Փաստ ինֆո

«Հաց բերող» անունն ստացած Արթուր Սարգսյանի դիահերձումը հետաձգելու մասին միջնորդություն վարույթն իրականացնող մարմինը չի ստացել: «Փաստինֆո»-ի հարցմանն ի պատասխան ասաց ՀՀ ՔԿ նախագահի խորհրդական Սոնա Տռուզյանը` նշելով, որ նշանակված դատաբժշկական փորձաքննության շրջանակներում դիահերձումը մարտի 18-ին կատարվել է, որին ներկա է եղել տուժողի իրավահաջորդի ներկայացուցիչը:

Միջազգային փորձագետների ներգրավումն ապահովելու վերաբերյալ տուժող կողմի միջնորդությունը նախաքննական մարմինը բավարարել էր, սակայն փորձագետներն այդպես էլ չեն ժամանել Հայաստան: «Այո, վարույթն իրականացնող մարմինը բավարարել էր միջնորդությունը եւ երաշխավորել, որ տուժողի իրավահաջորդների կողմից ներկայացված թեկնածուները կներգրավվեն միջնորդության կատարմանը: Սակայն այդ փորձագետները Հայաստան չժամանեցին», - ասաց Ս.Տռուզյանը: Վերջինիս հավաստմամբ` աշխատանքային կարգով քննարկումներ են ընթացել փաստաբանների հետ, պարզաբանվել ժամանակի սահմանափակումները, քանի որ, ըստ մասնագետների, դիահերձումը պետք է կատարվի մահից 12 ժամ հետո` 48 ժամվա ընթացքում, իսկ դրանից հետո տեղի են ունենում փոփոխություններ, որոնք կարող են աղավաղել պատկերը, ուստիեւ որոշվեց դիահերձումը կատարել մարտի 18-ին, հակառակ պարագայում կարող էին նաեւ կարծիքներ հնչել, թե դիահերձումը հատուկ հետաձգվել է օբյեկտիվ պատկերը չունենալու համար:
Բուն փորձաքննությունը, որի ժամանակ կիրականացվի հետազոտությունը, որոշակի ժամանակ կպահանջի:

Ավելի վաղ տեղեկացրել ենք, որ «Փաստինֆո»-ի հարցին ի պատասխան դիահերձարանի բաժնի վարիչ Շավարշ Գևորգյանը նշել էր, որ դիակը դատաբժշկական փորձաքննության ենթարկելու համար որքան շուտ դիահերձում կատարվի, այնքան լավ, սակայն մահանալուց հետո 12 ժամից շուտ իրավունք չունեն դիահերձում կատարել: Ըստ նրա` նորմալ արդյունքների համար դիահերձումը պետք է կատարել 48 ժամվա ընթացքում, իսկ դրանից հետո տեղի են ունենում փոփոխություններ՝ բջջային կազմն է վերանում, ձևաբանական փոփոխություններ են տեղի ունենում, ինչն աղավաղում է պատկերը, և չես կարողանում հստակ կողմնորոշում կատարել և դատողություններ անել:

Ի դեպ, ինչ վերաբերում է փաստաբանների առաջարկած փորձագետներին, ապա պարզվում է, նրանք փաստաբանների կողմից պատշաճ հրավեր չեն ստացել: Բժշկական փորձագետ Դավիթ Գոնգոլիան, որը Վրաստանից պետք է ժամաներ Հայաստան «Հաց բերող» Արթուր Սարգսյանի մահվան գործով դատաբժշկական փորձաքննությանը մասնակցելու նպատակով, չի եկել տուժողի իրավահաջորդների ոչ պատշաճ կազմակերպվածության պատճառով։

«Ոչ, ես չեմ եկել։ Ես պատրաստ էի մասնակցել։ Ինձ զանգահարեց փաստաբանը ու էլի ինչ-որ մեկը։ Բայց հետո չզանգահարեցին, ես սպասում էի։ Չգիտեմ, ինչ են որոշել, ինչպես են որոշել», - Aysor.am-ի թղթակցի հետ հեռախոսազրույցում Վրաստանից ասաց Դավիթ Գոնգոլիան։

Աղբյուր` Փաստինֆո