր ժամին է տեղի ունեցել, վկան դժվարացավ նշել՝ չէր հիշում, սակայն ասաց, որ քուն հրամանից հետո է եղել, երբ բոլորը գնացել էին քնելու:

Ըստ վկայի դատաքննական ցուցմունքի՝ քուն հրամանից հետո եկել են Հայկազին դուրս կանչել, Հայկազն ասել էր, որ ինքը խոսելու բան չունի նրանց հետո, նրանք էլ պատասխանել են, թե իրենք ունեն նրա հետ խոսելիք, Հայկազին դուրս են տարել, կարճ ժամանակ անց Հայկազը վերադարձել է ննջարան, հայհոյանք է հնչեցրել ու պառկել է իր անկողնում: Վկան չի հարցրել, թե ինչու էին Հայկազին դուրս կանչել և ինչ է տեղի ունեցել, իսկ երբ արդեն կիսաքնած է եղել աղմուկից արթնացել է և տեսել, որ գործով 4 ամբաստանյալները ներս են մտել իրենց ննջարան:

Վկան հայտնեց, որ այդ ողջ ընթացքում ինքը դեմքով դեպի Հայկազի կողմն է պառկած եղել, սակայն չի շարժվել՝ վախեցել է, չի կարողացել ձայն հանել:

Իսկ առավոտյան, երբ վերկացին արթնացել են և հայտնաբերել, որ Հայկազի անկողնում հագուստ է դրված և անկողինն ամբողջության արյունոտ է, վկա Պետրոսյանն առաջինն այդ մասին գնացել և հայտնել է Վաչեին:

Չնայած նրան, որ, ինչպես վկան էր ներկայացնում, Վաչեն գտնվել է այդ 4 անձանց մեջ, ովքեր ծեծի են ենթարկվել Հայկազին, սակայն գնացել է և նրան կանչել՝ որպես սպա, որից հետո եկել են ինստիտուտի այլ սպաներ, իսկ իրենք գնացել են Հայկազին փնտրելու:
Վկան անձամբ տեսել է Հայկազին՝ ինստիտուտի մարզահրապարակում պպտաձողից կախված:

Վկան հայտնեց, որ տեղի ունեցածից հետո նախաքննական մարմինը պաշտպանության միջոց է կիրառել իր նկատմամբ, իսկ ինքը չի ցանկացել այլևս ուսումը շարունակել Վազգեն Սարգսյանի անվան ռազմական ինստիտուտում, ցանկացել է ուսումը շարունակել արտերկրում, սակայն Գլխավոր դատախազությունը թույլ չի տվել՝ հաշվի առնելով, որ գործով վկա է անցնում և դատարանում հարցաքննվելու է, ուստիև՝ ուսումը շարունակելու նպատակով տեղափոխվել է Արմենակ Խամփերյանցի անվան ռազմական ավիացիոն համալսարան:

Վկայի ցուցմունքներում առկա էական հակասություններով պայմանավորված՝ մեղադրող դատախազի միջնորդությամբ հրապարկվեցին նրա նախաքննական ցուցմունքները:

Գործով 4 ամբաստանյալները ներս են մտել ննջարան, կանգնել են Հայկազի մահճակալի մոտ. գլխավերևում կանգնել են Գնելը և Նորիկը, իսկ Վաչեն և Մովսեսը կանգնել են Հայկազի ոտքերի մոտ, Հայկազն սկսել է հայհոյանքներ հնչեցնել, Գնելը բռնել էր Հայկազի ձեռքը, իսկ Նորիկը մյուս ձեռքը և բերանը, իսկ Մովսես և Վաչեն Հայկազի ոտքերից, Հայկազի ձայնը չէր լսվում:

Վկան ավելի մանրամասն նկարագրել է դեպքը առերես հարցաքննության ժամանակ, մասնավորապես՝ Վաչե Սահակյանի հետ առերեսման ժամանակ վկան հայտնել է, որ այդ գործողությունները զարգացել են ժամը 01-ից 03-ն ընկած ժամանակահատվածում,
Վկան պնդել էր, որ Վաչե Սահակյանին ինքն անձամբ տեսել է իր աչքով, ճանաչել է նրան իր կազմվածքից, դեմքն էլ՝ որքան որ երևացել է միջանցքից ներթափանցող սենյակի լուսավորության ներքո, բացի այդ, նաև՝ խոսակցություններից, որ ասել է «ֆսյո էսի մեռավ»:

Վաչեն, վկային դիմելով, ասել է. «Ձեռքդ դիր խղճիդ, դու ինձ հաստատ տեսե՞լ ես, վկան դրական պատասխան է տվել՝ հաստատ:

«Դու հասկանու՞մ ես, որ չեղած բանի համար իմ կյանքի հետ ես խաղում»,- ասել է Վաչեն, իսկ վկան պատասխանել է, թե՝ «չեղածը ո՞րն ա, արել ես, պետք ա պատժվես»:

Ապա նաև Վաչեն հարցրել է, թե ինքը կոնկրետ ի՞նչ գործողություններ է արել, վկան ասել է, որ Հայկազի ոտքերն ես պահել, իսկ Հայկազի փսխելուց հետո ասել է՝ «էսի մեռա»:

Ինչ վերաբերում է քուղերին, ապա, ըստ վկայի, Գնելը ասել է՝ «Նորո՛, հանի բուշլատի քուղերը», իսկ Նորոն ասել է՝ դուրս չի գալիս, Գնելն էլ ասել է՝ կտրի, որից հետո որոշել, թե ինչ անեն Հայկազի դիակի հետ: Նորոն ասել է. «պատշգամից ցած գցենք», իսկ Գնելն ասել չէ՝ «ըտենց կջոգեն», ապա Վաչեն առաջարկել է երկտող գրեն՝ իբր ոչ մեկը մեղավոր չի, որ ոչ մեկի վրա չկասկածեն:

Դրանից հետո Հայկազին դուրս են տարել, որից հետո Գնելը հետ է եկել, արթնացրել բոլորին, սպառնացել, որ սրա մասին ոչ մեկը չիմանա.. «Որտեղ էլ լինի, ոնց էլ լինի, գետնի տակից էլ լինի կգտնեմ»:

Առերեսումներ էին եղել նաև մյուս ամբաստանյալների և վկայի միջև:

Աղբյուր` Փաստինֆո